Read obolo Ifuk 18 Bible Online

Ifuk 18 - obolo bible

Ifuk 18

¹Okumugwem onenitumu inyi Erọn ibe, “Nrọ-nlọ geelek ene geelek orọbe ofolek Atanga Mbuban ìbotoon̄ owu mè bọn ebirieen̄ kwun̄ mè ebi uwu nte kwun̄ me ibot. Ire, nrọ-nlọ geelek ene geelek orọbe òfo me lek irek ikwaan̄ ebi ngwugwa, òrere irek ikwaan̄ kinyi, nrọ-nlọ keya ìbotoon̄ owu melek bọn ebirieen̄ kwun̄ gaalek me ibot.

²Gwen si ebi ngwan̄ kwun̄, ebi otoko kè Libai, òrere ebi otoko kè nte kwun̄, riaak me lek kwun̄, inyi ekenegọọk owu egbaan̄ erọ ikwaan̄, mè enere ebi ntap-ubọk enyi owu. Ire, îre owu melek bọn kwun̄ ebekisi ikwaan̄ me isi Atanga Inyan̄a-ibot.

³Inu geelek owu odọmọbe inyi ema, eya ke ema ebekirọ. Ema si ebekisi otutuuk asabọn ikwaan̄ geelek me emen Atanga Mbuban. Ire, ema kpebeje igbet lek nroon̄ ikwaan̄ echi ekisa isi ikwaan̄ me Ere Òkup Mbuban, kpebejeje si igbet lek ntook ngwugwa. Ire ema ikpaka, ema mêkwaan̄, owu melek bọn kwun̄ si mêgọgọọk ema ikwaan̄.

⁴Ema mêgọọk owu ikigbaan̄ ikwaan̄ isi, mè ikikpọ chieen̄ me lek Atanga Chinichini, mè ikirọ otutuuk asabọn ikwaan̄ geelek me emen Atanga ya. Ilọ me lek kiban̄, kpunu ofifi ene geege ebetele ibe ije igbet ere enyi ekupbe ikisi ikwaan̄.

⁵“Îre owu melek bọn kwun̄ ebirieen̄ gaalek ebekikpọ chieen̄ me lek otutuuk ikwaan̄ geelek me Ere Òkup Mbuban, melek ikwaan̄ ntook ngwugwa, inyi uga unaan̄-ejit Okumugwem ikayaka ìkpọk ìrọn̄ ìkeme ebi Ijeren ofifi.

⁶Îre emi me lek n̄a ngobo ebi ngwan̄ kinyi, ebi otoko kè Libai, isibi me etete ebi Ijeren, mè inisa ema iche inyi enyi kubọk inyinyi òsibi esese. Ema ebekup esese inyi Okumugwem, mè ikisi ikwaan̄ òkup inyi ema me emen Atanga Chinichini.

⁷Ire, owu gaalek melek bọn ebirieen̄ kwun̄ ebekirọ ikwaan̄ ebi ngwugwa me lek inu geelek ògbaan̄ me lek ntook ngwugwa melek Ere Òkup Mbuban Ichit me udun̄ ekwut mgban ya. Ǹcheche ikwaan̄ ngwugwa inyi enyi kubọk uche òsibi esese. Ogwu okpo geelek òjeje igbet lek ntook ngwugwa melek Ere Òkup Mbuban Ichit, ebekpakpan̄.”

⁸Okumugwem onenitumu inyi Erọn ibe, “Emi me lek n̄a nrọ owu ogwu ibot me lek inu ngwugwa geelek esabe inu me isi n̄a. Inu ngwugwa òkup mbuban geelek ebi Ijeren mêsabe inu me isi n̄a, nyaka otutuuk inyi owu melek bọn ebirieen̄ kwun̄ kubọk uche òje me lek irek ikwaan̄ kinyi. Eyi ìre ikan òbokup ire mgbọ geelek.

⁹Inu echi òkup inyi owu me lek inu ngwugwa òkup mbuban ichit, echi kpetap ukan̄ iwọp me inyọn̄ ntook, ìre inu ngwugwa ebi Ijeren geelek, mè inu ngwugwa akpa kiban̄, mè inu ngwugwa ijo inu kiban̄, mè otutuuk inu ngwugwa esuuk kiban̄ ema egwabe inyi emi. Inu ngwugwa chi ìre inu òkup mbuban ichit. Otutuuk kechi ìkup inyi owu mè bọn ebirieen̄ kwun̄.

¹⁰Enyi ebekirie inu chi me ere òkup mbuban enenen. Ebirieen̄ gaalek ebekirie inorie chi. Enyi mêmọnọ inu chi kubọk inu òkup mbuban ichit.

¹¹“Inu geelek esan̄abe isun̄ esese me lek inyinyi ebi Ijeren esabe inu inigwa ngwugwa ewuwuwum, ìkup inyi owu. Emi ǹsasa uche keyi inyi owu melek bọn kwun̄ ebirieen̄ mè ebibaan̄. Eyi ìre ikan òbokup ire mgbọ geelek. Ogwu ototun̄ ukan̄ kwun̄ geelek ogwu ikakaan̄ge mbuban me lek môkọt irie uche inorie keyi.

¹²“Otutuuk aran̄ olifu ònwọnwọn ichit, mè otutuuk aya miin̄ ònwọnwọn ichit, melek otutuuk akpa geelek ònwọnwọn ichit, echi ebi ene esabe ininyi Okumugwem kubọk adasi mfut uko kiban̄, ke nsa inyi owu.

¹³Otutuuk adasi mfut geelek ònan̄a me ijọn̄, echi ebi ene esabe ijet Okumugwem, ìbore echi kwun̄. Ogwu ototun̄ ukan̄ kwun̄ geelek ikakaan̄ge mbuban me lek môkọt irie inorie chi.

¹⁴“Otutuuk inu geelek ebi Ijeren esan̄abe isun̄ esese inyi Okumugwem ìre echi kwun̄.

¹⁵Gwun̄ geelek òchichili owot ogwu uga,[11] mè ìre ebilene, mè ìyaka ire anam, eyi ekanabe inyi Okumugwem, ìre echi kwun̄. Ire, owu òkpolọlọ ikpekpe mkpukpe isa inwene ibot adasi gwun̄ enerieen̄ ebilene, mè inwene si ibot adasi orie gwun̄ anam geelek òkaan̄ mbuban me lek.

¹⁶Gwun̄ geelek òsoso onyan̄ ge, mè ìre gwun̄ ebilene mè ìyaka ire gwun̄ anam, owu òbokpe otu ifuk ikpoko efieekbe, òrere ikpoko alata okuket go, igọọk me lek ubọk itọ-inu eyi Uwu Mbuban, òrere akọp gera iba me ibot ikpoko alata okuket ge.[12]

¹⁷“Ire, adasi gwun̄ eriembuuk, mè arọọn̄, mè ebot, owu òkponwene ibot, mije, ema ekup mbuban. Owu mônyan eje kiban̄ igwook me lek ntook, mè itap ukan̄ iwọp okpọn̄ kiban̄ iriọk kubọk ngwugwa ukan̄ òkidun̄u utop olu òkibele Okumugwem ejit.

¹⁸Ufuk anam cha ìbore echi kwun̄, kubọk ngọ ejit anam ngwugwa ewuwuwum mè ukot agan̄ ulom kan̄ orebe echi kwun̄.

¹⁹“Otutuuk inyinyi òkup mbuban geelek echi ebi Ijeren ekisa ininyi Okumugwem ìkup inyi owu mè bọn ebirieen̄ kwun̄, mè bọn ebibaan̄ kwun̄. Eyi ìre ikan òbokup ire mgbọ geelek, mè ire si inyan̄a-ibot eyi uchi, òrere eyi kpebekọt igwak, eyi òbokup ire mgbọ ikakaan̄ge itata me isi Okumugwem. Inyan̄a-ibot yi ìkup inyi owu melek otutuuk ebi owot iman kwun̄.”

²⁰Okumugwem onenitumu inyi Erọn ibe, “Owu òkpokaan̄ ìrot geege me inyọn̄ ijọn̄ kiban̄, owu òkpokakaan̄ si ijọn̄ geege me etete kiban̄. Emi nre uche eyi kwun̄, mè ire si ìrot kwun̄ me etete ebi Ijeren.

²¹“Ebi otoko kè Libai ke nsa otutuuk mkpukpe irek ge me akọp irek, echi otutuuk ebi Ijeren ekikpe, inyi kubọk ìrot kiban̄, isasa ikpe ema mkpukpe ubọk ikwaan̄ ema ekirọ me emen Atanga Chinichini.

²²Bene me mgbọ keyi nyi isi, kpunu ogwu Ijeren geege òboyaka ije igbet lek Atanga Chinichini, inyi ekasa me ikeya ìrọ ijo inu, mè ìkwaan̄.

²³Îre ebi otoko kè Libai ebekisi ikwaan̄ me emen Atanga Chinichini. Osusut nrọ-nlọ geelek ofolek Atanga Mbuban ìbotoon̄ ema me ibot. Eyi ìre ikan òbokup ire mgbọ geelek me ukot kinyi geelek. Ebi otoko kè Libai kpebekaan̄ ìrot geege me etete ebi Ijeren.

²⁴Mije, îre irek ge me akọp irek echi ebi Ijeren ekisa inu me isi Okumugwem kubọk inyinyi ke nsa inyi ebi otoko kè Libai kubọk ìrot eyi kiban̄. Îre mije keyi ke ntumu inyi ema ibe ke ema kpebekaan̄ ìrot geege me etete ebi Ijeren.”

²⁵Okumugwem onenitumu inyi Mosis ibe

²⁶itumu inyi ebi otoko kè Libai ibe, “Enyi isibọkọ irek ge me akọp irek eyi emi mânyibe enyi inan̄a me ubọk ebi Ijeren kubọk ìrot eyi kinyi, enyi mêsan̄a si irek ge me akọp irek me lek ìrot kinyi cha, mè isa inyi Okumugwem kubọk inyinyi eyi kinyi.

²⁷Mêfuk inyinyi yi inyi enyi kubọk ìyaka ire inyinyi akpa ònan̄a me ere igen̄ akpa kinyi, mè aya miin̄ ònan̄a me ere ekichimi gerep kinyi.

²⁸Sa me ikeya ke enyi si mêkigọọk inyi Okumugwem inyinyi inan̄a me lek otutuuk irek ge me akọp irek echi enyi ekibọkọ me ubọk ebi Ijeren. Inyinyi kinyi yi, eyi enyi ebesa inyi Okumugwem, enyi ebekisa inyi Erọn ogwu ngwugwa.

²⁹Me otutuuk inyinyi geelek esabe ijet enyi, enyi mêkisan̄a echi ònwọnwọn ichit, mè agan̄ òkup mbuban ichit isa inyi Okumugwem.

³⁰“Tumu nyi ebi ngwugwa otoko kè Libai ibe, ‘Enyi isikisan̄a agan̄ ònwọnwọn ichit isa inyi Okumugwem, mêfuk echa inyi enyi kubọk inyinyi akpa ònan̄a me ere igen̄ akpa kinyi, mè ata miin̄ ònan̄a me ere ekichimi gerep kinyi.

³¹Enyi melek ebi ototun̄ ukan̄ kinyi mêkọt ikirie echi òsisik cha me ere geelek, mije, eyi ìre mkpukpe kinyi mije ikwaan̄ enyi ekisi me emen Atanga Chinichini.

³²Me ere enyi ewuwuuk lek isa inyinyi echi ònwọnwọn ichit inyi Okumugwem, ikan geege ìkatet enyi, ire enyi irie geelek òsisik. Ire, ikachaka mbuban me lek inyinyi ebi Ijeren cha echi òkup mbuban, inyi enyi ekakwaan̄ ìta.’ ”