Read obolo Ifuk 29 Bible Online

Ifuk 29 - obolo bible

Ifuk 29

¹“Me adasi usen me òso onyan̄ jaaba me acha geelek, enyi mênin̄ ntitiin̄ mbuban. Enyi kpeberọ ikwaan̄ kinyi geege me usen ya. Usen ya ìbore usen enyi ebekiwut otita.

²Enyi mêgwa ngwugwa ewọwọp iriọk, eyi òkidun̄u utop olu òkibele Okumugwem ejit. Ebesa gwun̄ orie eriembuuk ge, mè orie arọọn̄ ge, mè bọn orie arọọn̄ jaaba echi òsoso acha ge ge, echi kpekaan̄ ìroon̄ geege me lek igwa ngwugwa cha.

³Inu ebesa igwa ngwugwa akpa òje me lek ngwugwa cha ìbore atalek akpa ekọkọk esabe aran̄ igbaan̄ ifuku, iko gweregwen me lek orie eriembuuk ge, iko ini me lek orie arọọn̄ ge,

⁴mè iko ge ge me lek bọn orie arọọn̄ jaaba cha ge ge.

⁵Mêsa si gwun̄ orie ebot ge igwa ngwugwa ijo inu isa irọ esuuk me ibot kinyi.

⁶Otutuuk kechi ke enyi ebekirọ igbaalek akpan echi enyi ekititiin̄ onyan̄ geelek mè usen geelek, melek inyinyi echi ekitap ukan̄ iwọp, mè miin̄ geelek òje me lek, kubọk ewuukbe lek idọmọ isun̄. Inyinyi kechi ke enyi ebekisa inu, mè initap ukan̄ iwọp isa igwa ngwugwa ukan̄ òkidun̄u utop olu òkibele ejit Okumugwem inyi ọmọ.

⁷“Me òso akọp usen, me òso onyan̄ jaaba yi me acha geelek, enyi mênin̄ ntitiin̄ mbuban. Me usen ya, enyi mêjin otu. Enyi kpeberọ si ikwaan̄ kinyi geege.

⁸Enyi mêgwa ngwugwa ewọwọp iriọk inyi Okumugwem, òrere ngwugwa òkidun̄u utop olu òkibele Okumugwem ejit. Ebesa gwun̄ orie eriembuuk ge, mè orie arọọn̄ ge, mè bọn orie arọọn̄ jaaba echi òsoso acha ge ge, echi kpekaan̄ ìroon̄ geege me lek igwa ngwugwa cha.

⁹Inu ebesa igwa ngwugwa akpa òje me lek ngwugwa cha ìbore atalek akpa ekọkọk esabe aran̄ igbaan̄ ifuku, iko gweregwen me lek orie eriembuuk ge, iko ini me lek orie arọọn̄ ge,

¹⁰mè iko ge ge me lek bọn orie arọọn̄ jaaba cha ge ge.

¹¹Mêsa si gwun̄ orie ebot ge igwa ngwugwa ijo inu igbaalek ofifi ngwugwa ijo inu echi ebesa irọ esuuk, melek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

¹²“Me òso akọp mè usen go me onyan̄ jaaba, enyi mênin̄ ntitiin̄ mbuban. Enyi kpeberọ ikwaan̄ kinyi geege. Enyi mêrie ijọk inyi Okumugwem ototuuk usen jaaba.

¹³Enyi mêgwa ngwugwa ukan̄, òrere ngwugwa ewọwọp iriọk, eyi òkidun̄u utop olu òkibele Okumugwem ejit. Ebesa akọp mè bọn orie eriembuuk ita, mè orie arọọn̄ iba, mè akọp mè bọn orie arọọn̄ ini echi òsoso acha ge ge, echi kpekaan̄ ìroon̄ geege me lek igwa ngwugwa cha.

¹⁴Inu ebesa igwa ngwugwa akpa òje me lek ngwugwa cha ìbore atalek akpa ekọkọk esabe aran̄ igbaan̄ ifuku, iko gweregwen gweregwen me lek akọp mè orie eriembuuk ita cha ge ge, iko ini ini me lek orie arọọn̄ iba cha ge ge,

¹⁵mè iko ge ge me lek akọp mè bọn orie arọọn̄ ini cha ge ge.

¹⁶Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

¹⁷“Me òso usen iba me lek ijọk ya, enyi mêsa akọp mè bọn orie eriembuuk iba, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

¹⁸Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

¹⁹Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

²⁰“Me òso usen ita me lek ijọk ya, enyi mêsa akọp mè bọn orie eriembuuk ge, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

²¹Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

²²Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

²³“Me òso usen ini me lek ijọk ya, enyi mêsa akọp bọn orie eriembuuk, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

²⁴Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

²⁵Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

²⁶“Me òso usen go me lek ijọk ya, enyi mêsa bọn orie eriembuuk onaan̄ge, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

²⁷Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

²⁸Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

²⁹“Me òso usen gweregwen me lek ijọk ya, enyi mêsa bọn orie eriembuuk jeeta, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

³⁰Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

³¹Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

³²“Me òso usen jaaba me lek ijọk ya, enyi mêsa bọn orie eriembuuk jaaba, mè orie arọọn̄ iba, mè akọp mè bọn arọọn̄ ini echi òsoso acha ge ge, echi kpunube ìroon̄ geege me lek igwa ngwugwa.

³³Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

³⁴Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

³⁵“Me òso usen jeeta, enyi mênin̄ ntitiin̄ mbuban. Enyi kpeberọ ikwaan̄ kinyi geege.

³⁶Enyi mêgwa ngwugwa ukan̄, òrere ngwugwa ewọwọp iriọk, eyi òkidun̄u utop olu òkibele Okumugwem ejit. Ebesa orie eriembuuk ge, mè orie arọọn̄ ge, mè bọn orie arọọn̄ jaaba echi òsoso acha ge ge, echi kpekaan̄ ìroon̄ geege me lek igwa ngwugwa cha.

³⁷Inu ebesa igwa ngwugwa akpa mè ngwugwa miin̄ egwogwook òje me lek orie eriembuuk cha mè orie arọọn̄ cha mè bọn arọọn̄ cha ìbogọọk me otu ifuk ewuukbe lek idọmọ isun̄.

³⁸Mêsa si gwun̄ orie ebot ge igwa ngwugwa ijo inu igbaalek ngwugwa ewọwọp iriọk eyi ekigwa usen geelek, melek ngwugwa akpa mè ngwugwa miin̄ egwogwook òje me lek.

³⁹“Enyi mêkigwa ngwugwa chi inyi Okumugwem me ibot mgbọ ijọk kinyi. Enyi mêkigwa ngwugwa chi igbaalek irọrọ inyan̄a-ibot enyi enyan̄abe iso, mè inyinyi eyi ata ejit kinyi, mè ngwugwa ewọwọp iriọk, mè ngwugwa akpa, mè ngwugwa miin̄ egwogwook, mè ngwugwa esuuk kinyi.”

⁴⁰Mosis okpakpa otutuuk inu chi inyi ebi Ijeren kubọk Okumugwem onyibe ọmọ ida ibe irọ.