Read obolo Maika 5 Bible Online

Maika 5 - obolo bible

Maika 5

¹Jei enyi ebi ama urum akọn̄, ìtitiin̄ ebi urum akọn̄ kinyi, mije, mîkpa mbin akọn̄ ikana eji. Mêsa mkpat isulu ogwu ibot mkpulu ebi Ijeren me agba otu.

²“Ire, owu, Beteleyem Efarata, ubọk geelek owu orebe sọntiik ama me etete otoko ebi Juda, ogwu òbokikpulu ebi Ijeren ìbonan̄a me emen kwun̄ isibi inyi emi; ogwu mkpulu ya, owot iman kiban̄ ìbene me ukot ikaan̄, ìbene me karake akat.”

³Eya orọ, mêkpọ ebi Ijeren ilọ chieen̄, mege ire mgbọ ogwu enenwaan̄ uman okifiak mômanbe gwun̄; mgbọ ya, ebi ngwan̄ kan̄ kechilọ cha ìsisik, mêkika inu inigọọk ebi Ijeren igbaan̄ ikup.

⁴Ọmọ mônenikeke ikikpukpo urum arọọn̄ kan̄ sa me unye eyi Okumugwem, mè sa me mgbugbo eyi erieen̄ Okumugwem Awaji kan̄. Ema mêneniluk me utelelek, mije, bene me mgbọ yi, umin kan̄ mônenire okputut linyọn̄ geelek.

⁵Ọmọ mônenirọ esuuk ikup. Ire ebi Asiria ijibi akọn̄ inu me lek ijọn̄ kiji, mè ijak ukot me inyọn̄ mgban kiji ije itibi, eji mêsan̄a ebi òkpukpo arọọn̄ jaaba, mè ebi ibot mkpulu jeeta isa isibi ikweek ema.

⁶Ema mêsa oge akọn̄ ikikpulu ido Asiria, mè iraka inin̄ otunchit ijọn̄ ido kè Nimirọdu.[1] Ọmọ mônyan̄a eji me ubọk ebi Asiria, mgbọ ebi Asiria isisa akọn̄ inu me ijọn̄ kiji, mè ije isaba iraka inin̄ me okike lek ijọn̄ kiji.

⁷Ebi uwu kè Jekọp ebi mêsikbe mêkup me etete ebi owuwa ife, kubọk mbat Okumugwem oriabe inu, kubọk senesene ibot me inyọn̄ mbubet, eyi ìkakikup ìkpọ ene geege, ìkakikeke ìban ogwu ebilene.

⁸Ebi uwu kè Jekọp ebi mêsikbe, ebi mêkupbe me etete ebi ofifi ido, me etete ebi owuwa ife, mênye lek kubọk egbe àtat òkup me etete anam oron, kubọk gwun̄ egbe àtat òkup me etete urum arọọn̄, eyi òkichim anam mgbọ îkije iraka, mè ikọọk ikam, kpunu ogwu òkikọt ibọkọ isan̄a me ubọk.

⁹Ubọk kinyi môbene igak eyi ebi ochicha kinyi, enyi mêjijaka otutuuk ebi oriara kinyi isan̄a.

¹⁰Okumugwem ìtumu ibe, “Me usen ya, emi mâkpan̄ inyinya kinyi isan̄a me etete kinyi, mè igwak uji akọn̄ kinyi isan̄a.

¹¹Mâgwak ama isan̄a me lek ijọn̄ kinyi, mè igbugbọ otutuuk uwu mgban akọn̄ kinyi isan̄a.

¹²Mâjijaka ifit ibọk isan̄a me etete kinyi, inyi enyi ekayaka ìkaan̄ ebi ìdo inu.

¹³Mâjijaka mkpọmfaka kinyi cha, melek ewuuk mfaka kinyi cha isan̄a me etete kinyi; enyi kpebeyaka ikpọk ikitọbọ ebum inyi inu ubọk kinyi orọbe.

¹⁴Mâjijim uti yọk Asera kinyi cha, mè igbugbọ ama kinyi cha igwook.

¹⁵Ebi ido cha ebi kpegban̄ utọn̄ inyi emi, m̀basa me uyok uyok unaan̄-ejit n̄a irọ ema useen̄ me lek.”