Read obolo Ifuk 27 Bible Online

Ifuk 27 - obolo bible

Ifuk 27

¹Bọn ebibaan̄ kè Jelofeyadi, gwun̄ kè Eferi gwun̄ kè Giliadi gwun̄ kè Makiri gwun̄ kè Manasi gwun̄ kè Josefu, eneninan̄a isibi inu me otu isotu Atanga Chinichini. Erieen̄ kiban̄ ìre Mala mè Nuwa mè Ogula mè Milika mè Tirija.

²Ema enenikeke me isotu Atanga Chinichini ya me isi kè Mosis melek Elieja ogwu ngwugwa, mè isi ebi ibot, mè isi otutuuk ebi Ijeren, mè ikitumu ibe,

³“Nte kiji îkwu me emen èwê, ìkakaan̄ bọn ebirieen̄ geege. Ọmọ ìkare ene ge me etete ebi melek Kora egbaan̄be ikpaka ibot inyi Okumugwem. Ire, ọmọ ìkwu mkpa mije ijo inu kan̄ gaalek.

⁴Ìre erieen̄ nte kiji ìbojeje inan̄a me etete ebi owot iman kiban̄ ichep ikeya, mije ikakaan̄ge gwun̄ enerieen̄? Ikaan̄ uche ìrot òrere nte kiji lek me etete ebi ngwan̄ kan̄, ìsa ìnyi eji.”

⁵Mosis onenisa ikọ kiban̄ inu me isi Okumugwem.

⁶Okumugwem onenitumu inyi ọmọ ibe,

⁷“Inu bọn ebibaan̄ kè Jelofeyadi ekitumu ìre unen. Me atikọ, owu mônyi ema uche ìrot me etete ebi ngwan̄ nte kiban̄, mè isa me ikeya iyaka ìrot eyi nte kiban̄ isa ikana inyi ema.

⁸“Tumu nyi ebi Ijeren ibe, ikaan̄ ogwu enerieen̄ geelek òkwukwu, mè ìkakaan̄ gwun̄ enerieen̄ geege, ke mêsa ìrot kan̄ ikana inyi ogwu gwun̄ enenwaan̄.

⁹Ire ene ya ìkakaan̄ gwun̄ enenwaan̄, mêsa ìrot kan̄ ikana inyi ebi ngwan̄ kan̄ ebirieen̄.

¹⁰Ire ene ya ìkakaan̄ ngwan̄ ebirieen̄, mêsa ìrot kan̄ ikana inyi ebi ngwan̄ ogwu ute ebirieen̄.

¹¹Ire nte ene ya ìkakaan̄ ngwan̄ ebirieen̄ geege, mêsa ìrot kan̄ ikana inyi ene geelek òrariaak ọmọ me lek ichit me ototun̄ ukan̄ kiban̄, inyi ogwugwa irie ìrot ya. Eyi môre ikan inyi ebi Ijeren me ukot geelek, ike Okumugwem onyibe Mosis ida.”

¹²Okumugwem onenitumu inyi Mosis ibe, “Je si nene inyọn̄ ogoon̄ Abarim keyi, mè bene chieen̄ mun̄ ijọn̄ ya nsabe inyi ebi Ijeren.

¹³Osisa chieen̄ kwun̄ imun̄ ijọn̄ ya isan̄a, owu si môkwu igọọk ebi kinyi kubọk Erọn ngwan̄ kwun̄ okwube.

¹⁴Mije, enyi ene iba mîkpaka ida ikọ n̄a me emen èwê Jin, me mgbọ ebi Ijeren ekpakabe ibot inyi emi. Enyi kpesun̄ emi me mbuban me isi kiban̄ me agba lek mun̄ ya, òrere mun̄ Meriba òkup me Kades me emen èwê Jin.”

¹⁵Mosis onenitumu inyi Okumugwem ibe,

¹⁶“Soso Okumugwem, owu Awaji ogwu òkaan̄ unye me lek otutuuk ekwukwu ebilene, san̄a ene ge to, ogwu òbonikikpulu ebi ido yi,

¹⁷mè ikibeme ufialek kiban̄ geelek, mè ikisa ema isibi isi akọn̄, mè ikisa ema iyaka ika, inyi ebi eyi Okumugwem ekakup kubọk arọọn̄ kpunube òkaan̄ me lek.”

¹⁸Okumugwem onenitumu inyi Mosis ibe, “Mọnọ Josuwa gwun̄ kè Nun, ogwu enerieen̄ òkaan̄ Ekwukwu me emen, mè sa ubọk kwun̄ toon̄ ọmọ me lek.

¹⁹Sa Josuwa na, inyi inikeke me isi kè Elieja ogwu ngwugwa, mè isi otutuuk ebi ido Ijeren, mè faka ikwaan̄ tap ọmọ me ubọk me isi otutuuk kiban̄.

²⁰Kana usini me lek unye eyi mkpulu kwun̄ nyi ọmọ, inyi otutuuk ebi Ijeren mêkekigban̄ utọn̄ inyi ọmọ.

²¹Josuwa ìbokikeke me isi kè Elieja ogwu ngwugwa, inyi Elieja ikisa Urim iroon̄ nriroon̄ isa ikibọkọ nteme me ubọk Okumugwem inyi ọmọ. Ikọ otu kè Elieja ke ọmọ mè otutuuk ebi ido Ijeren ebekirọ. Ire ibe ema eje, ema mêjeje. Ire ibe ema egwu ekom eka, ema mêgwugwu ikom ika.”

²²Mosis orọrọ ike Okumugwem onyibe ọmọ ida, mè isa Josuwa inu, inyi inikeke me isi kè Elieja ogwu ngwugwa mè isi otutuuk ido ebi Ijeren.

²³Mosis onenitoon̄ Josuwa ubọk me lek, mè ifaka ikwaan̄ itap ọmọ me ubọk, ike Okumugwem onyibe Mosis ida ibe irọ.