Read obolo Maika 7 Bible Online

Maika 7 - obolo bible

Maika 7

¹Chei, eyi n̄a îta! Emi ǹkup kubọk ogwu ògbeme mfut me mgbọ ura, mgbọ ekirọọn̄ inu òsisik me uko gerep; kubọk njọ gerep ge ikeyi irerie, ìkakup, aya otu figi cha òkilọk emi, kpunu.

²Ebi ìgbegbe utoon̄-ejit mîta me ido, ene ge ikeyi òkirọ inu òtatat, ìkasik. Otutuuk ene ekilileek ikpọ eje ene ifafiat, ogwu ikup, ìkitip ufe ikpọ ogwu ngwan̄.

³Ubọk iba kiban̄ îriọọn̄ chieen̄ ijo inu, ogwu ibot mkpulu ìkido ibe eche uche enyi ọmọ; ogwu ibot oyerebet ìkibọbọkọ ikpoko udun̄, ebi ilile ekitọ ikọ òneneme ema, ikeya ke ema ekigbaan̄ itaka otọt.

⁴Ogwu òrere ata ene ichit me etete kiban̄ ìbet lek abọm egbe, ogwu òtatat ichit ìkup nwununwununwunu kubọk ogọ esabe ukpak iwak. Usen ebi mbem kinyi etumube ya, òrere usen Awaji obosulu enyi osusut ya, îre. Mgbọ keyi ore mgbọ wọlọwọlọ kiban̄.

⁵Katoon̄ ejit me lek ogwu melek kwun̄, kabieen̄ ejit me lek unene; ìrere nwa kwun̄ ogwu melek kwun̄ ekatbe ilaak, kachiin̄ otu ìnyi.

⁶Mije, gwun̄ enerieen̄ ìkpolibi ogwu ute, gwun̄ enenwaan̄ môje ikeme ogwu uga, nwa gwun̄ môrọ ikeme ogwu uga-olom, ebi ochicha ene mêre ebi uwu ene ya.

⁷Eyi n̄a, ǹtoon̄ ejit ikup ikikpọ Okumugwem, ǹkup ikikpọ Awaji ogwu unyan̄a n̄a; Awaji n̄a mônọ emi ida.

⁸Ogwu ochicha n̄a, kabele-nu ejit! Ubọk geelek nnan̄abe irọn̄, mânan̄a ikeke; ubọk geelek nkupbe me emen udun, Okumugwem ore utoon̄ n̄a.

⁹Mije nrọbe Okumugwem ijo inu, mâsa lek n̄a ibeme unaan̄-ejit kan̄, mege ire mgbọ ọmọ môtumube ikọ ibot n̄a, mè inyi emi unen n̄a. Okumugwem môsan̄a emi me udun itap me utoon̄, mânenimun̄ ata irọrọ kan̄.

¹⁰Mgbọ ya, ogwu ochicha n̄a môsa chieen̄ imun̄, esip môtetet ọmọ. Ogwu òkido emi otu ibe, “Mọmọ Okumugwem Awaji kwun̄ ya?” Emi mâsa chieen̄ n̄a imun̄ ọmọ onan̄abe irọn̄; ikerere mgbọ keyi, mêkijak ọmọ me ukot, kubọk ìre ogbọ me eden̄ oniin̄.

¹¹Usen òkinu mgbọ mêkpọkbe inama mgban ama kinyi, usen mêchakbe okike ijọn̄ kinyi iwele.

¹²Usen ya, ebi kinyi mêka inu me lek kinyi; ema ebenan̄a me Asiria mè ama ido ebi Ijipiti ika inu, bene me Ijipiti si re okwaan̄ Yuferetis, mè bene me okwaan̄ ile re lek okwaan̄ ile, mè bene me ogoon̄ re lek ogoon̄.

¹³Linyọn̄ môkana ukpọk ukpọk, mije inu ikpak ebi ìluk me lek kan̄ erọbe.

¹⁴Sa mkpat kwun̄ kpulu ebi kwun̄, urum arọọn̄ ya òre ìrot kwun̄, eyi òluk me ejit oron ọmọ gaalek, me lek ata ijọn̄ mbubet me Kamen. Tele mè ema ebọm urie me Basan mè Giliadi, kubọk mgbọ ukot ikaan̄.

¹⁵“Emi mâjeen̄ ema uyeke uyeke inu n̄a cha, kubọk njeen̄be me mgbọ ya enyi enan̄abe me Ijipiti isibi.”

¹⁶Ebi ofifi ido mêmun̄ lek, esip môtetet ema, mije, unye kiban̄ îta. Ema mêsasa ubọk ichit otu kiban̄, utọn̄ kiban̄ môgogon igọm.

¹⁷Ema mêrie achiaan̄ kubọk ijijinu, kubọk inu òkinyinyọnọ me ijọn̄. Ema ebekiraran inan̄a me udọn̄ kiban̄ ikisibi; mêsa me ufieek-owot inu me lek Okumugwem Awaji kiji, mè itet ukpook me lek kwun̄.

¹⁸Kpunu ofifi Awaji òbet lek kwun̄, ogwu òkifuk ijo ichep, mè ikitele nrọ-nlọ inyi ebi ìrot kan̄ ìsisik. Owu òkakinaan̄ ejit ìre mgbọ geelek, ire, ikakaan̄ nsan, eya okitop owu me lek.

¹⁹Owu môyaka ikpọk ito eji njijin, mè ijak ijo kiji itap me ibat, mè itọọn̄ nlilọ inu kiji ifiin̄ me ugwuuk okwaan̄.

²⁰Owu môrọ atikọ kwun̄ iso me lek kè Jekọp, mè ijeen̄ Ebereyam ata ejit kwun̄, kubọk onyan̄abe ibot inyi ebi nte nte kiji karake ukot ikaan̄.