Read obolo Nawum 2 Bible Online

Nawum 2 - obolo bible

Nawum 2

¹Ogwu mfufiat òkinu enyi akọn̄ me lek. Ìbem mgban kinyi; ìkpọ chieen̄ me lek oniin̄ kinyi; ìtobo agama ìnye me ebon, mè ìbem lek akọn̄ enenen!

²Mije, Okumugwem môyaka ikpọk inyi Jekọp òrirọ kan̄, kubọk òrirọ Ijeren okaan̄be; ubọk geelek ebi mfufiat ekpukpukube ema igwook, mè ijijaka olik gerep kiban̄ isan̄a.

³Agbọ ebi akọn̄ kiban̄ ìre araran̄; ofọnti ebi akọn̄ kiban̄ ìre eje eje. Okwukwut lek uji akọn̄ kiban̄ ìkimumumen me usen esan̄abe ema igwook isasa isi akọn̄; ukot otunwa kiban̄ esabe uti siperes irọ ìkiwuwuwum mgbọ ema ekije.

⁴Uji akọn̄ kiban̄ ìkije me lek oniin̄ furum furum furum, ije inyi isi, oje onyi udun̄, me lek uwele oniin̄ cha. Ema ebet lek alọm ukan̄ ekiwuwuwum, mè ikikebe ikana kubọk omumen inyọn̄.

⁵Mînyi ebi usọ akọn̄ kiban̄ ida, ema ekekikwaak irurọn̄ọ me oniin̄. Ema elibi ekot ekot isi lek mgban ama ya; okwukwut ekisa igbugbọ mgban îwuuk lek ikukup me irek kan̄.

⁶Otunchit echi agan̄ isi okwaan̄, mîgwak ibook, uwu ogwu ubọọn̄ îgbugbọ igwook.

⁷Mîtet nwa ogwu ubọọn̄ me akọn̄ isa ije; ebi usun̄ kan̄ ebibaan̄ ekekitaan̄ ito kubọk ekerekwukwu, mè ikisulu ubọk me otu ejit kiban̄.

⁸Ninife ìbet lek òkpuku mun̄ òkup karake ukot ukot; ire, ebi kan̄ ekup kubọk mun̄ okilibi ichiaak me emen kan̄. Ekekitaan̄ ukpo ibe, “Ìkeke ma! Ìyaka ìkeke!” Ire, ene ge ikeyi ìkagwu ìkom.

⁹Ìfum alata okuket! Ìfum alata araran̄! Inu ubọọn̄ ama Ninife ìkakaan̄ okputut; inu unye otu ewe kan̄ ìwawa gboi.

¹⁰Mîkwọkọ Ninife irak; mîfum ọmọ inọọn̄, mè igwak ọmọ ibook! Ejit kiban̄ îrọn̄ utọọk, akpatukot kiban̄ îgbaan̄ ikwak; lek kiban̄ ìkiraran, isi kiban̄ îjoon̄.

¹¹Mọmọ okpot egbe àtat cha mgbọ keyi, ere egbe àtat okinyi bọn kiban̄ urie, ere orie melek uman egbe àtat ekije inin̄, ere kpunube inu òkifieek bọn egbe àtat owot?

¹²Egbe àtat îchim anam òboso bọn kan̄, mè igwak anam iche inyi ogwu uman kan̄. Îtaak anam îchimbe ijot udọn̄ kan̄, mè itaak ufuk anam îgwakbe ijot okpot kan̄.

¹³Okumugwem Ogwukaan̄ Inyọn̄ mè Ijọn̄ onenitumu ibe, “Kpọ, emi ìre ochicha kwun̄. Emi mâwọp uji akọn̄ kwun̄ cha ibumu oduku; oge akọn̄ mônin̄ ebek asasa egbe àtat kwun̄ chi. Kpunu anam geege me linyọn̄ owu oboyaka ichim ikpan̄ ofifi; kpebeyaka ikpọk inọ ida ebi ikwaan̄ kwun̄ ofifi.”