Read obolo Abak 1 Bible Online

Abak 1 - obolo bible

Abak 1

¹Eyi ìre nriran eyi Abakuk ogwu nriran omun̄be me ilaak ọkpọchieen̄.

²Jei Okumugwem, mgbọ owa ke mâtaan̄ ukpo ntap-ubọk ire, ire, owu òkagban̄ utọn̄ me lek? Ntaan̄ ukpo ibe ke inu afa òkirọ, ire, òkaninyan̄a eji ìsibi.

³Keke orọ orọbe ibe emi ǹsa chieen̄ m̀mun̄ inu ikpak? Keke orọ okikpọ nlilọ inu chieen̄ chieen̄? Tukutuku mè afa ore inu nkimun̄; etim mè ibaak ìjojot ere gbak.

⁴Ikan ìkayaka ìkaan̄ unye, unen oyerebet ìkayaka ìkup mgbọ geege. Ogwu ikpak okikat ogwu ata irọrọ itap me akpa. Eya orọ, nlilọ oyerebet nlilọ oyerebet oyaka inikup.

⁵Okumugwem onenifọọk ibe, “Ìbene chieen̄ ìkpọ ebi ido geelek, mè ìmun̄, môke enyi chieen̄, mè ikwu enyi lek. Mije, inu mbarọ me ukot kinyi, ire ikpa inyi enyi, enyi kpebechieek.

⁶Kpọ, emi gwa ǹkijibi ebi Babilọn[1] ibene; ema ìre ebi ikpak, mè ebi ìkirọ nnaan̄, ebi ìkisa akọn̄ ikana otutuuk linyọn̄, mè ikitet uwu ikarege echi kiban̄ ibọkọ me ubọk ebikaan̄.

⁷Ema ìre ebi ekitetet ukpook mè ikifieek owot me lek; ema gaalek ekitọ ikọ inyi lek kiban̄; inu òneme ema ke ema ekirọ.

⁸Inyinya kiban̄ mîgwat ukot ekot igak egbe ntọọk ntọọk lek, mè imiin̄ ukpook me lek igak ibo oron òkisibi me udun ikakwun̄. Ukot inyinya akọn̄ kiban̄ ìkigwugwugwuk me ijọn̄; ebi akọn̄ inyọn̄ inyinya kiban̄ ekinan̄a me ujọn̄ọ ere inu. Ema ekiwulu inu kubọk mkpukpo òmumun̄ anam ìbotaka, mè iwulu isiki mgbọ yaage iniben ifo.

⁹Inu afa ke ema otutuuk eben me ejit ikinu inenirọ; ema etetet isi kiban̄ itat ikinu kubọk efet emen èwê okikwọọk achiaan̄ iwut ije, ema enu inenichiaan̄ utut ene me akọn̄ kubọk achiaan̄ agba awaji isa isi irọ usun̄.

¹⁰Ema ekirọ ebi ubọọn̄ ochak, mè ikichak ebi ibot mkpulu me imọm. Ama enamabe mgban akọn̄ ikana, ema ekichachak ichep; ema ekitọm ntitaak ibene isa inene mgban cha inin̄ ibọkọ ama cha.

¹¹Òta me ubọk, ema mîjibi inan̄a kubọk efet, inin̄ ofifi agan̄. Oyerebet îtip ema, ebi ìsa unye ema ekaan̄be irọ awaji kiban̄.[2]”

¹²Jei Okumugwem, Awaji n̄a mè Ogwu Mbuban n̄a, ìre ìkare bene me karake akat ke owu okup ni? Eji kpebekwaan̄. Jei Okumugwem, owu òto ebi Babilọn ibe enesibi eji oyerebet me ibot; jei Ewuuk Ile, owu òsun̄ ema ibe enenyi eji osusut.

¹³Chieen̄ kwun̄ mikup mbuban, ìkpokọt ikikpọ ijo inu; owu òkpokọt itele ibe mfeen̄ ikpọkpọ ikije inyi isi. Keke orọ okikpọ ebi ofiaan̄ chieen̄ chieen̄? Keke orọ okpọkpọ iriaan̄ ere mgbọ ebi ikpak ekiteen̄ ebi ìrere ebi ata irọrọ igak ema imeen̄?

¹⁴Owu òrom ebilene kubọk irin̄ òkup me okwaan̄; kubọk inu òkinyinyọnọ ikana, eyi ìkakaan̄ ogwu ibot me lek.

¹⁵Ebi ochicha ekisa ukọọk itaba ema, mè ikitet ema me lek njin, mè ikisa njin àkarà ikwọọk ema igba; mè ikinwọọn̄ unwọọn̄, mè ikibele ejit.

¹⁶Eya orọ, ema ekigwa ngwugwa inyi njin kiban̄, mè ikiwọp nsensi inyi njin àkarà kiban̄, mije, njin kiban̄ ke ema esa ikirie utop otu, mè ikirie atalek inorie ònwọnwọn ichit.

¹⁷Ìre ema ebekpọkpọ ikisa njin ikigbala ugbala, mè ikikpaan̄ ebi ido geelek igwook, kpeto nsan ni?