Read obolo Maika 3 Bible Online

Maika 3 - obolo bible

Maika 3

¹Emi nnenitumu ibe, “Ìgban̄ utọn̄, enyi ebi ibot me owot iman kè Jekọp, enyi ebi mkpulu uwu kè Ijeren. Ìre ìkare enyi ere ebi ìgbegbe ibe eriọọn̄ unen oyerebet ni?

²Enyi kechi ebi ìchacha ata inu, mè ima ijo inu; enyi kechi ebi ìkinyiaan̄ ebi n̄a akpa isan̄a me lek, mè ikijene ufuk isan̄a me lek ukwuuk kiban̄.

³Enyi ekitaka ufuk ebi n̄a, mè ikitaba akpa kiban̄ inyiaan̄, mè ikifaan̄ ukwuuk kiban̄ ikpukpuku; enyi ekisọp ema kubọk anam ebetap me otin̄, kubọk ufuk anam ebekala me otin̄ ikala-inu.”

⁴Mgbọ ya, ema mêtaan̄ ukpo igwen Okumugwem, ire, ìkpofọọk ema otu. Mgbọ ya, ọmọ môlet isi kan̄ isan̄a me lek kiban̄, mije ijo inu ema erọbe.

⁵Okumugwem ìtumu ibe ikeyi: “Ire me lek ebi nriran cha ìsasa ebi n̄a ije ilọ oniin̄, ebi ene isinyi ema inorie erie, mîra itaan̄ ukpo ibe, ‘Esuuk.’ Ire kpetap ema inu me otu, mîra ito akọn̄ me lek ene.

⁶Eya orọ, eririeen̄ mônu inyi enyi, ilaak ọkpọchieen̄, enyi kpebeyaka imun̄; udun mônin̄ inyi enyi, enyi kpebekọt itumu inu òborọ mgbọ ònu me isi. Ura mônim me lek ebi nriran, egwe môdun me lek kiban̄.

⁷Esip môtet ebi ìkimun̄ ilaak ọkpọchieen̄, ochak môchak ebi ìkitumu inu òborọ mgbọ ònu me isi. Ema mêyaka ubọk ichit isi, mije, Awaji ìkafọọk ema otu.”

⁸Ire emi, nkaan̄ unye òjot òjot, mè ikaan̄ si Ekwukwu Okumugwem, mè unen oyerebet, melek unye-lek, itutumu nrọ-nlọ ebi owot iman kè Jekọp inyi ebi owot iman kè Jekọp, mè itutumu ijo inu ebi uwu kè Ijeren inyi ebi uwu kè Ijeren.

⁹Enyi ebi ibot me uwu kè Jekọp, ìgban̄ ikọ keyi, enyi ebi mkpulu me uwu kè Ijeren, ebi ìkpọkpọ unen oyerebet isiki chieen̄, mè ikinwunwunu inu geelek òtatat;

¹⁰ebi ìbesa eje ene inama ama Sayọn, mè isa inu ikpak inama ama Jeruselem.

¹¹Ebi ibot kiban̄ ekibọbọkọ ikpoko udun̄, sabum esibi oyerebet; ebi ngwugwa ekitutumu ewe, sabum ekijeen̄ inu; ebi nriran ekitumu inu òborọ me mgbọ òkup me isi isa ikibọkọ ikpoko. Ire, ema ebieen̄ lek me lek Okumugwem, mè ikibe, “Me atikọ, Okumugwem òwa me etete kiji, mfufiat geege ìkpore eji lek.”

¹²Eya orọ, bak me lek kinyi, mêbak Sayọn kubọk ekibak ijọn̄ uko; Jeruselem môkana èdọ mkpukpuku ewuuk, ogoon̄ Uwu Mbuban môkana okpurukpu oron otibibe ichit.