Read obolo Maika 2 Bible Online

Maika 2 - obolo bible

Maika 2

¹Môfieek inyi ebi ìkitọt ijo inu, ebi ìkikup me inyọn̄ mkpilaak kiban̄ ikitọt ijo inu! Agan̄ egwe, ema mîra irọ inu ya ema etọtbe, mije, ema mîkaan̄ unye isasa irọ.

²Ema ekikaan̄ chieen̄ ile me lek ijọn̄ ene, mè ètet ebọkọ me unye, mè èkaan̄ si chieen̄ ile me lek uwu ene, mè ètet ebọkọ me agam. Ema ekifeen̄ ogwu òkaan̄ uwu ibọkọ uwu kan̄; mè èfeen̄ ene ebọkọ ìrot kan̄.

³Eya orọ Okumugwem ìtumu ibe ikeyi: “Emi gwa ǹkitọt ijo inu ibak ebi ototun̄ ukan̄ yi, eyi enyi kpebekọt isan̄a ibot kinyi isan̄a me emen. Enyi kpebeyaka ikọt ikije ugumulek ugumulek, mije, mgbọ ya ìbore mgbọ ùrioon̄.

⁴Me usen ya, ebilene mêrọk enyi me urọk, mè ikọt okwa ito isa ikichak enyi ochak ibe: ‘Jei, eyi kiji îta, mîjijaka eji isan̄a kpai! Mînwunween̄ ìrot ebi kiji, ìrot kiji înan̄a eji me ubọk! Okumugwem îbọkọ eji ijọn̄ kiji, mè isa iche inyi ebi ìkpulu eji me akọn̄.’ ”

⁵Eya orọ, enyi kpebeyaka ikaan̄ ene me etete ebi eyi Okumugwem, ogwu òboroon̄ nriroon̄ isa iche ijọn̄ inyi enyi.

⁶Ebi ene ekitumu ibe, “Ikayaka ìtumu ikọ kecha. Ikayaka ìtumu ikọ òfo me lek inu kecha; inu esip cha geege ìkporọ eji.”

⁷Ebi uwu kè Jekọp, ǹdo enyi nu: “Ìre enyi mêkọt itumu ojelek ikọ òkup ikeya? Ìre ukarajit Okumugwem ìgbigbidim ni? Ìre ọmọ ìkekirọ ojelek inu kecha ni? Ìre ikọ n̄a ìkarọ nnwọn ìnyi ebi ìkiluk ugwem òtatat ni?

⁸Egwe inen keyi, enyi ebi n̄a mînan̄a ikeke ikana ebi ochicha. Ebi ikike ìkije iraka, kpekeek ibe ke inu geege môrọ, enyi mîra itet unye otu ewe ofọnti kiban̄ iwọọk isan̄a ema me lek, mè itele ema ukpọk lek, kubọk ebi ìnan̄a me akọn̄ ika.

⁹Enyi mîlilaba ibaan̄ ebi n̄a isan̄a me uwu kiban̄ cha ema ekiluk inọ utop. Enyi mîbọkọ ugbana n̄a isan̄a me ubọk bọn kiban̄ ire mgbọ geelek.

¹⁰Ìnan̄a ìkeke, ìje ìfon! Ìkare ere isiki-efuuk kinyi ire eyi, mije, mbuban îchaka me lek ere yi, îfiat ita, îjijaka isan̄a kpai.

¹¹Ire ogwu nriran ataak inu inifiaan̄ itumu ibe, ‘Mâben nriran miin̄ mè miin̄ ukan̄ inyi enyi,’ ogwugwa obore ogwu nriran òtatat ife chi me lek.

¹²“Enyi bọn kè Jekọp, mâgbaan̄ otutuuk kinyi ititiin̄; mâkpulu ebi ìsisik me lek ebi Ijeren igbaan̄ ititiin̄. Mâgbaan̄ ema isun̄ me ere ge kubọk ekisun̄ arọọn̄ me uwu arọọn̄, mâsun̄ ema kubọk arọọn̄ òkup me ijọn̄ urie; ebilene mêyaka ikpọk iwa ijot lek ijọn̄ kinyi.

¹³Ogwu òbonichili oniin̄ môje me isi kiban̄, ema mêbum otunchit inan̄a isibi. Ogwu ubọọn̄ kiban̄ obokije me isi kiban̄; sà Okumugwem obokisa ema ijeen̄ oniin̄.”