Read obolo Ifuk 4 Bible Online

Ifuk 4 - obolo bible

Ifuk 4

¹Okumugwem onenitumu inyi Mosis mè Erọn ibe,

²“Ìfuk otu ifuk ebi uwu kè Koyat me otoko kè Libai, ìfuk otu ifuk kiban̄ me owot iman me owot iman, me ototun̄ ukan̄ me ototun̄ ukan̄.

³Ìfuk ebirieen̄ bene me lek ebi akọp acha ita re lek ebi akọp acha go, òrere ebi ìsoso irọrọ ikwaan̄ me Atanga Chinichini.

⁴“Ikwaan̄ ebi owot iman kè Koyat me Atanga Chinichini ìre ikpọkpọ chieen̄ me lek inu echi òkup mbuban ichit.

⁵Mgbọ geelek ebi Ijeren ebejibi ije inan̄a me ere ge isi ofifi ere, îre Erọn mè ebi bọn ebirieen̄ ebekinin̄ emen Atanga Chinichini ya isi ikpọk ekwut mgban ya isan̄a, mè isa ikana ichit okop ata-ikọ[3] ya,

⁶mè inisa si ikpa ima ikana ichit, mè inisa ekwut oluku oluku iwele itoon̄ me inyọn̄, mè inikpulu si ogbugboon̄ kan̄ cha itap igbaalek.

⁷“Ema mêsa si ekwut oluku oluku iwele ichit inyọn̄ ikasi Fituru Isi Awaji, mè inikpulu si alala cha òje me lek mè nkọm mè ugọn̄ mè ekpen̄ ekisa igwook miin̄ ngwugwa itoon̄ me inyọn̄ ekwut oluku oluku ya. Fituru òkikup mgbọ geelek me inyọn̄ ikasi ya môkup si me inyọn̄ ikasi ya.

⁸Mênenisa ekwut eje eje iwele itoon̄ me inyọn̄ nroon̄ ikwaan̄ cha, mè inisa ikpa ima iwele ikana ichit otutuuk cha, mè ikpulu si ogbugboon̄ kan̄ itap igbaalek.

⁹“Ema mêsa si ekwut oluku oluku iwele ichit ngugọọn̄ mkpukan̄ ya òkinyi utoon̄ melek otitọn̄ kan̄ cha mè sisini ekisa ikpaan̄ ekwut mkpukan̄ mè okwa ntọn̄ kan̄ cha mè ekpen̄ ekisa itap aran̄ mkpukan̄ kan̄ cha.

¹⁰Mênenisa ikpa ima ikana otutuuk cha ikat, mè iben itoon̄ me inyọn̄ ogbugboon̄.

¹¹“Mêsa ekwut oluku oluku ikana ichit ntook ngwugwa ya eyi esabe alata araran̄ irọ, mè inisa ikpa ima ichit itoon̄ me inyọn̄, mè itap si ogbugboon̄ cha òje me lek igbaalek.

¹²“Mêtiten̄e otutuuk nroon̄ echi ekisa isi ikwaan̄ me Ere Mbuban ititiin̄, mè inisa ekwut oluku oluku ikat, mè inisa ikpa ima ikana ichit, mè iben itoon̄ me inyọn̄ ogbugboon̄.

¹³“Mêchan ntọn̄ isan̄a me inyọn̄ ntook ngwugwa, mè inisa ekwut irio irio ikana ichit,

¹⁴mè inititen̄e otutuuk nroon̄ ekisa isi ikwaan̄ me inyọn̄ ntook ya, òrere ebi kè alala ekisa ilọbọ ukan̄, mè ochichim, mè òcha ekisa ichibi ntọn̄, mè ewop inyan eje. Mênenisa ikpa ima ikana ichit otutuuk, mè itap si ogbugboon̄ echi ekisa iben ntook ya igbaalek.

¹⁵“Erọn mè ebi bọn ebirieen̄ isichit inu cha òkup mbuban mè otutuuk nroon̄ cha ekisa isi ikwaan̄ me lek inu òkup mbuban cha isan̄a, mè ebi Ijeren isibenijibi ije, mgbọ ya ke ebi owot iman kè Koyat ebenu iniben inu cha isa ije. Ire, ema kpebechak ubọk me lek inu cha òkup mbuban, inyi ema ekakwaan̄. Echichi ore inu ebi owot iman kè Koyat ebekiben me lek nroon̄ Atanga Chinichini.

¹⁶“Elieja gwun̄ kè Erọn ogwu ngwugwa obokikpọ chieen̄ me lek aran̄ mkpukan̄, mè nsensi utop olu, mè ngwugwa akpa ekigwa usen geelek, mè aran̄ mbuban. Ọmọ obokikpọ chieen̄ me lek otutuuk Akpatan̄ Mbuban melek otutuuk inu òkup mbuban òkikup me emen kan̄, mè otutuuk nroon̄ geelek ekisa isi ikwaan̄ me emen kan̄.”

¹⁷Okumugwem onenitumu inyi Mosis mè Erọn ibe,

¹⁸“Ikatele ibe ebi owot iman kè Koyat echak ubọk me lek inu òkup mbuban, mè ekwaan̄ esan̄a me etete ebi otoko kè Libai.

¹⁹Inu enyi eberọ inyi ema, inyi ema ekup me ugwem, mè ekakwaan̄ me mgbọ ema mêjebe igbet lek inu òkup mbuban ichit cha ìre ikeyi: Erọn mè ebi bọn ebirieen̄ mênu inidọmọ ikwaan̄ itap ema me ubọk me ene me ene, kpa ogwu mè ikwaan̄ kan̄. Ikeya si ke mêdọmọ inu ema ebekiben, kpa ogwu mè eyi kan̄.

²⁰Ire, ema kpebenin̄ isi ikpọ mgbọ ekichit inu òkup mbuban cha. Ire ema isi, mêkwaan̄.”

²¹Okumugwem onenitumu inyi Mosis ibe,

²²“Fuk otu ifuk ebi uwu kè Gasiọn me owot iman me owot iman, me ototun̄ ukan̄ me ototun̄ ukan̄.

²³Fuk ebirieen̄ kiban̄ bene me lek ebi akọp acha ita re lek ebi akọp acha go, òrere ebi ìsoso irọrọ ikwaan̄ me Atanga Chinichini.

²⁴“Ikwaan̄ ebi owot iman kè Gasiọn ebekisi mè inu ema ebekiben ìre ikeyi:

²⁵Mgbọ geelek ebi Ijeren ebejibi ije, îre ema ebekiben ekwut ukwek ekisa igbaka ichit lek Akpatan̄ Mbuban ya, mè iben si Atanga Chinichini, mè ochichit kan̄, mè ochichit ikpa ima eyi ekisa iwele ichit inyọn̄ kan̄, mè ikiben si ekwut isotu Atanga Chinichini.

²⁶Îre ema si ebekiben otutuuk ekwut ukwek ekisa igbaka ikana oyet egep Atanga Chinichini ya melek ntook ngwugwa ya, mè ekwut isotu otunchit oyet egep ya, mè otutuuk olik òje me lek kiban̄, mè otutuuk nroon̄ ikwaan̄ kiban̄. Îre ema si ke otutuuk ikwaan̄ ofolek inu chi geelek okup inyi irọrọ.

²⁷“Îre Erọn mè ebi bọn ebekikpọ chieen̄ me lek otutuuk inu geelek ebi owot iman kè Gasiọn ebekirọ, ibene me lek ikwaan̄ kiban̄ ire lek inu ema ebekiben. Îre Erọn mè ebi bọn ebekidọmọ ikwaan̄ mè inu ebeben inyi ema. Enyi mêkidọmọ inu ema ebeben itap ema me ubọk, mè imun̄ ibe ke ema mîrọ si ikeya.

²⁸Eyi ore otutuuk ikwaan̄ òkup inyi ebi owot iman kè Gasiọn me Atanga Chinichini. Îre Itama, gwun̄ kè Erọn ogwu ngwugwa, obokikpọ chieen̄ me lek kiban̄, mè ikidọmọ ikwaan̄ inyi ema.

²⁹“Ìfuk otu ifuk ebi uwu kè Merari me owot iman me owot iman, me ototun̄ ukan̄ me ototun̄ ukan̄.

³⁰Ìfuk otutuuk ebirieen̄ bene me lek ebi akọp acha ita re lek ebi akọp acha go, òrere ebi ìsoso isisi ikwaan̄ me Atanga Chinichini.

³¹Ikwaan̄ òkup inyi ema isisi me emen Atanga Chinichini ìre ibeben otutuuk agbasi Akpatan̄ Mbuban mè mgbugban òje me lek mè atà kiban̄ mè urak atà cha,

³²mè atà ekisa iwak ikana oyet egep Atanga Chinichini okokop, mè urak atà cha, mè okpọ̀kọ kiban̄, mè olik òje me lek, mè otutuuk nroon̄ ikwaan̄ Atanga Chinichini. Ema si eberọ otutuuk ikwaan̄ geelek òje me lek inu chi. Enyi mêdọmọ inu geelek ene geelek oboben inyi ema me erieen̄ ene me erieen̄ ene.

³³Echi ore ikwaan̄ òkup inyi ebi owot iman kè Merari me lek Atanga Chinichini. Itama gwun̄ kè Erọn ogwu ngwugwa ore ogwu ibot kiban̄, ogwu òbokidọmọ ikwaan̄ chi geelek inyi ema.”

³⁴Mosis mè Erọn mè otutuuk ebi ibot ido ebi Ijeren enenifuk otu ifuk ene me uwu kè Koyat me owot iman me owot iman, me ototun̄ ukan̄ me ototun̄ ukan̄.

³⁵Ema efuk otu ifuk ebirieen̄ kiban̄ ibene me lek ebi akọp acha ita ire lek ebi akọp acha go, òrere ebi ìsoso isisi ikwaan̄ me Atanga Chinichini.

³⁶Otu ifuk kiban̄ me ototun̄ ukan̄ me ototun̄ ukan̄ onenisibi obop iba, mè efit jaaba, mè akọp go.

³⁷Eyi ore otu ifuk ebirieen̄ ebi ototun̄ ukan̄ kè Koyat ebi ìkisi ikwaan̄ me Atanga Chinichini, ike Erọn ofukbe igọọk me ike Okumugwem onyibe Mosis ida ibe efuk.

³⁸Mîfuk si ebi uwu kè Gasiọn me owot iman me owot iman, me ototun̄ ukan̄ me ototun̄ ukan̄.

³⁹Efuk otu ifuk ebirieen̄ kiban̄ ibene me lek ebi akọp acha ita ire lek ebi akọp acha go, òrere ebi ìsoso isisi ikwaan̄ me Atanga Chinichini.

⁴⁰Otu ifuk kiban̄ me owot iman me owot iman, me ototun̄ ukan̄ me ototun̄ ukan̄ onenisibi obop iba, mè efit gweregwen, mè akọp ita.

⁴¹Eyi ore otu ifuk ebi uwu kè Gasiọn ebi ìkisi ikwaan̄ me Atanga Chinichini, ike Mosis mè Erọn efukbe igọọk me ike Okumugwem onyibe ida.

⁴²Mîfuk si ebi uwu kè Merari me owot iman me owot iman, me ototun̄ ukan̄ me ototun̄ ukan̄.

⁴³Efuk otu ifuk ebirieen̄ kiban̄ ibene me lek ebi akọp acha ita ire lek ebi akọp acha go, òrere ebi ìsoso isisi ikwaan̄ me Atanga Chinichini.

⁴⁴Otu ifuk kiban̄ me owot iman me owot iman, me ototun̄ ukan̄ me ototun̄ ukan̄ onenisibi òbọp ita, me efit iba.

⁴⁵Eyi ore otu ifuk ebi uwu kè Merari ike Mosis mè Erọn efukbe igọọk me ike Okumugwem onyibe ida.

⁴⁶Sa me ikeyi ke Mosis mè Erọn mè otutuuk ebi ibot ido ebi Ijeren efuk otu ifuk otutuuk ebi otoko kè Libai me owot iman me owot iman, me ototun̄ ukan̄ me ototun̄ ukan̄.

⁴⁷Efuk otu ifuk ebirieen̄ kiban̄ ibene me lek ebi akọp acha ita ire lek ebi akọp acha go, òrere ebi ìsoso isisi ikwaan̄ me Atanga Chinichini.

⁴⁸Otutuuk otu ifuk kiban̄ onenisibi obop jeeta, mè efit go mè akọp jeeta.

⁴⁹Mosis onenidọmọ ikwaan̄ kiban̄ inyi ema me ene me ene, mè idọmọ si inu ema ebekiben me ene me ene mgbọ geelek ebi Ijeren isijibi ije inan̄a me ere ge isi ofifi ere, igọọk me ike Okumugwem onyibe ọmọ ida. Sa me ikeya ke efuk ebi otoko kè Libai ike Okumugwem onyibe Mosis ida ibe efuk.