Read obolo Jek 11 Bible Online

Jek 11 - obolo bible

Jek 11

¹Lebanọn, gwuku isotu kwun̄ cha book, inyi ukan̄ itaka uti olik kwun̄ cha iriọk!

²Owu uti siperes, to ito, mije, uti olik înan̄a irọn̄; mîjijaka uti ile òjajaan̄ lek cha! Enyi uti ilip oron Basan, ìto ito, mije, mîchon oron ile ya òtitibi igon igwook isan̄a!

³Ìgban̄, ebi òkpukpo arọọn̄ mêkito ito, mije, mîjijaka ata mbubet ema ekisa ibọọk anam kiban̄! Ìgban̄, ebi kè egbe àtat mêkigbin, mije, mîgbugbọ oron ile agba okwaan̄ Jodan igwook!

⁴Okumugwem Awaji n̄a ìtumu ibe ikeyi: “Kpukpo urum arọọn̄ esun̄be ibekpakpan̄.

⁵Ebi ìleleen̄ ema ekisasa isi ikpan̄, ikan ìkatet ema. Ebi ìnyanyam ekibe, ‘Ìtọn̄ Okumugwem, ke eji mîbọọn̄ ubọọn̄!’ Ebi ìkikpukpukpo si kpetoto arọọn̄ cha njijin.”

⁶Mije, Okumugwem ìbe, “Emi m̀kpayaka ito ebi linyọn̄ njijin. Mâyaka ene geelek itap me ubọk ogwu melek kan̄, mè ubọk ogwu ubọọn̄ kan̄. Ema mêjijaka lek ijọn̄ yi, emi m̀kpataba lek ijọn̄ isibi me ubọk kiban̄.”

⁷Nnenikpukpo arọọn̄ cha echi ebekpakpan̄, ògak ge echi ekitutuku cha, mè inimọnọ mkpat iba ikaan̄, mè igwen ge Nnwọn, mè igwen eyilọ Mgba-mbọp. Nkekikpukpo arọọn̄ cha si.

⁸Nsan̄a ebi òkpukpo arọọn̄ ita isan̄a me onyan̄ ge. Nnenijọ ejit me lek arọọn̄ cha, ejit kiban̄ si ìkayaka ìtop me lek n̄a.

⁹Ikeya ke nnibe, “M̀kpayaka ikpukpo enyi. Ogwu ibokwu, ikwu. Ogwu ebekpan̄, ekpan̄. Ire ikaan̄ echi òsisik, ge itaka ge.”

¹⁰Nnenimọnọ mkpat eyi ngwenbe Nnwọn, mè ifan̄a iba isa igwak inyan̄a-ibot n̄a eyi nnyan̄abe melek otutuuk ebi ido geelek.

¹¹Usen ya ke inyan̄a-ibot ya ogwak. Ikeya ke arọọn̄ echi ekitutuku me urum arọọn̄ ya,[11] echi òkukup ikikpọ emi, eniriọọn̄ ibe ke îre ikọ Okumugwem ire eya òkirọ iso.

¹²Emi nnenitumu inyi ema ibe, “Ire ineme enyi, ìkpe emi mkpukpe n̄a. Ire, ire ìkaneme enyi, ìtele.” Ikeya ke ema enitọ akọp ikpoko alata okuket ita isa ikpe emi mkpukpe n̄a.

¹³Okumugwem onenitumu inyi emi ibe, “Tọọn̄ ikpoko cha gwook nyi ogwu òbot ugọn̄.” Ikpoko ema ekpebe emi ya ìre otu ifuk ikpoko ema emun̄be ibe ke îgbe emi me ubọk ikwaan̄ n̄a. Ikeya ke mkpulu akọp ikpoko alata okuket ita cha isi itọọn̄ igwook me Uwu Mbuban Okumugwem inyi ogwu òbot ugọn̄.

¹⁴Nnenifan̄a mkpat n̄a òso iba, eyi ngwenbe Mgba-mbọp, isa igwak ngwan̄ eyi Juda mè Ijeren erebe.

¹⁵Okumugwem otutumu inyi emi ibe, “Kpọk mọnọ nroon̄ ikwaan̄ mbubut ogwu òkpukpo arọọn̄ nyi lek kwun̄.

¹⁶Mije, me atikọ, emi mânijibi ogwu òkpukpo arọọn̄ ge ibene me inyọn̄ ijọn̄ yi, ogwu ìkpokpọ chieen̄ me lek arọọn̄ òchechieen̄, ìkpoweek echi òyiyiyala ikana, ìkpogwa echi unan osakbe me lek, ìkpokpukpo si echi lek onyebe. Kpan̄asi ikeya, ìbotataka arọọn̄ echi òjajaan̄ lek, mè igwak ikpa ukot kiban̄ isan̄a me ukot kiban̄.

¹⁷“Môfieek inyi ogwu òkpukpo arọọn̄ ogwu ikike ya, ogwu òjijit arọọn̄ îkikpukpo itele! Oge akọn̄ môkep ọmọ ubọk, mè ichim chieen̄ kan̄ agan̄ ulom; ubọk kan̄ môriọkọ igwook, chieen̄ kan̄ agan̄ ulom ìkpoyaka imọọn̄ inu!”