Read obolo Jek 5 Bible Online

Jek 5 - obolo bible

Jek 5

¹Nnenikpọk ibene chieen̄, mè imun̄ ikpa ge ekakat okiwulu me lek efet.

²Inenibe emi, “Keke ke omun̄?” Mfọfọọk ibe, “Mmun̄ ikpa ekakat òkiwuwulu. Ujọn̄ọ kan̄ ìre ejit go, sà uwele kan̄ ore ejit iba mè ìkike iba.”

³Ọmọ onenibe emi, “Eyi ìre ufieek-otu ya eyi òkikana otutuuk lek ijọn̄ yi. Isi ikpa ya agan̄ ge ìbe mè elap ogwu inọ geelek esan̄a, sà isi agan̄ keyilọ obe mè elap ogwu òsa erieen̄ Awaji inyan̄a ibot ofiaan̄ esan̄a.

⁴Okumugwem Ogwukaan̄ Inyọn̄ mè Ijọn̄ ìbe, ‘Emi mâria ufieek-otu ya isibi, môninin̄ uwu ogwu inọ, mè inin̄ uwu ogwu òsa erieen̄ n̄a inyan̄a ibot ofiaan̄. Ufieek-otu ya ìbobabia me emen uwu ene ya, mè ijijaka uwu ya ire lek uti mè ewuuk esabe inama.’ ”

⁵Ogwu osat òkitumu ikọ melek n̄a ya osisibi ikeke, mè ibe emi, “Bene chieen̄ kwun̄ kpọ-nu inu keyi òkisibi inu.”

⁶Ndodo ibe, “Keke ke îre ni?” Ifọfọọk ibe, “Îre okwun itọ-inu,” mè initumu si ibe, “Eyi ìre nrọ-nlọ ebi ene me otutuuk lek ijọn̄ yi.”

⁷Enenijibi ochichit oporolo òkup me otu okwun ya ibene. Mgbọ ejibibe ibene, kpọ ogwu enenwaan̄ ge yi me emen okwun ya osikibe ikweek irek.

⁸Ogwu osat ya otutumu ibe, “Eyiyi ìre Inu Ikpak,” mè ikeme ọmọ itap me emen okwun ya, mè ida ochichit oporolo ya ikana ichit otu okwun ya.

⁹Nnenibene chieen̄, mè imun̄ ebibaan̄ iba me isi n̄a ekiwulu me emen efet inu. Uwop kiban̄ ìbet lek uwop aba mbese. Ema ebeben okwun ya iwulu ifo akpabin inyọn̄.

¹⁰Nnenido ogwu osat òkitumu ikọ melek n̄a ibe, “Ìre ere owa ke ema ebesa okwun ya isi?”

¹¹Ifọfọọk ibe, “Ebesa ifo Babilonia isi inama uwu itap. Isinama isan̄a, mêbeben okwun ya iyik me inyọn̄ ejiik kan̄ me ere ya.”