Read obolo Jek 1 Bible Online

Jek 1 - obolo bible

Jek 1

¹Me òso onyan̄ jeeta me òso acha iba me lek mkpulu kè Dariọs ogwu ubọọn̄ Pesia, etip Okumugwem oneninu inyi ogwu nriran Jekaraya gwun̄ kè Berekaya, gwun̄ kè Ido ibe ikeyi:

²“Okumugwem înaan̄ ejit enenen inyi ebi nte nte kinyi.

³Eya orọ, tumu nyi ebi ene ibe: Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ìgwu ìkom ìna me lek n̄a, inyi emi mâgwu ikom inu me lek kinyi. Emi Okumugwem Ogwukaan̄ Inyọn̄ mè Ijọn̄ ntumu.’

⁴Ikarọ ike ebi nte nte kinyi erọbe, ebi ebi nriran oka mgbọ elookbe ibe ke Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ìgwu ìkom me ijo oniin̄ enyi ekije, mè ìtele ijo irọrọ enyi ekirọ cha.’ Ire, ema kpegban̄, kpenyinyi emi utọn̄. Emi Okumugwem ntumu.

⁵Mgbọ keyi, ebi nte nte kinyi cha ekup me owa? Sà ebi nriran cha, ìre mêluk isi ire mgbọ geelek ni?

⁶Ikọ n̄a mè ikan n̄a cha, echi emi ntọbe inyi ebi ikwaan̄ n̄a ebi nriran, ìre ìkameen̄ ebi nte nte kinyi cha? Mgbọ ya ke ema etolek inigwu ikom, mè ibe, ‘Okumugwem Ogwukaan̄ Inyọn̄ mè Ijọn̄ îrọ eji ubọk ògbegbe, ike îbenbe me ejit kan̄, ikpọ me lek ijo oniin̄ eji ejebe, mè ijo irọrọ eji erọbe.’ ”

⁷Me òso akọp usen iba mè ini, me òso akọp mè onyan̄ ge, òrere onyan̄ Sebat,[1] me òso acha iba me lek mkpulu kè Dariọs ogwu ubọọn̄, etip Okumugwem onunu inyi ogwu nriran Jekaraya gwun̄ kè Berekaya, gwun̄ kè Ido. Jekaraya onenitumu ibe:

⁸Mmun̄ ilaak ọkpọchieen̄ me eririeen̄. Me emen ilaak ya, mmun̄ enerieen̄ ge òkilibi me inyọn̄ inyinya araran̄, mè inikeke me agbagba uti mitulu me lek iteke ijọn̄ me ere ya. Ofifi inyinya echi araran̄ mè echi abak abak mè echi okuket ekekilibi me udun̄ kan̄, melek ebi ìkikọp.

⁹Emi nnenido ibe, “Ogwukaan̄ n̄a, echichi ìre keke?” Ogwu osat ogwu òkitumu ikọ melek n̄a ofọfọọk ibe, “Mâjeen̄ owu inu inu chi orebe.”

¹⁰Ogwu ene ya òkekeke me agbagba uti mitulu cha onenikikpa ibe, “Ema ìre ebi Okumugwem oriabe ibe ekeje ekana ekekpọ otutuuk linyọn̄.”

¹¹Ema cha enenikitumu inyi ogwu osat Okumugwem ya, ogwu òkekeke me agbagba uti mitulu cha ibe, “Eji mîje ikana ikpọ otutuuk linyọn̄, mè imun̄ ibe ke otutuuk linyọn̄ îkup me utelelek mè esuuk.”

¹²Ogwu osat Okumugwem ya onenibe, “Okumugwem Ogwukaan̄ Inyọn̄ mè Ijọn̄, akọp acha jaaba ire echa owu onaan̄be ejit inyi Jeruselem melek ama ebi Juda. Mgbọ owa ke owu obotet irọrọ ema nsan ikaan̄ ire ni?”

¹³Okumugwem onenitumu ikọ òtotop mè ikọ ukarajit inyi ogwu osat ya òkitumu ikọ melek n̄a.

¹⁴Ogwu osat ya òkitumu ikọ melek n̄a onenibe emi, “Look kana be ikeyi: Okumugwem Ogwukaan̄ Inyọn̄ mè Ijọn̄ ìbe ikeyi: ‘Emi mmin ejit enenen me lek Jeruselem melek ogoon̄ Sayọn.

¹⁵Ire, nnaan̄ ejit enenen me lek ebi ido cha ìkikeek ibe ke ema ekup me utelelek. Mije, mgbọ nnaan̄be ejit sọnja gaalek me lek ebi n̄a, ema ebi ido cha enenitap ubọk ijijaka inu igwook.’

¹⁶“Eya orọ, Okumugwem ìbe ikeyi: ‘Mâsa me nsan igwu ikom inu Jeruselem, mêkpọk inama Uwu Mbuban n̄a òkup me ere ya. Mêtaba si olik itọ-inu isa initọ Jeruselem. Emi Okumugwem Ogwukaan̄ Inyọn̄ mè Ijọn̄ ntumu.’

¹⁷“Look gbaalek si ibe: Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Ama n̄a geelek môyaka ikpọk ibọọn̄ ubọọn̄. Okumugwem môkpọk ikaan̄ ejit nsan me lek Sayọn, mè iyaka ikpọk igobo si Jeruselem inyi lek kan̄.’ ”

¹⁸Nnenibene chieen̄ ikpọ, mè imun̄ iko anam ini.

¹⁹Ndodo ogwu osat ya òkitumu ikọ melek n̄a ibe, “Echichi ìre keke?” Ọmọ ofọfọọk ibe, “Echichi ìre iko anam cha echi òyiyiyala Juda mè Ijeren mè Jeruselem.”

²⁰Okumugwem onenijeen̄ emi ebi usọ ini.

²¹Nnenido ibe, “Ìre ebibi ebenu inirọ keke?” Ifọfọọk ibe, “Echichi ìre iko cha echi òyiyiyala Juda, ire lek, kpunu ene geege òkọkọt ibene isi. Ire, ebi usọ chi enu inenitap ema ukpook me lek, mè ifaan̄ ikọ ebi ofifi ido cha ebi ìbebene iko kiban̄ isa ikiyiyala ido Juda melek ebi ìluk me emen kan̄.”