Read obolo Maika 1 Bible Online

Maika 1 - obolo bible

Maika 1

¹Eyi ìre etip Okumugwem ònunu inyi Maika ogwu Moreset, òfo me lek Sameria mè Jeruselem, me ukot mgbọ Jotam mè Ayaji mè Ejikaya erebe ubọọn̄ me Juda. Okumugwem ìjeen̄ Maika inu chi me ilaak ọkpọchieen̄.

²Otutuuk kinyi, ebi ife geelek, ìnọ, linyọn̄ mè inu geelek òkup me emen, ìgban̄, Ogwukaan̄-ene Okumugwem môkeke ata-ikọ ikeme enyi, ìbokup me Uwu Mbuban kan̄ itumu ikọ ikeme enyi.

³Ìkpọ! Okumugwem òkinan̄a me ere îlukbe inu; isinan̄a isibi inu, mônije me ere òbebene me linyọn̄.

⁴Ebi kè ogoon̄ mêtọk ita me irak ukot kan̄ kubọk mgbe otọk ita me lek ukan̄; ebi kè iteke ijọn̄ mêtọọn̄ ibak kubọk mun̄ okinan̄a me ere òbebene ikigbuk igwook me ere òsisiki.

⁵Otutuuk inu chi ìborọ mije nrọ-nlọ bọn kè Jekọp, mè mije ijo inu ebi uwu kè Ijeren. Ìre ekene otap nrọ-nlọ me lek ebi kè Jekọp? Ìre ìkare ebi Sameria? Ìre ere owa ore isi-ijọn̄ ebi Juda? Ìre ìkare Jeruselem?

⁶“Emi mârọ Sameria ikana okpurukpu ǹrioon̄ me emen oron, ere ebekiwop uko gerep. Mâkpukpọt ewuuk uwu kiban̄ igwook me emen iteke, mè isan̄a ewuuk ọdọ irak ijọn̄ uwu kiban̄ isibi.

⁷Otutuuk mkpọmfaka kiban̄ cha, mêsulu ikpukpuku; otutuuk mkpukpe cha ema ebọkọbe me lek barabat kiban̄ cha, mêwọp itaka iriọk me ukan̄. Otutuuk mkpọmfaka kiban̄ cha, mâjijaka isan̄a, mije, îre mkpukpe òje oyet ke esa ikaan̄ ema, eya orọ, mkpukpe òje oyet si ke ema ebeyaka ikana.”

⁸Mije keyi, mâto ito mè ifieek ejit; mâsa ukpọk ukot mè njak ije ikana ere. Mâtaan̄ ukpo ito ito kubọk ibo oron afa, mè ifieek ejit kubọk wukuwuku.

⁹Mije, kpebekọt igwa unan ebi Sameria ita; unan ya îre si lek ebi Juda. Înire si otunchit ebi n̄a, me Jeruselem me lek kan̄.

¹⁰Ikakpa inu yi me Gat, ikatoto si ito. Enyi ebi Bet Leyafera, ìfufuku lek me ntọn̄.

¹¹Enyi ebi ìluk me Safiri, ìsa esip me isi ìje njak njak ìraka. Ebi ìluk me Sayanan, kpebenan̄a isibi itap isi. Ebi Bet Eseli ekup me ito, ema kpebeyaka ikọt itap ubọk inyi enyi.

¹²Ebi ìluk me Marot ekikpọ chieen̄ ibe ema mêkaan̄ ata inu, ire, mfufiat oyaka ininan̄a me ubọk Okumugwem inire otunchit Jeruselem.

¹³Enyi ebi ìluk me Lakis, ìbọp ebi kè inyinya ìtele me lek uji akọn̄. Îre enyi edasi irọ ijo inu me ama Sayọn, mije, îre enyi ekigọọk ebi Ijeren irọ nrọ-nlọ ema erọbe.

¹⁴Eya orọ, enyi mêbe ebi Moreset Gat eriọọn̄ ubọk eje, mè ititiin̄ akpan uwu olom inyi ema. Ebi ama Akijip mêkana ebi ofiaan̄ inyi ebi ubọọn̄ ebi Ijeren.

¹⁵Enyi ebi ìluk me Maresa, mâria ogwu òbotim akọn̄ ikpan̄ enyi inu. Ogwu òrere umin ebi Ijeren mônu me Adulam.

¹⁶Ìkwọkọ ijeek me ibot ìfieek ejit, mije bọn kinyi ebi mgbọ ìkibele enyi ejit cha; ìkwọkọ ibot kinyi ìrọt kubọk ibot edene, mije, mêkpulu ema me akọn̄ isan̄a me lek kinyi.