Read obolo Ifuk 2 Bible Online

Ifuk 2 - obolo bible

Ifuk 2

¹Okumugwem onenitumu inyi Mosis mè Erọn ibe,

²“Me ere m̀gba-ǹgwele ukan̄ geelek ebi Ijeren mêlukbe, ema ebegwugwuun̄ uwu ọfọ kiban̄ me otoko me otoko, kpa ogwu me irak egop otoko kan̄ mè iman̄ òriọọn̄ uwu ogwu ute. Atanga Chinichini obokup me etete, sà ebi otoko cha ebegwugwuun̄ uwu ọfọ kiban̄ me irek me irek ikat ikana Atanga Chinichini ya okokop. Ema mêgwugwuun̄ uwu ọfọ kiban̄ ida ibọkọ me lek Atanga Chinichini ya.

³“Me agan̄ mbum-ura, ọgbọn̄ ebi ìje melek otoko kè Juda ebegwugwuun̄ uwu ọfọ kiban̄ me irak egop ọgbọn̄ kiban̄. Ogwu ibot ebi otoko kè Juda ìre Nasiọn gwun̄ kè Aminadap.

⁴Otu ifuk ebi otoko kè Juda ìre akọp obop jaaba mè obop ini, mè efit gweregwen.

⁵“Ebi otoko kè Isaka mênenigwugwuun̄ uwu ọfọ kiban̄ igọọk ebi otoko kè Juda. Ogwu ibot otoko kè Isaka ìre Netanen gwun̄ kè Juwari.

⁶Otu ifuk ebi otoko kè Isaka ìre akọp obop go mè obop ini, mè efit ini.

⁷“Ebi otoko kè Jebulọn mênenigwugwuun̄ uwu ọfọ kiban̄ igọọk ebi otoko kè Isaka. Ogwu ibot otoko kè Jebulọn ìre Eliabu gwun̄ kè Elọn.

⁸Otu ifuk ebi otoko kè Jebulọn ìre akọp obop go mè obop jaaba, mè efit ini.

⁹“Otutuuk otu ifuk ebirieen̄ ìkup me ọgbọn̄ ebi ìje melek otoko kè Juda ìre efit obop mè akọp obop jeeta mè obop gweregwen, mè efit ini. Mgbọ geelek ebi Ijeren ebejibi ije, îre ebibi ebekidasi ijibi ije me onineen̄ me onineen̄ ike edọmọbe ema isun̄ yi.

¹⁰“Me agan̄ osiki, ọgbọn̄ ebi ìje melek otoko kè Ruben ebegwugwuun̄ uwu ọfọ kiban̄ me irak egop kiban̄. Ogwu ibot otoko kè Ruben ìre Elisuru gwun̄ kè Sediuru.

¹¹Otu ifuk ebi otoko kè Ruben ìre akọp obop ini mè obop gweregwen, mè efit go.

¹²“Ebi otoko kè Simiọn mênenigwugwuun̄ uwu ọfọ kiban̄ igọọk ebi otoko kè Ruben. Ogwu ibot otoko kè Simiọn ìre Selumien gwun̄ kè Surisadai.

¹³Otu ifuk ebi otoko kè Simiọn ìre akọp obop go mè obop onaan̄ge, mè efit ita.

¹⁴“Ebi otoko kè Gadi mênenigwugwuun̄ uwu ọfọ kiban̄ igọọk ebi otoko kè Simiọn. Ogwu ibot otoko kè Gadi ìre Eliyasafu gwun̄ kè Rewen.

¹⁵Otu ifuk ebi otoko kè Gadi ìre akọp obop ini mè obop go, mè efit gweregwen mè akọp go.

¹⁶“Otutuuk otu ifuk ebirieen̄ ìkup me ọgbọn̄ ebi ìje melek otoko kè Ruben ìre efit obop mè akọp obop go mè obop ge, mè efit ini mè akọp go. Mgbọ geelek ebi Ijeren mêjibibe ije, îre ebibi ebekije òso ukpa iba me onineen̄ me onineen̄ ike edọmọbe ema isun̄ yi.

¹⁷“Ọgbọn̄ ebi ìje melek otoko kè Ruben isije iraka, ebi otoko kè Libai ìben Atanga Chinichini melek ebi otoko kè Libai kechilọ mênenije igọọk me etete adasi ọgbọn̄ iba cha mè ọgbọn̄ iba echi òje me udun̄. Ema ebeje si me onineen̄ me onineen̄ igọọk me ubọk ema ekigwugwuun̄ uwu ọfọ kiban̄, kpa otoko me irek kan̄ me irak egop kiban̄.

¹⁸“Me agan̄ ichep-ura, ọgbọn̄ ebi ìje melek otoko kè Iferem ebegwugwuun̄ uwu ọfọ kiban̄ me irak egop kiban̄. Ogwu ibot otoko kè Iferem ìre Elisama gwun̄ kè Amiyudu.

¹⁹Otu ifuk ebi otoko kè Iferem ìre akọp obop ini, mè efit go.

²⁰“Ebi otoko kè Manasi mênenigwugwuun̄ uwu ọfọ kiban̄ igọọk ebi otoko kè Iferem. Ogwu ibot ebi otoko kè Manasi ìre Gamalien gwun̄ kè Pedajuru.

²¹Otu ifuk ebi otoko kè Manasi ìre akọp obop ita mè obop iba, mè efit iba.

²²“Ebi otoko kè Benjamin mênenigwugwuun̄ uwu ọfọ kiban̄ igọọk ebi otoko kè Manasi. Ogwu ibot otoko kè Benjamin ìre Abidan gwun̄ kè Gidiọn.

²³Otu ifuk ebi otoko kè Benjamin ìre akọp obop ita mè obop go, mè efit ini.

²⁴“Otutuuk otu ifuk ebirieen̄ ìkup me ọgbọn̄ ebi ìje melek otoko kè Iferem ìre efit obop ge mè obop jeeta, mè efit ge. Mgbọ geelek ebi Ijeren mêjibibe ije, îre ebibi ebekije òso ukpa ita me onineen̄ me onineen̄ ike edọmọbe ema isun̄ yi.

²⁵“Me agan̄ inyọn̄, ọgbọn̄ ebi ìje melek otoko kè Dan ebegwugwuun̄ uwu ọfọ kiban̄ me irak egop kiban̄. Ogwu ibot otoko kè Dan ìre Ayejeri gwun̄ kè Amisadai.

²⁶Otu ifuk ebi otoko kè Dan ìre akọp obop gweregwen mè obop iba, mè efit jaaba.

²⁷“Ebi otoko kè Ase mênenigwugwuun̄ uwu ọfọ kiban̄ igọọk ebi otoko kè Dan. Ogwu ibot otoko kè Ase ìre Pagien gwun̄ kè Okaran.

²⁸Otu ifuk ebi otoko kè Ase ìre akọp obop ini mè obop ge, me efit go.

²⁹“Ebi otoko kè Nafitali mênenigwugwuun̄ uwu ọfọ kiban̄ igọọk ebi otoko kè Ase. Ogwu ibot otoko kè Nafitali ìre Ayira gwun̄ kè Enan.

³⁰Otu ifuk ebi otoko kè Nafitali ìre akọp obop go mè obop ita, mè efit ini.

³¹“Otutuuk otu ifuk ebirieen̄ ìkup me ọgbọn̄ ebi ìje melek otoko kè Dan ìre efit obop ge mè akọp obop go mè obop jaaba, mè efit gweregwen. Mgbọ geelek ebi Ijeren mêjibibe ije, îre ebibi ebekije me òso ukpa ini, eyi òrere òta ukpa. Ema mêben egop kiban̄ isa ije me onineen̄ me onineen̄ ike edọmọbe ema isun̄ yi.

³²“Otutuuk otu ifuk ebirieen̄ ebi Ijeren ike efukbe ema me otoko me otoko, me ubọk ema ekiluk me irek me irek, onenisibi efit obop gweregwen mè obop ita, mè efit go mè akọp go.

³³Ire, kpefuk ebi otoko kè Libai igbaalek otu ifuk ebi Ijeren kechilọ, ike Okumugwem otumube inyi Mosis.

³⁴“Ebi Ijeren erọrọ otutuuk inu ike Okumugwem onyibe Mosis ida ibe ema erọ. Ema ekiluk me irak egop kiban̄, mè ikije ije si me ototun̄ ukan̄ me ototun̄ ukan̄, me otoko me otoko.”