Read obolo Mal 1 Bible Online

Mal 1 - obolo bible

Mal 1

¹Eyi ìre etip Okumugwem olookbe Malakai[1] ibe isa isi ilook ebi Ijeren.

²Okumugwem onenitumu ibe, “Mma enyi.” Ire, enyi edodo ọmọ ibe, “Ìre ike owa ke osa ima eji?” Okumugwem onenibe, “Ìre Isọ melek kè Jekọp kpefat ire ngwan̄? Ire, Jekọp ke emi mma,

³mè icha Isọ, mè irọ inyi ido ogoon̄ ogoon̄ kan̄ ikana nchat ijọn̄ èwê, mè irọ inyi ijọn̄ ìrot kan̄ ikana ere ebi kè ibo oron afa ekiluk.”

⁴Ebi Edọm, òrere ebi owot iman kè Isọ, mêkọt itumu ibe, “Ubọk geelek ejijakabe eji igwook, eji mêkpọk inama ido kiji.” Ire, Okumugwem Ogwukaan̄ Inyọn̄ mè Ijọn̄ ìbe, “Ema mêkọt ikpọk inama ido kiban̄, ire, m̀bagbugbugbọ otutuuk igwook. Mêkigwen ema Ido Afa, ife unaan̄-ejit Okumugwem obiabe me lek ire mgbọ geelek.

⁵Enyi mêsa chieen̄ kinyi imun̄, mè itumu si ibe, ‘Me atikọ, Okumugwem îmin enenen, umin kan̄ îsaba iraka oke ijọn̄ ido Ijeren.’ ”

⁶Okumugwem Ogwukaan̄ Inyọn̄ mè Ijọn̄ onenitumu inyi ebi ngwugwa ibe, “Gwun̄ ìkinyi ogwu ute umin, ogwu usun̄ ìkinyi ogwu nte uwu kan̄ ulibi. Ire emi ìre nte kinyi, mọmọ umin ya eyi ògbegbe emi? Ire emi ìre nte uwu, mọmọ ulibi ya eyi ògbegbe emi? Enyi ebi ngwugwa, enyi ekikpọ erieen̄ n̄a isiki chieen̄, mè ifiaan̄ ikido ibe, ‘Ìre kpasi oniin̄ ke eji esa ikikpọ erieen̄ kwun̄ isiki chieen̄?’

⁷“Enyi ekisa inorie òkaan̄ mbuban me lek inigwa ngwugwa me inyọn̄ ntook n̄a, mè ifiaan̄ ikido ibe, ‘Ìre kpasi oniin̄ ke eji esa ichaka owu mbuban me lek?’ Îre me lek enyi ekitumu ibe ke mêkọt ikpọ ntook ngwugwa Okumugwem isiki chieen̄.

⁸Eyi enyi ekisa anam ǹnàan̄ inigwa ngwugwa, ìre eya ìkalọ ni? Eyi enyi ekisa anam m̀fan̄a ukot, mè ìre anam òkaan̄ orukan̄ me emen inigwa ngwugwa, ìre eya ìkalọ ni? Ìsa mbet lek anam kecha ìnyi ogwu ibot mkpulu kinyi ìkpọ-nu! Ìre môbọkọ, mè ibele ejit me lek kinyi? Emi Okumugwem Ogwukaan̄ Inyọn̄ mè Ijọn̄ nkido enyi.

⁹“Mgbọ keyi, eyi enyi ekigwa ojelek wọlọwọlọ ngwugwa kechi, ìbeek-nu Awaji ibe ikaan̄ nsan me lek kinyi, mè ìkpọ-nu, mè ìre môfat inyi enyi isi. Emi Okumugwem Ogwukaan̄ Inyọn̄ mè Ijọn̄ ntumu.

¹⁰“Kè ònwọn, ire ene ge me etete kinyi mogon otutuuk isotu Uwu Mbuban, inyi ene geege ikayaka ìnisọk ataak ataak ukan̄ me inyọn̄ ntook n̄a! Ǹkayaka ìbele ejit me lek kinyi. Ǹkayaka ìdo ngwugwa geege ònan̄a enyi me ubọk. Emi Okumugwem Ogwukaan̄ Inyọn̄ mè Ijọn̄ ntumu.

¹¹Bene me agan̄ mbum-ura si re agan̄ ichep-ura, erieen̄ n̄a îkaan̄ umin me etete ebi ido geelek. Me ere geelek, ebi ene ekiwọwọp nsensi, mè ikigwa ngwugwa òtatana inyi erieen̄ n̄a, mije, erieen̄ n̄a îkaan̄ umin me etete ebi ido geelek. Emi Okumugwem Ogwukaan̄ Inyọn̄ mè Ijọn̄ ntumu.

¹²“Ire, enyi ekififila erieen̄ n̄a, sa me lek enyi ekitumu ibe ke ntook ngwugwa Ogwukaan̄-ene îfifila, ke mêkọt ikpọ inorie inyọn̄ ntook ya isiki chieen̄.

¹³Enyi ekitumu ibe, ‘Iyak! Ìre kpasi ulobo akpan ire echi eji ekibeme?’ Enyi isikitumu ikeya, enyi mîra ikigwuku mfi igwook kubọk emi ǹkayaka ìkukup me lek inu geege. Emi Okumugwem Ogwukaan̄ Inyọn̄ mè Ijọn̄ ntumu.

¹⁴Môfieek inyi ogwu mfeen̄ ya, ogwu òkaan̄ atalek orie anam me etete anam kan̄, mè isa anam òkaan̄ mbuban me lek inigwa ngwugwa inyi Ogwukaan̄-ene. Mije, emi ìre ogwu ubọọn̄ òmimin. Erieen̄ n̄a si îkaan̄ ukpook me etete ebi ido geelek. Emi Okumugwem Ogwukaan̄ Inyọn̄ mè Ijọn̄ ntumu.”