Read obolo Agai 2 Bible Online

Agai 2 - obolo bible

Agai 2

¹Me òso akọp usen iba mè ge me òso onyan̄ jaaba me acha yaage, Okumugwem onenitumu ikọ itibi me otu ogwu nriran Agai ibe,

²“Tumu nyi Jerubaben gwun̄ kè Sialitien ogwu ibot mkpulu Juda, mè Josuwa gwun̄ kè Jeyosadak ogwu òban Awaji, mè otutuuk ebi ene ibe,

³‘Me etete kinyi, ìre ekene osik me lek ebi ìsasa chieen̄ kiban̄ imun̄ uja uwu yi me adasi mgbọ? Ìre enyi emumun̄ mgbọ keyi? Ìre enyi kpemun̄ ibe ke uwu keyi ìkaje ere geege me lek eyi adasi nje?

⁴Ire, me mgbọ keyi, emi Okumugwem, ǹkitumu inyi owu Jerubaben ibe, tet lek nye! Owu Josuwa gwun̄ kè Jeyosadak ogwu òban Awaji, tet lek nye! Enyi otutuuk ebi ene, ǹkibe enyi ìtet lek ìnye, mè ìsi ikwaan̄, mije, emi òwa melek kinyi. Emi Okumugwem Ogwukaan̄ Inyọn̄ mè Ijọn̄ ntumu.

⁵Îre me lek inu yi ke nnyan̄a ibot melek kinyi mgbọ enyi enan̄abe me ido Ijipiti isibi. Mgbọ keyi, Ekwukwu n̄a ọmọ òwa si me etete kinyi. Ikafieek owot!’

⁶“Mije Okumugwem Ogwukaan̄ Inyọn̄ mè Ijọn̄ ìbe ikeyi: ‘Me sọnja mgbọ, mâkpọk isisik inyọn̄ mè ijọn̄, mè isisik si okwaan̄ melek nchat ijọn̄.

⁷Mâsisik otutuuk ido geelek, mênenikpulu otutuuk inu ubọọn̄ echi otutuuk ido geelek isa inu, emi mânenirọ inyi uwu yi ikaan̄ umin òjot òjot. Emi Okumugwem Ogwukaan̄ Inyọn̄ mè Ijọn̄ ntumu.

⁸Alata okuket, emi nkaan̄. Alata araran̄ si, emi nkaan̄. Emi Okumugwem Ogwukaan̄ Inyọn̄ mè Ijọn̄ ntumu.

⁹Umin eyi uwu keyi mômin igak umin eyi uwu eyi oka ya okaan̄be, emi Okumugwem Ogwukaan̄ Inyọn̄ mè Ijọn̄ ntumu. Ofifi kan̄, îre me ere keyi ke mbarọ ibe esuuk ikup. Emi Okumugwem Ogwukaan̄ Inyọn̄ mè Ijọn̄ ntumu.’ ”

¹⁰Me òso akọp usen iba mè ini me òso onyan̄ onaan̄ge me òso acha iba me lek mkpulu kè Dariọs, etip Okumugwem onunu inyi Agai ogwu nriran ibe:

¹¹“Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Do ebi ngwugwa inu Ikan otumube ofolek ikọ keyi:

¹²Ire ene imọnọ anam ngwugwa òkup mbuban ifan̄a otu utọn̄ ofọnti kan̄ itap, otu utọn̄ ofọnti kan̄ ya onenichak me lek fituru, mè ìre usun̄, mè ìre miin̄, mè ìre aran̄, mè ìre me lek ofifi chieen̄ inorie, ìre môrọ inyi inorie ya ikup mbuban?’ ” Ebi ngwugwa cha efọfọọk ibe ke ìkpokọt irọ.

¹³Agai oneniyaka ibe ema, “Ire ogwu òchaka mbuban sa me ichachak ubọk me lek nkwukwu ene inichak ubọk me lek inorie chi geelek, ìre inorie cha môkaan̄ mbuban me lek?” Ebi ngwugwa efọfọọk ibe ke môkaan̄ mbuban me lek.

¹⁴Agai onenibe ema, “Okumugwem ìtumu ibe, ‘Ikeya ke ife chi ekup, ikeya si ke ido yi okup me chieen̄ n̄a. Ikeya ke ubọk irọ-inu kiban̄ geelek okup. Inu geelek ema esabe inu me ere ngwugwa ibesa inigwa ngwugwa inyi emi, otutuuk cha îkaan̄ mbuban me lek.

¹⁵“ ‘Eya orọ, mgbọ keyi, bene me chereyi fo isi, ìkeek-nu ubọk inu okupbe sabum enyi enibebene inama Uwu Mbuban Okumugwem.

¹⁶Me mgbọ ya, ere ekpọbe chieen̄ ibe ke mêkaan̄ akọp otitọ akpa iba, eyaka inikaan̄ akọp gaalek. Ere ekpọbe chieen̄ ibe ke mêchibi akọp otitọ miin̄ go me emen ugọn̄ miin̄, ìbore akọp otitọ iba gaalek ke ebekọt ichibi.

¹⁷Nsulu enyi osusut, mè isa orukan̄ mfut uko echi òkijọ ugwun̄-ijọn̄, mè echi òkitaka inwan̄, mè ibot mgbọlọ inifiat otutuuk ikwaan̄ enyi esibe me uko kinyi isan̄a kpai, ire enyi kpegwu ikom igọọk emi. Emi Okumugwem ntumu.

¹⁸“ ‘Bene me chereyi, òrere òso akọp usen iba mè ini, me òso onyan̄ onaan̄ge me acha keyi, usen enyi etọbọbe ọdọ Uwu Mbuban Okumugwem, nyi isi, ìgwuun̄ chieen̄ ìkikpọ inu òborọ.

¹⁹Ìre îkaan̄ mfut geege òyayaka isik me uwu isun̄-mfut uko? Mege ire mgbọ keyi, olik gerep mè uti figi mè uti pomegaranet mè uti olifu ìkabene ìto-nu mfut geege. Ire, bene me cherekeyi nyi isi, mâgbana enyi.’ ”

²⁰Me òso akọp usen iba mè ini me onyan̄ yaage, etip Okumugwem okpọkpọk inu inyi Agai ogwu nriran òso mgbọ iba ibe ikeyi:

²¹“Tumu nyi Jerubaben ogwu ibot mkpulu Juda ibe ke emi mânisisik akpabin inyọn̄ mè isisik si linyọn̄.

²²Mâgbugbọ ogboon̄ ubọọn̄ igwook, mè ikpukpuku unye mkpulu ebi ido geelek. Mâda uji akọn̄ mè ebi ìkikọkọp igwook me ijọn̄. Ebi ìkikọp me inyọn̄ inyinya mêsa oge kiban̄ itim akọn̄ ikpan̄ ebi ogbo kiban̄, ema agan̄ iba melek inyinya kiban̄ mêrururọn̄ọ, mè ikwaan̄ ibia me ijọn̄.

²³“Me usen ya, mâmọnọ owu Jerubaben gwun̄ kè Sialitien, owu ogwu ikwaan̄ n̄a, mè isa owu irọ mkpọtubọk iman̄ òriọọn̄ n̄a. Mije, îre owu ke ngobo inyi lek n̄a. Emi Okumugwem Ogwukaan̄ Inyọn̄ mè Ijọn̄ ntumu.”