Read obolo Jek 9 Bible Online

Jek 9 - obolo bible

Jek 9

¹Eyi ìre ikọ nriran Okumugwem onyibe ofolek lek ijọn̄ Adarak eyi òborọn̄ ikeme Damasikọs, mije, chieen̄ otutuuk ebilene, mè chieen̄ otutuuk otoko ebi Ijeren ìkikpọ Okumugwem.

²Ukwook yi môre si Amat, eyi òkaan̄ okike ijọn̄ melek Adarak; mè ire si Taya mè Sidọn, ubọk geelek ema erebe ebi ìriọọn̄ inu.

³Taya înama uwu mgban akọn̄ inyi lek kan̄; îkwọọk alata okuket isun̄ me èdọ kubọk achiaan̄, mè ikukọ alata araran̄ ijot ere kubọk ogbọ ejit oniin̄.

⁴Ire, Okumugwem môbọkọ inu ọmọ okaan̄be cha isan̄a kpai; môtọọn̄ inu cha îkisa inye lek ifiin̄ me okwaan̄, mè isa ukan̄ itaka ama ya iriọk.

⁵Asikelọn mômun̄, mè itet ukpook; ukpook môgwook Gaja me lek; ukpook môgwook si Ekurọn me lek, mije, ikpọchieen̄ kan̄ îjijaka. Ogwu ubọọn̄ Gaja môchep, Asikelọn môyat ita kpai.

⁶Ebi ichen ebeluk me Asidọdu; mâjijaka ugumulek ebi Filisia igwook.

⁷Mâbọkọ eje anam isan̄a ema me otu, mè isan̄a òchichaka inu ya me agbagba ejeek kiban̄. Ebi geelek ìsisik mêkup si inyi Awaji kiji, mè inikana ebi isi me Juda; Ekurọn mônenikup ubọk ebi Jebus ekupbe.

⁸Emi mâbem ebi uwu n̄a, mè ikput ema lek me lek ebi urum akọn̄ ìkinya ikana ere. Ogwu òkitutuku ema ìkpoyaka ijak ukot me ijọn̄ kiban̄ ofifi, mije, chieen̄ n̄a òwa me lek kiban̄.

⁹Ebi Sayọn, ìnwọọn̄ unwọọn̄ enenen! Ebi Jeruselem, ìtaan̄ ukpo ubelejit! Ìkpọ, ogwu ubọọn̄ kinyi òkinu inyi enyi. Ọmọ ìre ogwu ata irọrọ, mè ogwu òtitim ikpan̄,[10] ogwu òsisiki lek, mè ikikọp me inyọn̄ inyinya akpan, mè inyọn̄ gwun̄ inyinya, òrere gwun̄ inyinya akpan.

¹⁰Emi mâkpulu uji akọn̄ isan̄a me Iferem, mè ikpulu inyinya akọn̄ isan̄a me Jeruselem; mêfaan̄ ogbaan̄ cha ekisa isi akọn̄ ifiin̄. Ogwu ubọọn̄ ya môtumu ikọ esuuk melek ebi ofifi ido. Mkpulu kan̄ môwele owot inan̄a me okwaan̄ ire okwaan̄, mè inan̄a me okwaan̄ Yuferetis isi ire ntutun̄ ere geelek me linyọn̄.

¹¹Ire me lek kwun̄ Ijeren, bak me lek inyan̄a-ibot n̄a melek kwun̄, eyi esabe eje irọ ijot, emi mâsan̄a ebi kwun̄ ìkup me mkpọn me udọn̄ kpunube mun̄ isibi.

¹²Enyi ebi mkpọn ebi ikpọchieen̄ okupbe inyi, ìka ìnu me lek mgban kinyi; ǹkilook me cherekeyi ibe ke mâyaka ugbana irek iba ikpe enyi me lek otutuuk ufialek enyi ebọkọbe.

¹³Emi mânwun Juda isa irọ ogbaan̄ n̄a, mè isa Iferem irọ oraan̄ inwaan̄ ichit ogbaan̄ ya. Owu Sayọn, mâjibi bọn kwun̄ ibene, isa isi itim akọn̄ me lek bọn ebi Giris. Owu môre oge akọn̄ eyi ogwu akọn̄ ònyenye lek.

¹⁴Okumugwem môsibi ikeke me inyọn̄ ibot kiban̄, oraan̄ kan̄ môkekimumen kubọk omumen inyọn̄; Ogwukaan̄-ene Okumugwem môwut otita, mè ijibi ije me emen egwijo echi agan̄ osiki.

¹⁵Okumugwem Ogwukaan̄ Inyọn̄ mè Ijọn̄ môkput ema lek; ema mêsa ewuuk olik mgbọlọ ijijaka ema, mè itim ikpan̄ ema. Ema mêkput okput kubọk ebi miin̄ osabe; ema mêfiin̄ eje ebi ochicha kiban̄ igwook ijot ere, kubọk ekitap eje irireek otu okwa ngwugwa, eje môjojot ema lek kubọk otu utọn̄ ntook ngwugwa.

¹⁶Usen ya isire, Okumugwem Awaji kiban̄ mônyan̄a ema kubọk urum arọọn̄ ebi kan̄. Ema mêkikebe me lek ijọn̄ Okumugwem kubọk ewuuk unye otu ewe òkup me lek okpibot ubọọn̄.

¹⁷Ijọn̄ ya mônwọn, mè ijaan̄ enenen! Akpa môrọ inyi nsabọn irieen̄ enye lek; aya miin̄ môrọ inyi nsabọn ibaan̄ ejaan̄ lek.