Read obolo Ifuk 28 Bible Online

Ifuk 28 - obolo bible

Ifuk 28

¹Okumugwem onenitumu inyi Mosis ibe

²inyi otutuuk ebi Ijeren ida, mè itumu inyi ema ibe, “Ìgbala chieen̄ ìmun̄ ibe ke enyi mîkisa ngwugwa n̄a eyi inorie inikigwa inyi emi me mgbọ kan̄. Eyiyi ìre ngwugwa ukan̄ òkidun̄u utop olu òkibele emi ejit.”

³Îtumu si inyi Mosis ibe itumu inyi ema ibe, “Inu ngwugwa ukan̄ echi enyi ebekisa inigwa inyi Okumugwem ìre bọn arọọn̄ iba òsoso acha ge ge echi kpekaan̄ ìroon̄ geege me lek, echi mêkisa igwa ngwugwa ewọwọp iriọk inyi emi usen geelek.

⁴Mêsa gwun̄ arọọn̄ ge igwa ngwugwa me ewelegwe, mè isa eyilọ igwa me otu ikakwun̄.

⁵Mêkisa iko atalek akpa ekọkọk iba, eyi esabe iko aran̄ ge igbaan̄ ifuku, igwa ngwugwa akpa òje me lek ngwugwa ewọwọp iriọk cha me ewelegwe mè ikakwun̄.

⁶Eyiyi ìre ngwugwa ewọwọp iriọk eyi ebekigwa usen geelek, eyi esan̄abe isibi me ogoon̄ Saina, kubọk ngwugwa òkidun̄u utop olu òkibele Okumugwem ejit.

⁷Ngwugwa miin̄ egwogwook òje me lek ìbokire iko unye miin̄ ge me lek arọọn̄ ge. Ebekigwook miin̄ ya me agba lek ntook ngwugwa[19]

⁸Mêsa gwun̄ arọọn̄ eyi òso iba ya igwa ngwugwa eyi otu ikakwun̄. Mêgwa si ngwugwa akpa òje me lek, mè ngwugwa miin̄ egwogwook òje me lek, ubọk yaage ike egwabe me ewelegwe. Eyi ìre ngwugwa ukan̄ òkidun̄u utop olu òkibele Okumugwem ejit.

⁹“Me Usen Mbuban geelek, mêkisa bọn arọọn̄ iba kpunube ìroon̄ geege me lek igwa ngwugwa, mè isa iko atalek akpa ekọkọk ini esabe aran̄ igbaan̄ ifuku igwa ngwugwa akpa òje me lek, mè igwa si ngwugwa miin̄ egwogwook òje me lek.

¹⁰Eyiyi ore ngwugwa Usen Mbuban eyi mêkigwa me Usen Mbuban geelek, igbaalek ngwugwa kechilọ echi ebekigwa usen geelek.

¹¹“Me adasi usen me onyan̄ kinyi geelek, enyi mêkigwa ngwugwa ewọwọp iriọk inyi Okumugwem. Inu enyi ebekisa igwa ngwugwa ya ìre bọn orie eriembuuk iba, mè orie arọọn̄ ge, mè bọn orie arọọn̄ jaaba, otutuuk kiban̄ kpebekaan̄ ìroon̄ geege me lek.

¹²Inu ebesa igwa ngwugwa akpa òboje me lek eriembuuk ge ìbore iko atalek akpa ekọkọk gweregwen eyi esabe aran̄ igbaan̄ ifuku. Inu ebesa igwa ngwugwa akpa òboje me lek orie arọọn̄ ge ìbore iko atalek akpa ekọkọk ini esabe aran̄ igbaan̄ ifuku.

¹³Inu ebesa igwa ngwugwa akpa òboje me lek gwun̄ orie arọọn̄ ge ìre iko atalek akpa ekọkọk iba eyi esabe aran̄ igbaan̄ ifuku. Eyi ìre ngwugwa ewọwọp iriọk òkidun̄u utop olu òkibele Okumugwem ejit.

¹⁴Inu ebesa igwa ngwugwa miin̄ egwogwook òje me lek ngwugwa chi ìbore iko miin̄ iba me lek orie eriembuuk ge, iko miin̄ ge mè ntiko ita me lek orie arọọn̄ ge, mè iko miin̄ ge me lek gwun̄ arọọn̄ ge. Eyiyi ore ngwugwa ewọwọp iriọk eyi ebekigwa me otu onyan̄ me onyan̄ geelek me acha me acha.

¹⁵Isan̄a me lek ngwugwa ewọwọp iriọk echi ebekigwa usen geelek melek ngwugwa miin̄ egwogwook òje me lek, mêkisa gwun̄ orie ebot ge igwa si ngwugwa ijo inu inyi Okumugwem me otu onyan̄ geelek.

¹⁶“Òso akọp mè usen ini me adasi onyan̄ me acha geelek ìre usen ijọk Iraraka inyi Okumugwem.

¹⁷Òso akọp mè usen go me adasi onyan̄ yi ìre usen ijọk. Me emen ijọk yi, enyi ebekirie fituru kpunube olat me lek gaalek ototuuk usen jaaba.

¹⁸Me adasi usen me lek usen jaaba cha, enyi mênin̄ ntitiin̄ mbuban. Enyi kpeberọ ikwaan̄ kinyi geege.

¹⁹Enyi mêgwa ngwugwa ukan̄, òrere ngwugwa ewọwọp iriọk, inyi Okumugwem. Enyi ebesa bọn orie eriembuuk iba, mè orie arọọn̄ ge, mè bọn orie arọọn̄ jaaba òsoso acha ge ge, echi ikakaan̄ge ìroon̄ geege me lek igwa ngwugwa cha.

²⁰Inu ebesa igwa ngwugwa akpa òje me lek ngwugwa cha ìbore atalek akpa ekọkọk esabe aran̄ igbaan̄ ifuku, iko gweregwen me lek orie eriembuuk ge, iko ini me lek orie arọọn̄ ge,

²¹mè iko ge ge me lek bọn orie arọọn̄ jaaba cha ge ge.

²²Mêsa si gwun̄ orie ebot ge igwa ngwugwa ijo inu isa irọ esuuk me ibot kinyi.

²³Enyi mêkigwa ngwugwa kechi igbaalek ngwugwa ewọwọp iriọk, eyi enyi ekigwa me ewelegwe usen geelek.

²⁴Ikeya ke enyi ebekigwa ngwugwa inorie usen geelek, me otutuuk usen jaaba cha. Eyi ìre ngwugwa ukan̄ òkidun̄u utop olu òkibele Okumugwem ejit. Enyi ebekigwa ngwugwa yi igbaalek ngwugwa ewọwọp iriọk mè ngwugwa miin̄ egwogwook òje me lek, eyi enyi ekigwa usen geelek.

²⁵Òso usen jaaba eyi ijọk ya môre si usen ntitiin̄ mbuban inyi enyi. Me usen ya, enyi kpeberọ ikwaan̄ kinyi geege.

²⁶“Me usen adasi mfut, òrere usen ijọk Nde[20] kinyi, usen enyi ekigwa ngwugwa aya akpa inyi Okumugwem, enyi mênin̄ ntitiin̄ mbuban. Enyi kpeberọ ikwaan̄ kinyi geege me usen ya.

²⁷Enyi mêsa bọn orie eriembuuk iba, mè orie arọọn̄ ge, mè bọn orie arọọn̄ jaaba òsoso acha ge ge inigwa ngwugwa ewọwọp iriọk eyi òkidun̄u utop olu òkibele Okumugwem ejit.

²⁸Inu ebesa igwa ngwugwa akpa òje me lek ngwugwa cha ìbore atalek akpa ekọkọk esabe aran̄ igbaan̄ ifuku, iko gweregwen me lek orie eriembuuk ge, iko ini me lek orie arọọn̄ ge,

²⁹mè iko ge ge me lek bọn orie arọọn̄ jaaba cha ge ge.

³⁰Mêsa si gwun̄ orie ebot ge irọ esuuk me ibot kinyi.

³¹Enyi mêkigwa ngwugwa chi igbaalek ngwugwa ewọwọp iriọk melek ngwugwa miin̄ egwogwook òje me lek kiban̄, echi enyi ekigwa usen geelek. Ìmun̄ ibe ke anam geelek esabe igwa ngwugwa cha ìkakaan̄ ìroon̄ geege me lek.