Read obolo Ifuk 36 Bible Online

Ifuk 36 - obolo bible

Ifuk 36

¹Ebi ibot owot iman kè Giliadi gwun̄ kè Makiri gwun̄ kè Manasi, ìrere ebi otoko kè Josefu, eneninu me isi kè Mosis, mè isi ebi ibot otutuuk ebi Ijeren,

²mè initumu inyi ema ibe, “Mgbọ Okumugwem onyibe owu, ogwu nte kiji, ida ibe owu òroon̄ nriroon̄ òsa òdọmọ ijọn̄ ònyi otutuuk ebi Ijeren me ìrot, înyi si owu ida ibe owu òyaka ìrot eyi ogwu ngwan̄ kiji Jelofeyadi òsa ònyi ebi bọn ebibaan̄.

³Mgbọ yi, ire ebi Ijeren ìnan̄a me ofifi otoko inu inido ema me lek nwa, ema mênenisa ìrot kiban̄ eyi ònanan̄a me lek ìrot otoko kiji ifon isi itap isọkọ me lek eyi otoko ebi olom. Sa me ikeya, ìrot kiji eyi eroon̄be nriroon̄ isa idọmọ inyi otoko kiji mônenifieek inan̄a me ubọk kiji ichep inin̄ ubọk ebi ofifi otoko.

⁴Mgbọ acha ijọk utelelek ebi Ijeren isinire, mênenisa ìrot kiban̄ isi isọkọ me lek eyi ebi otoko ere edobe ema isa ifo. Sa me ikeya, ìrot kiban̄, eyi òrere ìrot otoko ebi nte nte kiji, mônenikana ichep inyi eji ire mgbọ geelek.”

⁵Mosis oneninyi ebi Ijeren ida, igọọk me ida Okumugwem, ibe, “Ikọ ebi owot iman otoko kè Josefu ekitumu înen.

⁶Okumugwem ìnyi bọn ebibaan̄ kè Jelofeyadi ida ibe ke ema mêkọt ibat ebirieen̄ geelek ìneme ema. Gaalek, ema emun̄ ibe ke ebirieen̄ cha ìre ebi otoko nte kiban̄.

⁷Ìrot ebi Ijeren geege ìkponan̄a me otoko ge inin̄ ofifi otoko. Ìrot otoko geelek ìbobia me otoko keya. Ogwu Ijeren geelek ìbokaan̄ ìrot me otoko ebi nte nte kan̄.

⁸Eya orọ, ogwu enenwaan̄ geelek òbọbọkọ ìrot me otoko ebi Ijeren ìbobat olom ònan̄a me otoko kè nte kan̄, inyi ìrot ebi otoko geelek me Ijeren ibia me otoko yaage, mè ikasaba ìfo ofifi otoko.

⁹Ìrot geege ìkponan̄a me otoko ge isaba inin̄ ofifi otoko, mije, uche ogwu Ijeren geelek ìkup me lek ìrot otoko ebi nte nte kan̄.”

¹⁰Ike Okumugwem onyibe Mosis ida ibe bọn ebibaan̄ kè Jelofeyadi erọ, ikeya si ke ema erọ.

¹¹Mala, mè Tirija, mè Ogula, mè Milika mè Nuwa, ìrere bọn ebibaan̄ kè Jelofeyadi, ekaan̄ si olom me otoko nte kiban̄. Ema ebat bọn ebirieen̄ ebi ngwan̄ nte kiban̄.

¹²Ebirieen̄ ebi ìdodo ema enan̄a me owot iman kè Manasi gwun̄ kè Josefu. Sa me ikeya, ìrot kiban̄ cha obabia me otoko nte kiban̄.

¹³Echichi ore ikan mè ikọ echi Okumugwem otọbe, echi înyibe ebi Ijeren inan̄a me ubọk kè Mosis mgbọ ebi Ijeren ekupbe me òla ijọn̄ ido Mowabu me usaba agan̄ okwaan̄ Jodan, me ere òkibene isi ikpọ Jeriko.