Read obolo Mal 3 Bible Online

Mal 3 - obolo bible

Mal 3

¹Okumugwem Ogwukaan̄ Inyọn̄ mè Ijọn̄ ìbe: “Ìkpọ, mâniria ogwu etip n̄a inu, ogwu òboninen̄e oniin̄ isun̄ iban emi. Mgbọ ya, me ekakpọge chieen̄, Okaan̄-ene ogwu enyi ekiweek ya mônunu me Uwu Mbuban kan̄. Ogwu òbonilook etip eyi inyan̄a-ibot ya, ogwu enyi ekiweek ya, ìkpọ, òkinu.”

²Ire, ìre ekene obokọt ibeme usen inunu kan̄? Ìre ekene obokọt ikeke ida ọmọ mgbọ isikana isibi? Mije, ọmọ ìbokup kubọk unye ukan̄ ogwu ikwaan̄ okwukwut okisa ikala alata, mè ibet lek ìsabi ogwu ògwọk ekwut okisa igwọk ekwut itana.

³Ọmọ môsiki ikweek irek kubọk ogwu òkikala alata okuket, mè ikikwuk inyi itana. Ọmọ môkwuk ebi otoko kè Libai itana, mè ikala ema, inyi etoon̄ kubọk alata araran̄ mè alata okuket. Sa me ikeya, Okumugwem mônenikaan̄ ebi ìbekigwa ngwugwa inyi ọmọ ubọk îgbebe.

⁴Mgbọ ya, Okumugwem mônenikibọkọ ngwugwa ebi Juda mè ebi Jeruselem itap kubọk îkibọkọ me mgbọ ukot ikaan̄, mè acha òraraka cha.

⁵“Mgbọ ya, emi mânenikup iriaak enyi ikisibi enyi oyerebet me ibot. Mâgwat lek ikeke ata-ikọ ikeme ebi ìtet ǹcha, mè ebi ugan-nwa, mè ebi ìkinyan̄a ibot ataak, mè ebi ìkifeen̄ ebi ikwaan̄ me lek mkpukpe, mè ebi ìkitutuku ebi nwakpa mè ebi kpà-nte, mè ebi ìkifeen̄ ebi ichen, mè ebi kpekitet ukpook me lek n̄a. Emi Okumugwem Ogwukaan̄ Inyọn̄ mè ijọn̄ ntumu.”

⁶“Emi Okumugwem, ǹkakinwene. Eya orọ enyi bọn kè Jekọp kpekwaan̄ ita.

⁷Akarake ukot ebi nte nte kinyi, enyi mîjit orọmijọn̄ n̄a, enyi kpekirọ. Ìgwu ìkom ìna me lek n̄a, ke mâgwu ikom inu me lek kinyi. Emi Okumugwem Ogwukaan̄ Inyọn̄ mè Ijọn̄ ntumu.” Ire, enyi ekekido ibe, “Eji eberọrọ igwu ikom?”

⁸“Ìre ogwu ebilene môkọt ichiin̄ inu Awaji okaan̄be ni? Ire, enyi ba mêkichiin̄ emi, mè ikido ibe: “ ‘Ìre eji ejeje ichiin̄ owu ni?’ “Îre me lek irek ge me akọp irek, melek inyinyi.

⁹Ufieek-otu îtet enyi, enyi otutuuk ido, mije enyi ekichiin̄ emi.

¹⁰Ìsa òjot òjot irek ge me akọp irek ìnigwook me uwu isun̄-inu n̄a, inyi inorie ikanan me uwu n̄a. Ìroon̄ emi ìkpọ-nu me lek inu keyi! Emi, Okumugwem Ogwukaan̄ Inyọn̄ mè Ijọn̄ ntumu. Ìkpọ-nu, mè ìre m̀kpafat igwuku otu nruruk echi emen inyọn̄ ibook, mè ida ugbana owuwa owuwa igwook inyi enyi, mege enyi kpebekaan̄ ere itap otutuuk.

¹¹Mâkput òtaka inu me uko kinyi, inyi ikajijaka mfut uko kinyi. Me inyọn̄ ijọn̄ kinyi, mfut gerep ìkabogen̄ sabum mgbọ ìboren̄e. Emi Okumugwem Ogwukaan̄ Inyọn̄ mè Ijọn̄ ntumu.

¹²Mgbọ ya, otutuuk ebi ido geelek mênenikigwen enyi ebi egbanabe, mije, ijọn̄ kinyi ìbokitotop iluluk. Emi Okumugwem Ogwukaan̄ Inyọn̄ mè Ijọn̄ ntumu.”

¹³Okumugwem ìbe, “Enyi mîtumu ikọ ikpak ikpak ikeme emi. “Ire, enyi enenido ibe, ‘Keke ke eji etumu ikeme owu?’

¹⁴“Enyi etumu ibe, ‘Irọrọ ikwaan̄ inyi Okumugwem ìre inu ikike. Irọrọ orọmijọn̄ Okumugwem Ogwukaan̄ Inyọn̄ mè Ijọn̄ mè ifefieek ejit me ibot ijo inu kiji me isi kan̄, kubọk ebi uwu ito ekirọ, ìre kpasi oruru ke îsibi inyi eji ni?

¹⁵Mgbọ yi, ebi ugumulek ke eji ekigwen ebi egbanabe. Iin̄, ebi ikpak ke inu okije ijaan̄ me lek. Ema ekitọ Awaji ikpọ, mè eje efon me ikike.’ ”

¹⁶Mgbọ ya, ebi ìkitet ukpook me lek Okumugwem ekekikpa ukpatu me lek kiban̄ ge mè ge, Okumugwem ogbagban̄, mè inọ. Enenige inu ofolek ebi ìkitet ukpook Okumugwem mè ikimin erieen̄ kan̄ itap me ikpa me isi Okumugwem, isasa ikikeek ema.

¹⁷Okumugwem Ogwukaan̄ Inyọn̄ mè Ijọn̄ onenibe, “Ema mêre ebi n̄a, me usen ya mgbọ mâsabe ema irọ inu ubọọn̄ òkup esese inyi lek n̄a. Mâkaan̄ ema nsan me lek kubọk ute okikaan̄ nsan me lek gwun̄ kan̄ enerieen̄ ogwu òkisi ikwaan̄ inyi ọmọ.”

¹⁸Mgbọ ya, enyi mêkpọk imun̄ esese òkup me etete ebi ata irọrọ mè ebi ikpak, mè etete ebi ìkisi ikwaan̄ inyi Awaji mè ebi kpekisi ikwaan̄ inyi Awaji.