Read obolo Nawum 1 Bible Online

Nawum 1 - obolo bible

Nawum 1

¹Eyi ìre nriran ofolek Ninife, ikpa ilaak ọkpọchieen̄ eyi Nawum ogwu Elikos omun̄be.

²Okumugwem ìre Awaji mba-ejit mè Awaji òkirọ useen̄; Okumugwem ìre ogwu òkirọ ene useen̄ inu, mè ogwu òkinaan̄ ejit uyok uyok. Okumugwem ìkirọrọ ebi ochicha kan̄ useen̄; uyok uyok unaan̄-ejit kan̄ me lek ebi oriara kan̄ ìkakita.

³Okumugwem ìkakigwat lek ìnaan̄ ejit, ire, îkaan̄ ikpele unye; Okumugwem ìkpotele isusulu ebi oyerebet otipbe osusut. Ọmọ ìkije me emen ogbolodom mè emen egwijo; oduku inyọn̄ ore ntọn̄ òkigen̄ me ukot kan̄.

⁴Ọmọ okigana ikọ inyi okwaan̄ ile, mè irọ ibe ichat; ọmọ okirọ okwaan̄ geelek ikana nchat ijọn̄. Ọmọ okirọ uja mbubet ijọn̄ Basan mè echi inyọn̄ ogoon̄ Kamen ikwaan̄ isan̄a, mè ikirọ ajakajak oron Lebanọn igen̄ ita.

⁵Ebi kè ogoon̄ imun̄ ọmọ, esisik; ebi kè orioon̄ imun̄ ọmọ, ètọk èta. Me isi kan̄, linyọn̄ ìkiraran, lek ijọn̄ mè inu geelek òkup me emen kan̄, ubọk yaage si.

⁶Ekene obokọt ikeke ida uga unaan̄-ejit kan̄? Sà ìre ekene obokọt ibeme uyok uyok unaan̄-ejit kan̄? Unaan̄-ejit kan̄ ìre ukan̄ òkiseseme, kpekiteek; ewuuk ìkiraraan̄ ibak me isi kan̄.

⁷Okumugwem minwọn, ọmọ ìre ere ilet-lek me mgbọ ufialek. Ebi ìtap ibot me lek kan̄, ìkakisan̄a chieen̄ me lek.

⁸Ire, ìbosa unye ukot mun̄ ile òkigbugbuku ijijaka ebi oriara kan̄[1] isan̄a ire òta. Ire me lek ebi ochicha kan̄, ìbolililaba ema isi itap me emen udun.

⁹Keke ke enyi etọt ikeme Okumugwem? Ìbojijijaka otutuuk isan̄a; uyọrọlek ìkakinu ìnyi ọmọ ìso mgbọ iba.

¹⁰Ebi ochicha kan̄ ebenwaan̄ ikam, kubọk ekup me emen ukpak òtotobo igon, mè ikigbugbe kubọk ebi miin̄ osabe idek; ema ebetataka iriọk kubọk nchat mfurufu.

¹¹Ninife, emen kwun̄ ke ene ge otibi isibi, inikitọt ijo ntọt ikeme Okumugwem, mè ikinyi ikpak ikpak nteme.

¹²Okumugwem ìtumu ibe ikeyi: “Ubọk geelek ebi Asiria esobe ifuk, mè iwa, emi mâchon ema igwook, inyi ema ejijaka eta kpai. Enyi ebi n̄a, ubọk geelek ibe ke nnyi enyi osusut, m̀kpayaka ikpọk inyi enyi osusut ofifi.

¹³Mgbọ yi, mâfaan̄ ọgbọn kiban̄ isan̄a me ebek kinyi, mè isọp mkpọn kinyi isan̄a.”

¹⁴Okumugwem înyi ida ofolek ebi Asiria ibe, “Gwun̄ geege ìkpokup ichieek erieen̄ kinyi. Mâjijaka mkpọmfaka cha, echi ekọkọ mè echi etọtọkọ, òkup me emen uwu yọk kinyi cha isan̄a. Mârọkọ udọn̄-ufuun̄ kinyi isun̄ iban enyi, mije, enyi mîfieek enenen.”

¹⁵Ìkpọ me inyọn̄ ogoon̄, ene ge òkisa ata etip ilibi inu, ìkilook etip eyi esuuk! Enyi ebi Juda, ìrie ijọk kinyi cha, mè irọ use enyi echieekbe ìso. Mije, ebi ikpak cha kpebeyaka ikpọk inu enyi akọn̄ me lek ofifi, mîra ijijaka ema isan̄a kpai.