Read obolo Jek 13 Bible Online

Jek 13 - obolo bible

Jek 13

¹“Me usen ya, mêchili ogbuuruk ibook inyi ebi uwu kè Debit mè ebi ìluk me Jeruselem, mè ema esa ekegwọk ijo inu mè orieen̄ esan̄a me lek kiban̄.”

²Okumugwem Ogwukaan̄ Inyọn̄ mè Ijọn̄ ìtumu ibe, “Me usen ya, mârọ erieen̄ mkpọmfaka geelek me lek ijọn̄ yi ichep, kpebeyaka ikeek erieen̄ kiban̄ ofifi. Mâsan̄a ebi nriran ten̄ten̄ mè ekwukwu ten̄ten̄ isan̄a me lek ijọn̄ yi.

³Ire ene ge ikpọk ikiben nriran, ogwu ute mè ogwu uga, ebi ìsasa ọmọ inu inyọn̄, mêtumu inyi ọmọ ibe, ‘Mkpa ke owu obokwu, mije, owu osa erieen̄ Okumugwem ikan̄ ataak.’ Isiben nriran, ogwu ute mè ogwu uga mêchichim ọmọ ikpan̄.

⁴“Me usen ya, esip ibeben nriran môtet ogwu nriran geelek, ìkpoyaka itap ofọnti ebi nriran, òrere awudu inwọọn̄ anam, isa ikifiaan̄ ene.

⁵Môtumu ibe, ‘Emi ǹkare ogwu nriran, emi ìre ogwu ikwaan̄ uko, mije, ene olep emi karake ijija n̄a.’

⁶Ire ene ge ido ọmọ ibe, ‘Sà unan kechi òkup me agbagba ubọk kwun̄ ye?’ Ọmọ môfọfọọk ibe, ‘Îre unan esakbe emi me lek me uwu ebi une n̄a.’ ”

⁷Okumugwem Ogwukaan̄ Inyọn̄ mè Ijọn̄ onenibe, “Owu oge akọn̄, nan̄a keke kep ogwu òkpukpo arọọn̄ n̄a, kep ogwu melek n̄a ekigbaan̄ ije ya! Kep ogwu òkpukpo arọọn̄ kpan̄, ke arọọn̄ môyiyala, mâneniyaka ubọk n̄a igwook me lek ebi asasa cha.

⁸Me otutuuk lek ijọn̄ yi, me lek irek ene ita, mêkeen̄ irek iba ikpan̄ igwook; ire, irek ge me lek irek ita mêsik. Emi Okumugwem ntumu.

⁹Òso irek ita ya òsisik, mâtap me ukan̄; mâkala ema kubọk ekikala alata okuket, mè iroon̄ ema ikpọ kubọk ekiroon̄ alata araran̄ ikpọ. Ema mêgwen erieen̄ n̄a, emi mâbọbọkọ ema otu; mâtumu ibe, ‘Ema ìre ebi n̄a.’ Ema mêfọfọọk ibe, ‘Okumugwem ìre Awaji kiji.’ ”