Read obolo Ifuk 26 Bible Online

Ifuk 26 - obolo bible

Ifuk 26

¹Mgbọ ijo orukan̄ òkpan̄ ene ya orakabe isan̄a, Okumugwem otutumu inyi Mosis mè Elieja gwun̄ enerieen̄ kè Erọn ogwu ngwugwa ibe,

²“Ìfuk otutuuk ebi Ijeren me otoko me otoko, bene me lek ebi akọp acha iba fo inyọn̄, ìrere ebi mêkọtbe isi akọn̄ me Ijeren.”

³Ike mgbọ ya, ebi Ijeren ekup me òla ijọn̄ ido Mowabu, me usaba agan̄ okwaan̄ Jodan, me ere òkibene isi ikpọ Jeriko. Mosis mè Elieja ogwu ngwugwa enenitumu inyi ema ibe,

⁴“Ìfuk otutuuk ebirieen̄ Ijeren, bene me lek ebi akọp acha iba fo inyọn̄, ike Okumugwem onyibe Mosis ida ibe irọ.” Urum ebi Ijeren ìnan̄a me Ijipiti isibi ire echi:

⁵Ebi otoko kè Ruben, adasi gwun̄ enerieen̄ kè Ijeren, ìre ikeyi: Anọk ore nte ebi owot iman kè Anọk, Palu ore nte ebi owot iman kè Palu,

⁶Ejirọn ore nte ebi owot iman kè Ejirọn, Kami ore nte ebi owot iman kè Kami.

⁷Ebiba ere bọn otoko kè Ruben, me owot iman me owot iman. Efuk ema isibi akọp obop ini mè obop ita, mè efit jaaba mè akọp ita.

⁸Erieen̄ gwun̄ enerieen̄ kè Palu ìre Eliabu.

⁹Eliabu onenibon Nemuwen mè Datan mè Abiram. Datan mè Abiram ere ebi ibot me Ijeren ebi ìjeje ikeme Mosis mè Erọn, mè igọọk Kora ikeke, mgbọ ekpakabe ibot inyi Okumugwem,

¹⁰ijọn̄ okaka otu, mè imeen̄ ema melek Kora isan̄a, ukan̄ otataka otuuk kè efit ene iba mè akọp go ebi melek kiban̄ si isan̄a kpai. Inu yi onenikana inu ikween̄-inu.

¹¹Ubọk geelek, owot iman kè Kora kpekwaan̄ isan̄a.

¹²Ebibi ere ebi otoko kè Simiọn, me owot iman me owot iman: Nemuwen ore nte ebi owot iman kè Nemuwen, Jamin ore nte ebi owot iman kè Jamin, Jakin ore nte ebi owot iman kè Jakin,

¹³Jera ore nte ebi owot iman kè Jera, Sawulu ore nte ebi owot iman kè Sawulu.

¹⁴Ebiba ere ebi otoko kè Simiọn, me owot iman me owot iman. Ema ìre akọp obop iba mè obop iba, mè efit iba.

¹⁵Ebibi ere ebi otoko kè Gadi, me owot iman me owot iman: Jifọn ore nte ebi owot iman kè Jifọn, Agi ore nte ebi owot iman kè Agi, Suni ore nte ebi owot iman kè Suni,

¹⁶Ojini ore nte ebi owot iman kè Ojini, Eri ore nte ebi owot iman kè Eri,

¹⁷Arodi ore nte ebi owot iman kè Arodi, Areli ore nte ebi owot iman kè Areli.

¹⁸Ebiba ere ebi otoko kè Gadi, me owot iman me owot iman. Efuk ema isibi akọp obop ini mè efit go.

¹⁹Bọn ebirieen̄ iba kè Juda, Eri mè Onan, mîkwaan̄ me Kenan.

²⁰Ebibi ere ebi otoko kè Juda, me owot iman me owot iman: Siela ore nte ebi owot iman kè Siela, Pereji ore nte ebi owot iman kè Pereji, Jera ore nte ebi owot iman kè Jera.

²¹Ebibi ere ebi otoko kè Pereji, me owot iman me owot iman: Ejirọn ore nte ebi owot iman kè Ejirọn, Amulu ore nte ebi owot iman kè Amulu.

²²Ebiba ere ebi otoko kè Juda, me owot iman me owot iman. Efuk ema isibi akọp obop jaaba mè obop gweregwen, mè efit go.

²³Ebibi ere ebi otoko kè Isaka, me owot iman me owot iman: Tola ore nte ebi owot iman kè Tola, Puwa ore nte ebi owot iman kè Puwa.

²⁴Jasubu ore nte ebi owot iman kè Jasubu, Simiron ore nte ebi owot iman kè Simiron.

²⁵Ebiba ere ebi otoko kè Isaka, me owot iman me owot iman. Efuk ema isibi akọp obop gweregwen mè obop ini, mè efit ita.

²⁶Ebibi ere ebi otoko kè Jebulọn, me owot iman me owot iman: Seredi ore nte ebi owot iman kè Seredi, Elọn ore nte ebi owot iman kè Elọn, Jayalen ore nte ebi owot iman kè Jayalen.

²⁷Ebiba ere ebi otoko kè Jebulọn, me owot iman me owot iman. Efuk ema isibi akọp obop gweregwen mè efit go.

²⁸Ebibi ere ebi otoko kè Josefu inan̄a me owot kè Manasi mè Iferem, me owot iman me owot iman:

²⁹Ebi otoko kè Manasi ìre ikeyi: Makiri ore nte ebi owot iman kè Makiri. Makiri ore nte kè Giliadi. Giliadi ore nte ebi owot iman kè Giliadi.

³⁰Bọn owot iman kè Giliadi ìre ikeyi: Iyejeri ore nte ebi owot iman kè Iyejeri, Elek ore nte ebi owot iman kè Elek,

³¹Asirien ore nte ebi owot iman kè Asirien, Sekem ore nte ebi owot iman kè Sekem,

³²Semida ore nte ebi owot iman kè Semida, Eferi ore nte ebi owot iman kè Eferi.

³³Jelofeyadi gwun̄ kè Eferi ìkakaan̄ gwun̄ enerieen̄ geege, ìkaan̄ bọn ebibaan̄ gaalek. Erieen̄ kiban̄ ìre Mala mè Nuwa mè Ogula mè Milika mè Tirija.

³⁴Ebiba ere ebi otoko kè Manasi, me owot iman me owot iman. Efuk ema isibi akọp obop go mè obop iba, mè efit jaaba.

³⁵Ebibi ere ebi otoko kè Iferem, me owot iman me owot iman: Sutela ore nte ebi owot iman kè Sutela, Bekeri ore nte ebi owot iman kè Bekeri, Tayan ore nte ebi owot iman kè Tayan.

³⁶Ebibi ere ebi owot iman kè Sutela: Eran ore nte ebi owot iman kè Eran.

³⁷Ebiba ere ebi otoko kè Iferem, me owot iman me owot iman. Efuk ema isibi akọp obop ita mè obop iba, mè efit go. Ebiba ere ebi uwu kè Josefu, me otoko me otoko.

³⁸Ebibi ere ebi otoko kè Benjamin, me owot iman me owot iman: Bela ore nte ebi owot iman kè Bela, Asiben ore nte ebi owot iman kè Asiben, Ayiram ore nte ebi owot iman kè Ayiram,

³⁹Sufam ore nte ebi owot iman kè Sufam, Ufam ore nte ebi owot iman kè Ufam.

⁴⁰Bọn ebirieen̄ kè Bela ìre Aridi mè Nieman. Bọn kè Bela me owot iman kè Aridi mè Nieman ìre ikeyi: Aridi ore nte ebi owot iman kè Aridi, Nieman ore nte ebi owot iman kè Nieman.

⁴¹Ebiba ere ebi otoko kè Benjamin, me owot iman me owot iman. Efuk ema isibi akọp obop ini mè obop go, mè efit gweregwen.

⁴²Ebibi ere ebi otoko kè Dan, me owot iman me owot iman: Suyam ore nte ebi owot iman kè Suyam. Ebiba gaalek ere ebi otoko kè Dan, me owot iman me owot iman.

⁴³Otutuuk ebi owot iman kè Suyam, me ototun̄ ukan̄ me ototun̄ ukan̄, efuk ema isibi akọp obop gweregwen mè obop ini, mè efit ini.

⁴⁴Ebibi ere ebi otoko kè Ase, me owot iman me owot iman: Imina ore nte ebi owot iman kè Imina, Isibi ore nte ebi owot iman kè Isibi, Beria ore nte ebi owot iman kè Beria.

⁴⁵Bọn kè Beria ìre Eberi mè Malikien. Eberi ore nte ebi owot iman kè Eberi, Malikien ore nte ebi owot iman kè Malikien.

⁴⁶Ase îkaan̄ gwun̄ enenwaan̄ ge egwenbe Sera.

⁴⁷Ebiba ere ebi otoko kè Ase. Efuk ema isibi akọp obop go mè obop ita, mè efit ini.

⁴⁸Ebibi ere ebi otoko kè Nafitali, me owot iman me owot iman: Jasien ore nte ebi owot iman kè Jasien, Guni ore nte ebi owot iman kè Guni,

⁴⁹Jeseri ore nte ebi owot iman kè Jeseri, Silem ore nte ebi owot iman kè Silem.

⁵⁰Ebiba ere ebi otoko kè Nafitali, me owot iman me owot iman. Efuk ema isibi akọp obop ini mè obop go, mè efit ini.

⁵¹Otutuuk otu ifuk ebi Ijeren onenire efit obop gweregwen mè obop ge, mè efit jaaba mè akọp ita.

⁵²Okumugwem onenitumu inyi Mosis ibe,

⁵³“Dọmọ ijọn̄ yi me irek me irek sa che nyi ife chi me ìrot gọọk me otu ifuk erieen̄.

⁵⁴Otoko geelek òwawa me otu ifuk, nyi ema ijọn̄ òmimin. Otoko geelek òsisip me otu ifuk, nyi ema si ijọn̄ òsisip. Ebi otoko geelek ebebọkọ ìrot kiban̄ igọọk me otu ifuk ebi kiban̄ ike îkupbe me ikpa.

⁵⁵Ire, eberoon̄ nriroon̄ isa idọmọ ijọn̄ cha igọọk me otu ifuk ene. Otoko geelek ìbobọkọ ìrot igọọk me otu ifuk ene egebe me ikpa me otoko kiban̄.

⁵⁶Eberoon̄ nriroon̄ isa iche ìrot inyi ebi otoko geelek, mè ìre otoko òmimin mè ìre eyi òsisip.”

⁵⁷Otu ifuk ebi otoko kè Libai, me owot iman me owot iman ìre ikeyi: Gasiọn ore nte ebi owot iman kè Gasiọn, Koyat ore nte ebi owot iman kè Koyat, Merari ore nte ebi owot iman kè Merari,

⁵⁸Ebibi si ìre ebi otoko kè Libai: ebi owot iman kè Libini, ebi owot iman kè Eburọn, ebi owot iman kè Mali, ebi owot iman kè Musi, mè ebi owot iman kè Kora. Koyat onenibon Amiram.

⁵⁹Erieen̄ nwa kè Amiram ìre Jokebedi ogwu otoko kè Libai ogwu emanbe me Ijipiti. Jokebedi oneniman Erọn mè Mosis mè Miriam, ngwan̄ kiban̄ enenwaan̄, inyi Amiram.

⁶⁰Erọn ore nte kè Nadabu mè Abiyu mè Elieja mè Itama.

⁶¹Ire, Nadabu melek kè Abiyu mîkwaan̄ mgbọ ema esabe esese ukan̄ igwa ngwugwa inyi Okumugwem.

⁶²Otu ifuk otutuuk ebirieen̄ ebi otoko kè Libai, ibene me lek asa nsabọn ebirieen̄ ìsoso onyan̄ ge mè iraka, ìre akọp obop iba mè obop ita. Kpefuk ebi otoko kè Libai itap me otu ifuk ebi Ijeren, mije, kpenyi ema ìrot me etete ebi Ijeren.

⁶³Eyiya ore ifuk-ene eyi Mosis melek Elieja ogwu ngwugwa efukbe mgbọ ema efukbe otu ifuk otutuuk ebi Ijeren me inyọn̄ òla ijọn̄ ido Mowabu, me usaba agan̄ okwaan̄ Jodan, me ere òkibene isi ikpọ Jeriko.

⁶⁴Me lek otutuuk ife chi efukbe mgbọ keyi, kpunu ene geege me etete kiban̄ òkukup mgbọ Mosis mè Erọn ogwu ngwugwa efukbe otu ifuk ebi Ijeren me emen èwê Saina.

⁶⁵Mije, Okumugwem îwuuk lek itumu inyi ebi efukbe mgbọ keya ibe ke ebibi ebekwakwaan̄ ita me emen èwê. Ikeya si, kpunu ene geege me etete kiban̄ òsisik, ilọ me lek Kelep gwun̄ kè Jefune mè Josuwa gwun̄ kè Nun.