Read obolo Mal 4 Bible Online

Mal 4 - obolo bible

Mal 4

¹Okumugwem Ogwukaan̄ Inyọn̄ mè Ijọn̄ ìbe ikeyi, “Me atikọ, usen oyerebet òkinu. Osusut usen ya obosa inu ìbotaka ene kubọk ukan̄ òkikala okwukwut. Otutuuk ebi ugumulek mè otutuuk ebi ikpak ebetataka iriọk kubọk mfufe akpa me usen ya. Otutuuk agọọk kiban̄ mè ugwun̄-ijọn̄ kiban̄, kpunu geege òbosik inyi ema.

²Ire enyi ebi ìkimin erieen̄ n̄a, ata irọrọ môtoon̄ kubọk ura inyi enyi, mè isa igwagwa igbaalek ijet enyi. Mgbọ ya, enyi mênanan̄a isibi, mè ikiraan̄ iwulu ikana kubọk bọn eriembuuk esan̄abe isibi me uwu anam.

³Me usen ya eyi nkinen̄e isun̄, enyi ebejajak ebi ikpak iraka. Ema ebekup kubọk ntọn̄ ikike me akajit ukot kinyi. Emi Okumugwem Ogwukaan̄ Inyọn̄ mè Ijọn̄ ntumu.”

⁴“Ikawuuk Ikan kè Mosis ogwu ikwaan̄ n̄a, eyi nnyibe ọmọ me inyọn̄ ogoon̄ Orebu ibe isa ininyi otutuuk ebi Ijeren, ìkeek otutuuk orọmijọn̄ mè ikan cha.

⁵“Ìkpọ, emi mâria Ilaija ogwu nriran inu me lek kinyi, sabum usen oyerebet Okumugwem ya, òrere uga usen òkaan̄ ukpook ya, ònore.

⁶Isinu, mônirọ inyi ebi ute egwu ejit ekom ema bọn kiban̄, mè irọ inyi bọn egwu ejit ekom ema ebi nte kiban̄. Ilọ me ikeya, m̀banunu inijijaka ido kinyi isan̄a kpai.”