Read obolo Nawum 3 Bible Online

Nawum 3 - obolo bible

Nawum 3

¹Môfieek inyi ama eje ene onin̄be chieen̄, ama ataak ojotbe, ama inu efumbe me akọn̄ ogakbe emen, ere mkpan̄-ene ìkakinan!

²Ida njijan̄ òkitaan̄, okput ekpirikpo uji akọn̄ òkikput, ida ukot inyinya òkisisik ijọn̄, ebi kè uji akọn̄ mêkigbugbọ iraka!

³Ebi akọn̄ inyọn̄ inyinya mêkijibi akọn̄ inin̄, oge akọn̄ òkimumen, otunwa òkikebe! Ebi ekpaan̄be mîtutumọ ijot, nkwukwu ene îtiik ibene; kpekọt ifuk otu ifuk nkwukwu ene; ebi ene ekije itọbọ ukot me lek nkwukwu ene ilọ irọn̄.

⁴Otutuuk inu chi ìnan̄a me ibot Ninife, enenwaan̄ òje oyet ya, ogwu ijeje oyet ìkakijot, ogwu òkisa uja kan̄ ileke ene; ogwu ibot yọk ofia, òkisa ijeje oyet kan̄ ilep ido geelek, mè ikisa ifit ibọk kan̄ ilep ebi ife geelek.

⁵Okumugwem Ogwukaan̄ Inyọn̄ mè Ijọn̄ onenitumu ibe, “Kpọ, emi ìre ochicha kwun̄; mâchiaan̄ ekwut ebon kwun̄ ibene ikana ichit owu me isi; mâsa njak kwun̄ ijeen̄ ebi ido geelek, mè isa esip itet owu me isi ebi ife geelek.

⁶Mâtọọn̄ njijọ inu iken iso owu lek; mâkpọ owu chieen̄ isiki, mè isa owu irọ inu ochak me isi ebi ene.

⁷Ebi imun̄ owu, ebelilim inan̄a, mè ikibe, ‘Ninife îkana ǹrioon̄! Jei, ekene obofieek ejit inyi ọmọ?’ Owa ke mbasi iweek ebi ukarajit inyi owu?”

⁸Ìre owu onye lek igak ama Tebes, òkup me lek okwaan̄ Nali, eyi mun̄ okanabe okokop? Okwaan̄ ke îsa ikwek lek, mè isa mun̄ irọ mgban ikana lek kan̄.

⁹Etiopia mè Ijipiti ere unye kan̄ eyi kpunube ojelek; Put mè Libiya me lek ebi ìkibieen̄ ọmọ udun̄.

¹⁰Ire, mîkpulu ebi Tebes agam agam ije, mè isa ema isi igwook me ofifi ido. Mîtọọn̄ asasa nsabọn kiban̄ ikpọk isan me lek ugwaka oniin̄ geelek; mîroon̄ nriroon̄ me ibot ebi isi ene kiban̄, mè itaak ebi ilile kiban̄ mkpọn.

¹¹Ninife, owu si, ìbosasa owu kubọk miin̄; owu môkekiweek ere obolet lek, mè ere obotap ibot, inyi ogwu ochicha ikamun̄ owu.

¹²Otutuuk mgban akọn̄ kwun̄ ìkup kubọk uti figi òkaan̄ adasi mfut òreren̄e; isisisik uti cha, mfut cha îra ikirurọn̄ọ inin̄ emen otu ogwu òkirerie.

¹³Kpọ, ebi akọn̄ kinyi ìkup me etete kinyi, ewọ idek kubọk ebibaan̄. Otutuuk otunchit ido kinyi, ìlaak òbook inyi ebi ochicha kinyi; okwukwut esabe igban isaba otunchit cha, inyi inye, ukan̄ îtaka iriọk isan̄a kpai.

¹⁴Ìchibi mun̄ ìsun̄ ìban mbin akọn̄ òkinu, ìnama mgban akọn̄ kinyi ìnye! Ìrọkọ arika, mè ifuku ikana abọt, mè ìnen̄e inu ekisa ibot okpungwu ìsun̄!

¹⁵Ere ya ke ukan̄ obotaka enyi ikọọk, oge akọn̄ môsọsọp enyi igwook; ebi ochicha mêtaka enyi igwak kubọk akaka otaka mfut uko igwak. Ìmumana ìwa kubọk akaka, mè ìwa kubọk urum akaka ituuk!

¹⁶Enyi mîrọ ebi mbit kinyi ewa enenen, ema mîwa igak ntoronyan̄ me akpa isinyọn̄. Ema mîtaka inu isan̄a me inyọn̄ ijọn̄ kinyi kubọk akaka ituuk, mè iwulu ifon.

¹⁷Ebi ìkikpulu enyi ekup kubọk akaka ituuk; ebi ibot kinyi ebet lek urum akaka ituuk ònisusọn me agba uwu me usen ere otọọkbe, ire, ura isisisibi, ema mîra iwulu inan̄a, ene geege ìkakiriọọn̄ agan̄ enin̄be.

¹⁸Jei, ogwu ubọọn̄ Asiria, ebi ibot mkpulu kwun̄ mîlilam ita; ebi ilile kwun̄ mîkwaan̄ ibia me achiaan̄. Ebi kwun̄ mîyiyala ichit inyọn̄ ogoon̄; kpunu ogwu òbotitiin̄ ema.

¹⁹Kpunu inu ebesa igwa unan òsasak owu me lek; unan kwun̄ ìre eyi mkpa. Ene geelek ònọnọ inu ofolek kwun̄, ìkikwakwak ubọk ibe owu onan̄a irọn̄. Mije, ìre ekene ke inu ikpak okirọ mgbọ geelek ìkare lek?