Read obolo Jek 8 Bible Online

Jek 8 - obolo bible

Jek 8

¹Etip Okumugwem Ogwukaan̄ Inyọn̄ mè Ijọn̄ oneninu inyi emi ibe:

²“Okumugwem Ogwukaan̄ Inyọn̄ mè Ijọn̄ ìtumu ibe ikeyi: ‘Emi mma Sayọn[9] iraka iman̄, mè imin ejit enenen me lek kan̄.’ ”

³Okumugwem îtumu si ibe ikeyi: “Mâgwu ikom ika igọọk Sayọn, mè iniluk me emen ama Jeruselem. Mgbọ ya, mêkigwen Jeruselem, Ama Atikọ. Mêgwen si ama ya, òrere ogoon̄ Okumugwem Ogwukaan̄ Inyọn̄ mè Ijọn̄, Ogoon̄ Mbuban.”

⁴Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ebi oka enerieen̄ mè ebi oka enenwaan̄ ìkakan ikpukpọkọ mêyaka ikpọk ikisiki ikweek irek me lek oniin̄ ama Jeruselem, ogwu ikup môkaan̄ mkpat kan̄ me ubọk isa ikichiaak ijọn̄ mije ukan.

⁵Nsabọn irieen̄ mè nsabọn ibaan̄ mêjot me lek oniin̄ geelek me ama ya ikifit ifit.”

⁶Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Ubọk geelek, eyiyi môrebe inu ukechieen̄ inyi ebi Ijeren chi ebi mêsikbe me ugwem me mgbọ ya. Ire, ìkpore inu ukechieen̄ inyi emi. Emi Okumugwem Ogwukaan̄ Inyọn̄ mè Ijọn̄ ntumu.”

⁷Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Kpọ, emi mânyan̄a ebi n̄a isibi me ido agan̄ mbum-ura mè ido agan̄ ichep-ura.

⁸Mâsa ema ika inu, ema mêneniluk me emen ama Jeruselem. Ema mênenikana ebi n̄a, emi mânenire Awaji kiban̄, mè ikikpulu ema me atikọ mè ata irọrọ.”

⁹Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Enyi ebi ìkinọ ikọ chi me usen kechi, òrere ikọ ebi nriran etumube mgbọ etọbọbe ọdọ ibekpọk inama Uwu Mbuban ya, òrere Uwu Mbuban Okumugwem Ogwukaan̄ Inyọn̄ mè Ijọn̄, ìtet lek ìnye, inyi enama Uwu Mbuban ya.

¹⁰Sabum mgbọ ikwaan̄ Uwu Mbuban obenebe, ebilene kpekisi mbọm geege mè imun̄ ikpoko, ebi kè anam si kpekisi ọkọ isa mkpukpe geege inu. Bak me lek ebi ochicha, ene geege ìkakọt ìjijijen̄e ìkana ìkirọ mbubek kan̄ me utelelek, mije, emi ǹtatap ochicha chieen̄ me etete otutuuk ene, ogwu ikup, orọ okeme ogwu melek kan̄.

¹¹Ire, ubọk nrọbe me lek ebi adasi me mgbọ òraraka ya, m̀kpayaka irọ ikeya me lek ebi ìsisik me lek ife chi. Emi Okumugwem ntumu.

¹²“Mfut môtibi me esuuk, gerep môto mfut kan̄, ijọn̄ môsibi mfut ogbogbo, isinyọn̄ mônyi mbat kan̄. Mârọ inyi ebi ìsisik me lek ife chi ekaan̄ inu chi geelek me ìrot.

¹³Enyi ebi uwu kè Juda mè ebi uwu kè Ijeren, ike enyi erebe inu egbobe me etete ebi ofifi ido, ikeya ke mânyan̄a enyi isibi, inyi enyi ere ugbana. Ikatet ukpook, ire, ìtet lek ìnye.”

¹⁴Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Mgbọ ebi nte nte kinyi erọbe ejit inaan̄ emi, ǹtutumu ifieek ibe ke mâsut enyi osusut, ǹkanwene ejit. Emi Okumugwem ntumu.

¹⁵Ikeya si, me mgbọ keyi, ntumu ifieek ibe ke mârọ ata inu inyi Jeruselem mè Juda. Eya orọ, ikatet ukpook.

¹⁶Echichi ore inu enyi mêrọbe: Ìkitumu atikọ ìnyi ebi melek kinyi, mè ìkisibi unen oyerebet eyi esuuk me uwu oyerebet kinyi;

¹⁷ikatọt ijo inu me ejit kinyi ìbak ebi melek kinyi, ikama inyanyan̄a ibot ofiaan̄. Otutuuk kechi ìre inu emi nchabe. Emi Okumugwem ntumu.”

¹⁸Ikọ Okumugwem Ogwukaan̄ Inyọn̄ mè Ijọn̄ okpọkpọk inu inyi emi ibe:

¹⁹“Okumugwem Ogwukaan̄ Inyọn̄ mè Ijọn̄ ìtumu ibe ikeyi: Ijin-otu eyi òso onyan̄ ini, mè eyi òso onyan̄ go, mè eyi òso onyan̄ jaaba, mè òso akọp onyan̄ môkana inu unwọọn̄ mè ubelejit mè ijọk òtotop inyi ebi uwu kè Juda. Eya orọ, ìma atikọ mè esuuk.”

²⁰Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Owuwa ebi ife geelek mè ebi ìluk me ogbogbo ama mêkika.

²¹Ebi ìluk me ama ge mêsi lek ebi ìluk me ofifi ama, mè ibe, ‘Ìna eji egwat lek eje esi mbeek me isi Okumugwem, mè eweek Okumugwem Ogwukaan̄ Inyọn̄ mè Ijọn̄, emi me lek n̄a si mânije.’

²²Owuwa ebi ife geelek mè ogbogbo ido ònyenye mênu me Jeruselem iniweek Okumugwem, mè inibeek ọmọ mbeek.”

²³Okumugwem Ogwukaan̄ Inyọn̄ mè Ijọn̄ ìtumu ibe ikeyi: “Usen cha isire, akọp ebirieen̄ ìnan̄a me otu usem geelek me ido geelek mêgọbọ ogwu Ju ge me otu utọn̄ ofọnti àwurukù kan̄ ikam, mè ibe, ‘Tele mè eji egọọk enyi eje, mije, eji mînọ ibe ke Awaji òwa melek kinyi.’ ”