Read obolo Jek 12 Bible Online

Jek 12 - obolo bible

Jek 12

¹Eyi ìre ikọ nriran Okumugwem onyibe ofolek ido Ijeren. Okumugwem, ogwu òtataba akpa isinyọn̄ inyana ichak, ogwu òtọtọbọ ọdọ linyọn̄, ogwu òrorom ekwukwu ene itap me emen ene, ìtumu ibe ikeyi:

²“Ìkpọ, emi mârọ inyi Jeruselem ikup kubọk miin̄ òkisa ene. Ebi ìluluk ikana ọmọ okokop mênwọ ọmọ isa, mè ikigbugbe. Mêkpa mbin akọn̄ ikana ido Juda, mè ikpa si ikana ama Jeruselem.

³Me usen ya, mgbọ otutuuk ido geelek me linyọn̄ mêgbaan̄be itọbọ inu akọn̄ me lek Jeruselem, mârọ inyi Jeruselem ikana ewuuk òlolobo me lek ebi ido cha geelek. Ebi geelek ìbenijibi ọmọ inan̄a me akpat mêben unan.

⁴Me usen ya, emi mâtap inyinya geelek èweke, mè itap si ebi ìkikọkọp iraak. Mâgwọk chieen̄ ikpọ uwu kè Juda, ire, otutuuk inyinya ebi ido cha geelek, chieen̄ kiban̄ ìbochichit. Emi Okumugwem ntumu.

⁵Mgbọ ya, ebi ibot mkpulu ebi Juda mênenitumu me ejit kiban̄ ibe, ‘Ebi Jeruselem ere unye inyi eji, inan̄a me lek Okumugwem Ogwukaan̄ Inyọn̄ mè Ijọn̄, Awaji kiban̄.’

⁶“Me usen ya, mârọ ebi ibot mkpulu Juda ekup kubọk ukan̄ etapbe me lek nkirika, mè ekup si kubọk alọm ukan̄ ònin̄ me lek akpa efieekbe me uko ititiin̄ me èdọ me èdọ. Ema mêtaka otutuuk ebi ife geelek ìkana ema okokop iriọk, me agan̄ ulom mè agan̄ ujit. Ire, Jeruselem ìbokeke ikam me irek kan̄.

⁷“Okumugwem môdasi inyan̄a uwu ọfọ ebi Juda, inyi umin ebi uwu kè Debit mè eyi ebi ìluk me Jeruselem ikagak eyi Juda.

⁸Me usen ya, Okumugwem môkwek ebi ìluk me Jeruselem lek; ogwu ikakaan̄ge ebek ukot me etete kiban̄, mônye lek kubọk ogwu ubọọn̄ Debit. Ebi uwu kè Debit mêkekije me isi kiban̄ kubọk ìre Awaji, mè ikije si kubọk ìre ogwu osat Okumugwem.

⁹Usen ya isire, mâweek ijijijaka otutuuk ido geelek ònunu akọn̄ me lek Jeruselem.

¹⁰“Emi mâda ekwukwu eyi nsan mè uriaak igwook me lek ebi uwu kè Debit mè ebi ìluk me Jeruselem. Ema mêbene chieen̄ ikpọ emi ogwu ema echimbe, mè ifieek ejit inyi emi kubọk ekifieek inyi gwun̄ ibot ge òkwukwu, mè ito ujat ito inyi emi kubọk ekito inyi adasi gwun̄ òkwukwu.

¹¹Me usen ya, ito mômin enenen me Jeruselem, kubọk ito etobe me Adadi Rimọn me lek òla ijọn̄ Megido.

¹²Otutuuk ebi lek ijọn̄ yi mêfieek ejit me ototun̄ ukan̄ me ototun̄ ukan̄, ebi ototun̄ ukan̄ geelek mêkup me lek kiban̄ esese. Ototun̄ ukan̄ kè Debit môkup esese, ebibaan̄ kiban̄ si mêkup esese. Ototun̄ ukan̄ kè Netan môkup esese, ebibaan̄ kiban̄ si mêkup esese.

¹³Ototun̄ ukan̄ kè Libai môkup esese, ebibaan̄ kiban̄ si mêkup esese. Ototun̄ ukan̄ kè Simei môkup esese, ebibaan̄ kiban̄ si mêkup esese.

¹⁴Otutuuk ototun̄ ukan̄ kechilọ òsisik, ototun̄ ukan̄ geelek ìbokup me lek kan̄ gaalek, ebibaan̄ kiban̄ si ebekup esese.