Read obolo Jek 10 Bible Online

Jek 10 - obolo bible

Jek 10

¹Ìbeek Okumugwem ibe inyi enyi ibot aya otu ura; îre Okumugwem okirọ ibe egwijo iduku, mè uga ibot irep igwook inyi ebilene, mè uti itibi me uko ene geelek.

²Mkpọmfaka ebi ene ekisi lek cha, ìkifafiaan̄ ema; ebi ìkido ido-inu ekimun̄ ataak ataak ilaak ọkpọchieen̄; ema ekibak ataak ataak ibot ilaak; ukarajit ema ekinyi ene ìre ikike. Eya orọ ebi ene ekinyinya ikana isi inin̄ me ufialek, mije, ema kpekaan̄ ogwu òkikpukpo ema kubọk ekikpukpo arọọn̄.

³“Ejit minaan̄ emi me lek ebi òkpukpo arọọn̄; emi mâsulu ebi kè orie ebot cha, òrere ebi mkpulu, osusut. Mije, Okumugwem Ogwukaan̄ Inyọn̄ mè Ijọn̄ môkpọ uwu kè Juda, òrere urum arọọn̄ kan̄, chieen̄ me lek, mè irọ ema ekup egbe egbe kubọk inyinya akọn̄.

⁴Ewuuk atà ibot uwu môje me lek kè Juda isibi, okpọ̀kọ ekisa igọbọ uwu ọfọ môje me lek kan̄ isibi, ogbaan̄ akọn̄ môje me lek kan̄ isibi, ogwu mkpulu geelek môje me lek kan̄ isibi.

⁵Ema mêgbaan̄ ikup kubọk ebi unye me akọn̄, ebi ìkijak ebi ochicha kiban̄ itaak me emen ogbọ me eden̄ oniin̄ me akọn̄. Ema mêtim ikpan̄ ebi akọn̄ inyọn̄ inyinya, mije, Okumugwem ọmọ òwa melek kiban̄.

⁶“Emi mâtap ebi uwu kè Juda unye me lek, mè inyan̄a ebi uwu kè Josefu. Mâsa ema ika, mije, nto ema nsan. Ema mênenikup kubọk emi ǹkajijit ema. Emi nre Okumugwem Awaji kiban̄, eya orọ, mâfọọk otu uriaak kiban̄.

⁷Ebi Iferem mêkup kubọk ebi unye me akọn̄; ema mêbele ejit kubọk enwọ miin̄. Bọn kiban̄ mêmun̄, mè ibele ejit, mè inwọọn̄ unwọọn̄, mije inu Okumugwem orọbe.

⁸Emi mâwut ofi isa igwen ema, mè igbaan̄ ema ititiin̄, mije, nra ifafaka ema isibi isan̄a. Ema mêwa kubọk ema ewuukbe lek iwa.

⁹Ubọk geelek ntọọn̄be ema ikana kubọk mfut me etete ebi ife geelek, ema mêkup me ujọn̄ọ ere cha ikeek emi. Ema mè bọn kiban̄ mêgat ugwem, mè ikika inu.

¹⁰Emi mâsa ema inan̄a me Ijipiti ika, mè ititiin̄ ema me Asiria isa inu. Mâsa ema inigwook me ijọn̄ agan̄ Giliadi mè Lebanọn, ere ya ìkpotata ema lek.

¹¹Ema mêje itibi okwaan̄ ufialek, Okumugwem môkeme unye ekoon̄ isiki me okwaan̄, irem geelek me okwaan̄ Nali môchachiaak ita kpai. Mêkeme ugumulek ebi Asiria isiki ire ijọn̄, mè ibọkọ okuba mkpulu isan̄a me ubọk ebi Ijipiti.

¹²Mâtap ebi n̄a unye Okumugwem me lek, ema mêkekisa me erieen̄ Okumugwem ikije isi ere geelek. Emi Okumugwem ntumu.”