Read obolo Ifuk 5 Bible Online

Ifuk 5 - obolo bible

Ifuk 5

¹Okumugwem onenitumu inyi Mosis ibe,

²“Nyi ebi Ijeren ida ibe, ene geelek òkifiak orukan̄ inyakpa, mè ìre ogwu nke nke inu okisibi me lek, mè ìre ogwu òchachak ubọk me lek nkwukwu ene mè ichaka mbuban me lek kan̄, esasan̄a ogwu òkup ikeya esibi me m̀gba-ǹgwele ukan̄ ere otutuuk ene ekiluk.

³Ene geelek òkup ikeya, mè ìre enerieen̄ mè ìre enenwaan̄, ìsan̄a ìsibi me m̀gba-ǹgwele ukan̄ ere ebi ene elukbe, inyi ikachaka mbuban me lek ere m̀gba-ǹgwele ukan̄ kinyi, ere emi Okumugwem nlukbe me etete kinyi.”

⁴Ebi Ijeren enenisan̄a ebi ìkup ikecha isibi me emen ere m̀gba-ǹgwele ukan̄ kiban̄ isi igwook me udun̄ ama ike Okumugwem otumube inyi Mosis.

⁵Okumugwem onenitumu inyi Mosis ibe

⁶itumu inyi ebi Ijeren ibe, “Ire enerieen̄ mè ìre enenwaan̄ irọ ogwu melek kan̄ ijo inu geelek, mè isa me ikeya irọ Okumugwem ilọ, ogwu òrọrọ inu ya îrọn̄ ikan.

⁷Ene ya môtumu ijo kan̄ isibi, mè iyaka inen̄e inu îrọbe ilọ ya isun̄ itat melek ogwu îrọbe ilọ. Ire ene ya ìfefeen̄ ogwu melek kan̄, môyaka inu ya ijet ogwukaan̄, mè isọkọ si irek ge me irek go me lek inyi ogwukaan̄ ya.

⁸Ire, ire ogwu efeen̄be ya ikwu, mè ìkakaan̄ ene geege ogwu môkọtbe irie ìrot kan̄, useen̄ inu ya ìkup inyi Okumugwem. Ogwu òfefeen̄ ene ya môkpe useen̄ inu ya inyi ogwu ngwugwa, mè inyi si orie arọọn̄ ge igbaalek, inyi esa erọ esuuk me ibot kan̄.

⁹Otutuuk inyinyi òkup mbuban geelek echi ebi Ijeren esabe inu me isi ogwu ngwugwa, ìbokup inyi ogwu ngwugwa ya.

¹⁰Inyinyi òkup mbuban geelek ene osun̄be inyi lek kan̄ ìkup inyi ene ya. Ire, eyi geelek îsabe ijet ogwu ngwugwa ìre eyi ogwu ngwugwa ya.”

¹¹Okumugwem onenitumu inyi Mosis ibe

¹²inyi otutuuk ebi Ijeren ida ibe, “Enerieen̄ geelek ogwu ogwu nwa osibe ene,

¹³sa me isisi igọọk ofifi enerieen̄ ilaak, mè ilet ijo ugwem ya me lek ogwu olom, filafila ya îfifilabe lek kan̄ si olelet, mije ikakaan̄ge ogwu ata-ikọ geege òbokọt initumu ikeme ọmọ, mè ikakaan̄ge si ogwu òtetet ema me inyọn̄ mkpilaak,

¹⁴ire ogwu enerieen̄ ya ikaan̄ ejit mba me lek ogwu nwa, mè itoon̄ ogwu nwa uraamọn, mè ìre ogwu nwa ìchachaka mbuban ya me atikọ, mè ìre ìkachaka,

¹⁵ogwu enerieen̄ ya môsa ogwu nwa inu me isi ogwu ngwugwa. Môsa iko akpa balì ekọkọk iba inu, inyi mêsabe igwa ngwugwa akpa me ibot ogwu enenwaan̄ ya. Akpa ekọkọk ya, kpebetap aran̄ mè farankinsens me lek, mije, îre ngwugwa eyi ejit mba ke îre. Ngwugwa akpa keyi ìre ngwugwa ikekeek eyi esabe ikeek awọ òje me lek ijo inu ya.

¹⁶“Ogwu ngwugwa mônenisa ogwu enenwaan̄ ya inu me isi Okumugwem, inyi inikeke me ere ya.

¹⁷Ogwu ngwugwa môneniben mun̄ mbuban me emen otin̄ ibat, mè inichibi mfuun̄ me ijọn̄ me emen Akpatan̄ Mbuban itap me emen mun̄ ya.

¹⁸Ogwu ngwugwa môneniyiyala ogwu enenwaan̄ ya ijeek me ibot me ere ya îkekebe me isi Okumugwem, mè iniben akpa ekọkọk ya eyi ebesa igwa ngwugwa ikekeek ya, òrere ngwugwa mba-ejit, itap ogwu enenwaan̄ ya me ubọk. Ogwu ngwugwa me lek kan̄ môneniben mun̄ ya esabe mfuun̄ igbaan̄ ifuku, òrere mun̄ ujat ugwem, eyi òbosa ufieek-otu inu, ikaan̄ me ubọk kan̄.

¹⁹Ogwu ngwugwa ya mônenirọ inyi ogwu enenwaan̄ ya inyan̄a ibot, mè initap awọ itoon̄ me ibot ogwu enenwaan̄ ya ibe, ‘Karake owu okupbe me ubọk nlom kwun̄, ire ofifi enerieen̄ ìkagọọk owu ìlaak, ire owu òkafiat lek kwun̄ melek ofifi enerieen̄, mun̄ ujat ugwem yi eyi òkisa ufieek-otu inu irọ inyi owu ònwọnọ.

²⁰Ire, ire owu otele nlom kwun̄, mè isi ofifi enerieen̄, mè ifiat lek kwun̄ melek ogwu ikarege nlom kwun̄,

²¹Okumugwem irọ inyi agbagba ukot kwun̄ ijọ mè ijeen̄, mè irọ si inyi owot kwun̄ ifuuk itọm ibene, mè isa me ikeya irọ inyi owu òkana inu ebi kinyi ebekisa ifieek otu inyi ene, mè inu ema ebekisa inyan̄a ibot.’ Mgbọ ogwu ngwugwa môkitap awọ yi, môrọ inyi ogwu enenwaan̄ ya inyan̄a ibot eyi òbosa ufieek-otu inu.

²²Ogwu ngwugwa môtutumu si ibe, ‘Kè mun̄ yi, eyi òkisa ufieek-otu inu inin̄ emen nkat kwun̄, mè irọ inyi owot kwun̄ ifuuk itọm ibene, mè irọ inyi agbagba ukot kwun̄ ijọ mè ijeen̄.’ Me mgbọ ogwu ngwugwa môkitap awọ ya, ogwu enenwaan̄ ya môkekichieek ibe, ‘Iin̄. Ikup ikeya.’

²³“Ogwu ngwugwa mônenige otutuuk ikọ ufieek-otu cha itap me ikpa, mè inigwọk ikọ cha igwook me emen mun̄ ujat ugwem ya,

²⁴mè iniben mun̄ ujat ugwem eyi òbosa ufieek-otu inu ya inyi ogwu enenwaan̄ ya inwọ. Mun̄ ya môneniraka inin̄ emen ogwu enenwaan̄ ya, inyi ikaan̄ irek itap ọmọ ujat ujaralek me lek.

²⁵Ogwu ngwugwa mônenibọkọ akpa ekọkọk ya, eyi ebesa inigwa ngwugwa mije mba-ejit ya, mè iniwuwum me isi Okumugwem, mè inisa inu me lek ntook ngwugwa,

²⁶mè inigwọ ubọk ge me lek akpa ekọkọk ya, kubọk okpọkọ emen akpan, isa itoon̄ me inyọn̄ ntook ya, mè iwọp ikana oduku òkibubaan̄ olu me inyọn̄ ntook ya. Mgbọ eya isiraka, môneniben mun̄ ujat ugwem ya inyi ogwu enenwaan̄ ya, ibe inwọ.

²⁷Ogwu enenwaan̄ ya môneninwọ mun̄ ya. Ire ogwu enenwaan̄ ya ifiat lek kan̄, mè irọ ogwu olom ilọ, mgbọ mun̄ ya înwọbe môrakabe inin̄ ọmọ emen owot, ìbotatap ọmọ ujat ujaralek me lek. Owot kan̄ môfufuuk itọm ibene, agbagba ukot kan̄ môjọjọ mè ijeen̄. Ogwu enenwaan̄ ya mônenikana inu ekisa ifieek otu inyi ene me etete ebi kiban̄.

²⁸Ire, ire ogwu enenwaan̄ ya ìkafiat lek kan̄, mè ire ìkachaka mbuban, awọ geege ìkpotet ọmọ. Ọmọ mônin̄ owot, mè imaan̄ bọn.

²⁹“Eyi ore ikan mba-ejit, eyi ebekisa iriọọn̄ atikọ mgbọ enenwaan̄ otelebe ogwu olom, mè isi ifiat lek kan̄, mè ichaka mbuban,

³⁰mè ìre mgbọ enerieen̄ okaan̄be ejit mba me lek ogwu nwa, mè itoon̄ uraamọn. Ogwu ngwugwa môsa ogwu enenwaan̄ ya inu, inyi inikeke me isi Okumugwem, mè inirọ otutuuk inu òkup me emen ikan yi itoon̄ me ibot ogwu enenwaan̄ ya ike edọmọbe.

³¹Me emen otutuuk inu chi, kpunu ikan geege òtetet ogwu olom. Ogwu enenwaan̄ ya gaalek obobeme osusut ijo inu kan̄.”