Read obolo Jek 6 Bible Online

Jek 6 - obolo bible

Jek 6

¹Nnenikpọk ibene chieen̄ ikpọ, mè imun̄ uji akọn̄ ini okinan̄a me agbagba ogoon̄ iba ikinu, ogoon̄ cha ìre ogoon̄ ekwe.

²Inyinya araran̄ okitaba uji akọn̄ eyi adasi, inyinya ofifit okitaba uji òso iba,

³inyinya okuket okitaba uji òso ita, sà inyinya ngwugwat lek okitaba uji òso ini. Otutuuk kiban̄ enyenye lek iso.

⁴Nnenido ogwu osat òkitumu ikọ melek n̄a ibe, “Ogwukaan̄ n̄a, echichi ìre keke ni?”

⁵Ogwu osat ya ofọfọọk emi ibe, “Ebibi ìre ekwukwu ini echi emen inyọn̄. Ema enan̄a me ere ema ekikeke me isi Ogwukaan̄ otutuuk linyọn̄ isibi inu.

⁶Uji akọn̄ eyi inyinya ofifit cha okitaba ije ìkisi ido agan̄ inyọn̄, eyi inyinya okuket okitaba ije okisi agan̄ ichep-ura,[4] eyi inyinya ngwugwat lek okitaba ije okinin̄ agan̄ osiki.”

⁷Inyinya cha ònyenye lek enan̄a isibi melek ikpele ulọk ijijijen̄e ikana otutuuk linyọn̄ iso. Okumugwem obebe ema, “Ìsibi, ìsi ìje ìkana otutuuk linyọn̄!” Ikeya ke ema esi ije ikana otutuuk linyọn̄.

⁸Mgbọ ya, Okumugwem onenigwen emi, mè ibe, “Kpọ, ebi ìsisi ido agan̄ inyọn̄ ya mîrọ inyi Ekwukwu n̄a isiki efuuk me ido agan̄ inyọn̄ ya.”

⁹Ofifi etip Okumugwem onunu si inyi emi ibe:

¹⁰“Bọkọ uche alata okuket mè alata araran̄ me ubọk ebi usun̄ akọn̄ cha, ìrere Elidai mè Tobija mè Jedaya, ebi ìnan̄a me Babilọn ika. Me usen yaage, owu môsa uche cha isi uwu kè Josaya gwun̄ kè Jefanaya.

¹¹Sa alata okuket mè alata araran̄ cha rom okpibot ubọọn̄, mè sa kwuun̄ me ibot kè Josuwa ogwu òban Awaji, gwun̄ kè Jeyosadak.

¹²Tumu nyi ọmọ ibe ke Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Kpọ enerieen̄ ge ire eyi, erieen̄ kan̄ ìre Agọọk. Ọmọ môtibi isibi me ere ọmọ okupbe, mè ininama Uwu Mbuban Okumugwem.

¹³Îre ọmọ obonama Uwu Mbuban Okumugwem. Ọmọ môkaan̄ umin ogwu ubọọn̄, mè ikup me inyọn̄ ogboon̄ ubọọn̄ ikikpulu. Ọmọ môre ogwu ngwugwa me inyọn̄ ogboon̄ ubọọn̄ kan̄. Irek iba cha môgbaan̄ ikup ijaan̄ me esuuk.’[5]

¹⁴Mêsun̄ okpibot ubọọn̄ ya me Uwu Mbuban Okumugwem inyi mêkisa ikeek Elem,[6] mè Tobija, mè Jedaya, melek Yen[7] gwun̄ kè Jefanaya.

¹⁵Ebi ìkup me ujọn̄ọ ere mênu, mè inigọọk inama Uwu Mbuban Okumugwem. Mgbọ ya, enyi mêneniriọọn̄ ibe ke îre Okumugwem Ogwukaan̄ Inyọn̄ mè Ijọn̄ oria emi inu me lek kinyi. Inu kechi môrọ iso ire enyi isiki chieen̄ irọ inu Okumugwem Awaji kinyi obe enyi erọ.”