Read obolo Ifuk 32 Bible Online

Ifuk 32 - obolo bible

Ifuk 32

¹Ebi otoko kè Ruben melek ebi otoko kè Gadi mîkaan̄ eriembuuk mè arọọn̄ mè ebot iwa enenen. Ema enenimun̄ ibe ke ijọn̄ ebi Jajeri melek ijọn̄ ebi Giliadi înwọn enenen mè ijaan̄ ere mêkọtbe ikikpukpo anam.

²Mije keya, ema enunu me lek kè Mosis melek Elieja ogwu ngwugwa, mè otutuuk ebi ibot ebi Ijeren, mè initumu inyi ema ibe,

³“Ìkpọ, ijọn̄ ebi Atarot, mè echi ebi Dibọn, mè ebi Jajeri, mè ebi Nimira, mè ebi Esibon, mè ebi Eliale, mè ebi Sebam, mè ebi Nebo, mè ebi Beyon,

⁴otutuuk ijọn̄ chi ìre ijọn̄ Okumugwem otitim ikpan̄ isan̄a, mè ikana inyi ebi Ijeren, ijọn̄ chi ìre ata ijọn̄ ikpukpo anam. Eji ebi usun̄ kinyi si mîkaan̄ anam iwa enenen.

⁵Ire inu kiji ineme enyi, ìsa okike ijọn̄ keyi ìnyi eji ebi usun̄ kinyi, inyi ire ìrot eyi kiji. Ikasa eji ìsaba okwaan̄ Jodan.”

⁶Mosis onenitumu inyi ebi otoko kè Gadi mè ebi otoko kè Ruben ibe, “Ìre enyi ekiweek ibabia me ere keyi me mgbọ ebi ngwan̄ kinyi ebekisi itim akọn̄ ni?

⁷Keke orọ enyi ekiweek itatap uwọ-lek me emen ebi Ijeren, inyi ema ekayaka ìkọt ìraka ìfo inyọn̄ ijọn̄ Okumugwem osabe inyi ema?

⁸Ikeyi si ke ebi nte nte kinyi erọ mgbọ nriabe ema inan̄a me Kades Bania ibe esi ekpọ-nu ike ijọn̄ ya okupbe.

⁹Ema ejeje isi ire iteke ijọn̄ Esikon, mè ibene chieen̄ imun̄ inyọn̄ ijọn̄ ya isan̄a, mè initap uwọ-lek me emen ebi Ijeren, inyi ema ekayaka ìkọt ìnin̄ inyọn̄ ijọn̄ ya eyi Okumugwem onyibe ema isan̄a.

¹⁰Okumugwem onanaan̄ ejit uyok uyok, mè inyan̄a ibot ibe,

¹¹‘Mije ema kpegọọk emi me otutuuk ejit kiban̄, me etete otutuuk kiban̄ ìnanan̄a me Ijipiti isibi, bene me lek ebi akọp acha iba fo inyọn̄, kpunu ene geege ikeyi òbosa chieen̄ kan̄ irieen̄ me lek ijọn̄ ya eyi nchieekbe use, mè inyan̄a ibot igbaalek, ibe ke mâsa inyi ebi nte nte kinyi Ebereyam, mè Ajiki, mè Jekọp.

¹²Kpunu ene geege me etete kiban̄ òbosa chieen̄ imun̄ ijọn̄ ya, ilọ me lek Kelep gwun̄ kè Jefune ogwu Kenaji, melek Josuwa gwun̄ kè Nun, mije, ebibi gaalek esa ejit ge igọọk Okumugwem.’

¹³Sa me ikeya, Okumugwem onanaan̄ ejit uyok uyok me lek ebi Ijeren, mè irọ inyi ema enyinya ekana emen èwê otuuk kè akọp acha ini, mege ire lek otutuuk ukot ebi ìrọrọ nlilọ inu ya me isi Okumugwem ekwaan̄be ita kpai, ene geege ìkayaka ìsik.

¹⁴“Mgbọ keyi, enyi mîkpọk ibene si, enyi bọn owot ebi ijo ife kechi! Enyi ebenirọ si chieen̄ inu yaage ebi nte kinyi erọbe, mè isa me ikeya itap ukan̄ isọkọ me lek uyok uyok unaan̄-ejit Okumugwem owuukbe lek inaan̄ me lek ebi Ijeren.

¹⁵Ire enyi itele igọgọọk Okumugwem, ọmọ môkpọk ijit otutuuk ebi Ijeren itele me emen èwê, inyi ekwaan̄ eta. Mkpa otutuuk ife chi mônenitoon̄ enyi me ibot.”

¹⁶Ema ejeje inu me lek kè Mosis, mè initumu inyi ibe, “Eji mêgwugwuun̄ uwu anam inyi anam kiji, mè inama ama ile inyi nsabọn kiji,

¹⁷inyi nsabọn kiji eluk me emen ama ile cha òkaan̄ mgban akọn̄, mè ebi ofifi ido ìluk me agan̄ yi ekasisaak ema. Ire, eji me lek kiji mênenibem lek akọn̄, mè ije me isi isa otutuuk ebi Ijeren ije mege ema mêrebe ere kiban̄.

¹⁸Eji kpebegwu ikom ika inu uwu me ama kiji, mege ire mgbọ otutuuk ebi Ijeren mêbọkọbe ìrot kiban̄ iso.

¹⁹Eji kpebebọkọ ìrot geege melek kiban̄ me usaba agan̄ okwaan̄ Jodan, mije, eji mîwuuk lek ibọkọ ìrot eyi kiji me usaba agan̄ Jodan agan̄ mbum-ura.”

²⁰Mosis onenifọọk ema ibe, “Ire enyi irọ ike enyi etumube, mè iteen̄ nroon̄ akọn̄ kinyi ikwaan̄, mè ibem lek ititim akọn̄ me isi Okumugwem,

²¹mè ebi akọn̄ kinyi inijibi akọn̄ isaba okwaan̄ Jodan igọọk me ida Okumugwem, mè itim akọn̄ mege ire mgbọ Okumugwem môtimbe ikpan̄ ebi ochicha kan̄, mè irieen̄ ife cha isan̄a me isi kan̄,

²²mè imun̄ ibe ke otutuuk ijọn̄ ya ìyaka inikup me irak ubọk Okumugwem, sabum enyi mêtolek inigwu ikom, mgbọ ya ke enyi mênwọnọ me ubọk Okumugwem, mè inwọnọ si awọ ebi Ijeren. Mgbọ ya, inyọn̄ ijọn̄ yi mônenire ìrot kinyi me isi Okumugwem.

²³“Ire, ire enyi kperọ otu ikọ kinyi iso, enyi mîrọ Okumugwem ijo inu. Mgbọ ya, ìriọọn̄ ibe ke ijo inu kinyi ìkpolọlọ iweweek enyi imun̄.

²⁴Ìchili owuwa ama ile ìnyi nsabọn kinyi, mè ìnama si owuwa uwu anam ìnyi anam kinyi. Ire, inu ya enyi esabe otu kinyi ichieek me use, ìmun̄ ibe ke enyi mîrọ iso.”

²⁵Ebi otoko kè Gadi mè ebi otoko kè Ruben efọfọọk Mosis ibe, “Eji ebi usun̄ kwun̄ mêrọ ike owu ogwu nte kiji otumube.

²⁶Nsabọn kiji mè ebi nwa kiji mè eriembuuk kiji mè otutuuk anam kiji mêkup me ama ile cha òkup me Giliadi.

²⁷Ire, eji ebi usun̄ kwun̄ geelek ìkwakwaan̄ nroon̄ akọn̄ me lek mêsaba okwaan̄ Jodan isi itim akọn̄ inyi Okumugwem ike owu ogwu nte kiji otumube.”

²⁸Mosis oneninyi Elieja ogwu ngwugwa mè Josuwa gwun̄ kè Nun melek otutuuk ebi ibot otoko geelek me Ijeren ida ofolek kiban̄ ibe,

²⁹“Ire otutuuk ebi otoko kè Gadi mè ebi otoko kè Ruben ebi ìkwakwaan̄ nroon̄ akọn̄ me lek igọọk enyi isaba okwaan̄ Jodan isi itim akọn̄ inyi Okumugwem, mè ire enyi itim akọn̄ ibọkọ otutuuk inyọn̄ ijọn̄ cha òkup enyi me isi isan̄a, ìkana otutuuk ijọn̄ Giliadi ìnyi ema kubọk ìrot kiban̄.

³⁰Ire, ire ema kpekwaan̄ nroon̄ akọn̄ kiban̄, mè igọọk enyi isaba okwaan̄ Jodan, ìrot kiban̄ ìbokup me etete kinyi me ido Kenan, ìkpoyaka ire me Giliadi.”

³¹Ebi otoko kè Gadi mè ebi otoko kè Ruben efọfọọk ibe, “Inu geelek Okumugwem otumube inyi eji ebi usun̄ kwun̄, eya ke eji eberọ.

³²Eji mêkwaan̄ nroon̄ akọn̄ kiji me lek, mè isa igọọk ije isaba okwaan̄ Jodan isi ido Kenan kubọk ebi udun̄ akọn̄ Okumugwem. Ire, ìrot kiji ìbokup me usaba okwaan̄ Jodan agan̄ keyi.”

³³Mosis onenisa otutuuk ijọn̄ ido kè Siyon ogwu ubọọn̄ ebi Amọ, mè otutuuk ijọn̄ ido kè Ôgu ogwu ubọọn̄ ebi Basan, igbaalek otutuuk ijọn̄ kiban̄ melek ama ile kiban̄, mè asabọn ama geelek òkup ikana okike ijọn̄ kiban̄, ikana inyi ebi otoko kè Gadi mè ebi otoko kè Ruben mè okpọkọ me lek ebi otoko kè Manasi, gwun̄ kè Josefu, kubọk ìrot eyi kiban̄.

³⁴Ebi otoko kè Gadi enenikpọk inama ama Dibọn, mè Atarot, mè Aroweri,

³⁵mè Atirot Sofan, mè Jajeri, mè Jogibeya,

³⁶mè Bet Nimira, mè Bet Aran, echi òrere ama mgban akọn̄, mè inama si uwu anam inyi anam kiban̄.

³⁷Ebi otoko kè Ruben enenikpọk inama ama Esibon, mè Eliale, mè Kiriatayim,

³⁸mè Nebo, mè Baali-Meyon (enwenwene erieen̄ ama kechi), mè Sibima. Ebi otoko kè Ruben mînyi ama geelek ema ekpọkbe inama aya erieen̄.

³⁹Ebi owot iman kè Makiri gwun̄ kè Manasi, esisi itim akọn̄ me lek ebi ama Giliadi, mè ibọkọ ama ya, mè irieen̄ ebi Amọ, ìrere ebikaan̄ ama ya isibi.

⁴⁰Mosis onenisa Giliadi inyi ebi owot iman kè Makiri gwun̄ kè Manasi. Ema eluluk ibia me ama ya.

⁴¹Jairi, ogwu owot iman kè Manasi ge, onenisi itim akọn̄ ibọkọ asabọn ama kiban̄ cha, mè inyi ama cha erieen̄, Asabọn Ama kè Jairi.

⁴²Noba onenisi itim akọn̄ ibọkọ ama Kenat mè asabọn ama òkukup ikana, mè isa isan̄a lek kan̄, mè iyaka inikigwen Noba.