Read obolo Ifuk 21 Bible Online

Ifuk 21 - obolo bible

Ifuk 21

¹Îkaan̄ ama ebi Kenan ge òkup me èwê agan̄ osiki. Erieen̄ ama ya ìre Aradi. Mgbọ ogwu ubọọn̄ Aradi yi onọbe ibe ke urum ebi Ijeren mêkije inu me oniin̄ Atarim, ijijibi akọn̄ isi itim me lek ebi Ijeren, mè itet usini kiban̄ me akọn̄ isa ifo.

²Ebi Ijeren eneninyan̄a ibot inyi Okumugwem ibe, “Ire owu okana ife chi itap eji me ubọk me atikọ, eji mêsa ama kiban̄ cha irọ inu oniin̄ akọn̄.”

³Okumugwem onọnọ mbeek ebi Ijeren, mè ikana ebi Kenan cha itap ema me ubọk. Ebi Ijeren egbagbaan̄ ema melek ama kiban̄ ijijaka isan̄a kpai kubọk inu oniin̄ akọn̄. Sa me ikeya ke ekigwen ere ya Oruma,[14]

⁴Ebi Ijeren enenibene ije ije inan̄a me lek ogoon̄ Ôru, mè ije me oniin̄ okwaan̄ Anyiaan̄ ikat ikana ijọn̄ ido Edọm. Me oniin̄ ije kiban̄, ema kpeyaka ikọt ikat ejit itet lek ikaan̄.

⁵Ema ebebene ikitumu ikeme Awaji, mè ikitumu si ikeme Mosis ibe, “Ìre keke orọ enyi ekpulube eji inan̄a me Ijipiti isibi ibesa inikpan̄ isan̄a me emen èwê ere kpunube inorie, kpunu mudim? Mkpọn̄kpọn̄ inorie mana yi, ejit kiji îjọ me lek.”

⁶Okumugwem oraria ogbogbo ijo ulu itap me etete ebi Ijeren. Ulu cha ololoon̄ ema, owuwa kiban̄ ekwakwaan̄.

⁷Ebi Ijeren enunu me lek kè Mosis, mè initumu inyi ibe, “Eji mîrọ ijo inu, mije eji etumube ikọ ikeme Okumugwem, mè itumu si owu ilọ. Soso, riaak Okumugwem ibe ikpukpa, mè inye lek isan̄a ijijinu chi isan̄a me etete kiji.” Mosis orariaak uriaak me ibot kiban̄.

⁸Okumugwem otutumu inyi Mosis ibe, “Rọ ijijinu ge, mè sa jeen̄ me otu ọfọkọ, mè bene gwuun̄, inyi, mgbọ geelek ijijinu isilom ene, mè ene ya isibene chieen̄ ikpọ ijijinu eyi òkup me otu ọfọkọ ya, ene ya ìkpoyaka ikwu. Ire, môgat ugwem.”

⁹Ikeya ke Mosis onisa ekwe irọ ijijinu ge, mè isa ijeen̄ me otu ọfọkọ, mè ibene igwuun̄. Ebi geelek ijijinu oloon̄be, ìbebene chieen̄ ikpọ ijijinu eyi ekwe ya, kpeyaka ikikwaan̄.

¹⁰Ebi Ijeren eneninan̄a ije isi ire Obot, mè inigwugwuun̄ uwu ọfọ kiban̄ me ere ya, mè ikup isiki efuuk.

¹¹Ema eneninan̄a me Obot, mè ije isi ire Iye Abarim òkup me emen èwê eyi òkibene isi ida Mowabu me agan̄ mbum-ura, mè inigwugwuun̄ uwu ọfọ kiban̄ me ere ya ikup itap efuuk.

¹²Ema enenijibi inan̄a me ere keya ije mege isi ire iteke Jeredi, mè inigwugwuun̄ si uwu ọfọ kiban̄ ikup itap efuuk.

¹³Ema eneninan̄a si me ere keya ije mege isi ire usaba agan̄ okwaan̄ Anọn eyi òkup me emen èwê. Okwaan̄ yi înyana isi ire ido ebi Amọ. Ọmọ ore si okike ijọn̄ ebi Mowabu melek ebi Amọ.

¹⁴Mije keya ke ege inu ofolek ama Wayebu òkup me agan̄ Supa mè bọn okolo okwaan̄ Anọn me emen Ikpa Akọn̄ Okumugwem,

¹⁵mè ige si inu ofolek ibot okolo okwaan̄ Anọn cha òkakana ikook, echi ònyanyana isi ire ama Ari, me okike otubọk ijọn̄ ido Mowabu.

¹⁶Ebi Ijeren eneninan̄a me usaba agan̄ okwaan̄ Anọn ya ije mege isi ire Bie, òrere udọn̄ mudim ere Okumugwem otumube inyi Mosis ibe, “Titiin̄ otutuuk ebi Ijeren, ke mânyi ema mudim.”

¹⁷Mgbọ ya ke ebi Ijeren ekọt okwa keyi ibe, “Gbuk mun̄ sibi, jei udọn̄ mun̄! Ìkọt okwa ofolek!

¹⁸Ìkọt okwa ofolek udọn̄ mun̄ yi, eyi ebi ilile erọkọbe, eyi ebi isi ene echilibe, eyi ebi otu osoon̄ ikọ esabe okuba mè mkpat kiban̄ irọkọ.” Mgbọ eya orakabe, ebi Ijeren eneninan̄a me emen èwê ya ije isi ire Matana,

¹⁹mè inan̄a me Matana isi ire Nayalien,[15] mè inan̄a me Nayalien isi ire Bamot,

²⁰mè inan̄a me Bamot isi ire iteke òkup me inyọn̄ ijọn̄ Mowabu me agba lek ibot ogoon̄ Pisiga òkibene isi ikpọ emen èwê.

²¹Ebi Ijeren eneniria ene ibe esi etumu enyi Siyon, ogwu ubọọn̄ ebi Amọ ibe,

²²“Nye lek tele inyi eji eneje eraka me inyọn̄ ijọn̄ ido kinyi. Eji kpebegwaka inin̄ emen uko geege, mè ìre uko gerep. Eji kpebenwọ si mudim inan̄a me udọn̄ mun̄ geege. Eji ebeje me uga oniin̄, òrere oniin̄ ogwu ubọọn̄ gaalek, mege eji mêjebe iraka okike ijọn̄ ido kinyi.”

²³Ire, Siyon ojijit. Ìkachieek ibe ebi Ijeren eje eraka me inyọn̄ ijọn̄ ido kan̄. Kpan̄asi ikeya, Siyon otititiin̄ otutuuk ebi akọn̄ kan̄ isa isibi ibosi itim akọn̄ me lek ebi Ijeren me emen èwê. Ema enenichichini melek ebi Ijeren me Jayas, mè itim akọn̄ me lek kiban̄.

²⁴Ire, ebi Ijeren ekpakpan̄ ọmọ me akọn̄, mè ibọkọ ijọn̄ kan̄, ibene me okwaan̄ Anọn mege isi ire lek okwaan̄ Jabọk, mè ibọkọ si ire otubọk ijọn̄ ebi Amọn, mè iyaka me ere keya. Ema ebọkọ iyaka me ere keya, mije, ebi Amọn mîgwook ebi akọn̄ kiban̄ me okike ijọn̄ kiban̄ ibe ekebem.

²⁵Ebi Ijeren ebọbọkọ otutuuk ama ebi Amọ, mè inin̄ iluk, igbaalek ama Esibon mè asabọn ama òkukup ikana.

²⁶Esibon yi ore ama ibot ere Siyon olukbe ikikpulu ido ebi Amọ. Siyon ìtitim akọn̄ ikpan̄ adasi ogwu ubọọn̄ ebi Mowabu, mè ibọkọ otutuuk ijọn̄ kan̄, mege isi ire lek okwaan̄ Anọn.

²⁷Îre mije keya ke ebi ìkọt okwa ekikọt ibe, “Ìna me Esibon. Ìna, inyi ekpọk enama ama kè Siyon, mè eluk me emen.

²⁸“Mije, ukan̄ îra ilomo inan̄a me Esibon, alọm ukan̄ îsak inan̄a me ama kè Siyon, mè itaka ama Ari me Mowabu isan̄a, mè ijijaka ebi ibot me lek ijọn̄ ogoon̄ agba okwaan̄ Anọn.

²⁹Jei Mowabu, môfieek inyi owu! Enyi ebi ìkiriaak Kemos, mîchep enyi isan̄a. Kemos îtele bọn ebirieen̄ kan̄ ekana ebi nyanya, mè itele ibe bọn ebibaan̄ kan̄ ekana ebi eteen̄be me akọn̄, mè isa ijet Siyon ogwu ubọọn̄ ebi Amọ!

³⁰“Ire, eji mîtim ikpan̄ ema otutuuk. Eji mîjijaka ama Esibon isan̄a kpai mege isi ire ama Dibọn. Eji mîgbugbọ ema igwook mege isi ire ama Nofa, eyi ònyana isi ire ama Medeba.”

³¹Sa me ikeyi ke ebi Ijeren eniluk me inyọn̄ ijọn̄ ebi Amọ.

³²Mosis oneniria ebi enun̄unun̄ ibe esi ekpọ ubọk ama Jajeri okupbe. Ebi Ijeren ejijibi akọn̄ inin̄ asabọn ama òkup ikana ama ya, mè ibọkọ asabọn ama cha, mè irieen̄ ebi Amọ, ebikaan̄ ama cha, isibi.

³³Ebi Ijeren enenigwu ikana inin̄ oniin̄ agan̄ Basan. Ôgu ogwu ubọọn̄ Basan mè ebi kan̄ ejijibi akọn̄ isibi isi ikweek ebi Ijeren me Ederei, mè itim ema akọn̄ me lek.

³⁴Okumugwem onenitumu inyi Mosis ibe, “Katet ukpook me lek kan̄, mije, nra ikakana ọmọ melek otutuuk ebi akọn̄ kan̄ mè otutuuk ijọn̄ kan̄ itap owu me ubọk. Owu môrọ ọmọ inu orọbe Siyon ogwu ubọọn̄ Amọ, ogwu òluk me Esibon.”

³⁵Ebi Ijeren etitim akọn̄ ya, mè ikpan̄ Ôgu melek ebi bọn ebirieen̄, mè ikpan̄ si otutuuk urum akọn̄ kan̄ isan̄a kpai, ene ge ikeyi ìkanwọnọ. Ebi Ijeren ebọbọkọ si otutuuk ijọn̄ kè Ôgu isak.