Read obolo Jek 2 Bible Online

Jek 2 - obolo bible

Jek 2

¹Nnenibene chieen̄ ikpọ, mè imun̄ ene ge melek olik itọ-inu me ubọk.

²Ndodo ibe, “Ìre ere owa ke obosi?” Ifọfọọk emi ibe, “M̀basi itọ Jeruselem iriọọn̄ uwele kan̄ mè ujọn̄ọ kan̄.”

³Ogwu osat òkitumu ikọ melek n̄a ya onanan̄a isibi, ofifi ogwu osat osisibi ikweek ọmọ.

⁴Ogwu osat keya onenibe ọmọ: “Libi, si tumu nyi ogwu nsabọn irieen̄ yilọ ibe, ‘Ebilene melek ebi kè anam mêluk iwa enenen me Jeruselem, mè igbuku isibi. Jeruselem mônenikana ama ikakaan̄ge mgban.

⁵Emi me lek n̄a mâkana mgban eyi ukan̄ ikisak ikana ọmọ okokop, mè ikana umin inyi ọmọ me emen kan̄. Emi Okumugwem ntumu.’

⁶“Ìgwat lek! Ìgwagwat lek! Ìlibi ìnan̄a me lek ijọn̄ agan̄ inyọn̄ ìka! Mije, emi ǹchochon enyi ikana otutuuk agan̄ ini echi efet okinan̄a iwut me akpabin inyọn̄. Emi Okumugwem ntumu.”

⁷“Enyi ebi Sayọn, ìgwat lek ìka! Enyi ebi ìluk me ama Babilọn ìlibi ìnwọnọ!”

⁸Mije, Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Mije umin[2] ke îria emi isi lek ido cha ebi ìfufum inu kinyi, mije, ene geelek òchachak enyi ubọk me lek, ìchak ubọk me lek ukwuuk chieen̄ kan̄.

⁹Emi m̀kpalọlọ ibebene ubọk n̄a itoon̄ ema, inyi ebi usun̄ kiban̄ efum si inu kiban̄. Mgbọ ya, enyi mêtolek iniriọọn̄ ibe ke îre Okumugwem Ogwukaan̄ Inyọn̄ mè Ijọn̄ oria emi inu.”

¹⁰Okumugwem ìtumu ibe, “Enyi ebi ama Sayọn, ìtaan̄ ukpo, mè ìbele ejit! Ìkpọ, emi gwa ǹkinu, mâniluk me etete kinyi.

¹¹Me usen ya, owuwa ido mêgbaan̄ lek kiban̄ ititiin̄ melek Okumugwem, mè inikana ebi eyi kan̄. Ọmọ môneniluk me etete kinyi, enyi mêneniriọọn̄ ibe ke îre Okumugwem Ogwukaan̄ Inyọn̄ mè Ijọn̄ oria emi inu me lek kinyi.

¹²Okumugwem mônenikaan̄ ijọn̄ Juda kubọk ìrot kan̄ me lek ijọn̄ mbuban ya, mè ikpọk igobo Jeruselem inyi lek kan̄.

¹³Enyi otutuuk ebilene geelek, ìkup dii me isi Okumugwem. Mije, ọmọ îtọbọ ijibi me ere nluk kan̄ òkup mbuban.”