Read obolo Mat 1 Bible Online

Mat 1 - obolo bible

Mat 1

¹Mfufuk owot nte kè Jisọs Karais gwun̄ kè Debit ònan̄a me owot iman kè Ebereyam ìje ikeyi:

²Ebereyam obon Ajiki, Ajiki onenibon Jekọp, Jekọp onenibon Juda melek ebi ngwan̄ ebirieen̄.

³Juda onenibon Pereji melek Jera me owot kè Tema. Pereji onenibon Ejirọn, Ejirọn onenibon Ram.

⁴Ram onenibon Aminadap, Aminadap onenibon Nasiọn, Nasiọn onenibon Salimọn.

⁵Salimọn onenibon Bowaji me owot kè Reyabu. Bowaji onenibon Obedi me owot kè Rufu. Obedi onenibon Jesi.

⁶Jesi onenibon ogwu ubọọn̄ Debit. Debit onenibon Solomọn me owot nwa kè Uraya.

⁷Solomọn onenibon Reyobuwam, Reyobuwam onenibon Abija, Abija onenibon Asa.

⁸Asa onenibon Jiosefat, Jiosefat onenibon Joram, Joram onenibon Ujaya.

⁹Ujaya onenibon Jotam, Jotam onenibon Ayaji, Ayaji onenibon Ejikaya.

¹⁰Ejikaya onenibon Manasi, Manasi onenibon Amọn, Amọn onenibon Josaya.

¹¹Josaya onenibon Jekonaya melek ebi ngwan̄ ebirieen̄ sabum enikpulu ebi Ijeren me usun̄ akọn̄ isa ifo ido Babilọn.

¹²Mgbọ ekpulube ema me usun̄ akọn̄ isi igwook me ido Babilọn isan̄a ke Jekonaya obon Sialitien. Sialitien onenibon Jerubaben.

¹³Jerubaben onenibon Abiudu, Abiudu onenibon Eliakim, Eliakim onenibon Ajọ.

¹⁴Ajọ onenibon Jadọk, Jadọk onenibon Akim, Akim onenibon Eliudu.

¹⁵Eliudu onenibon Elieja, Elieja onenibon Matan, Matan onenibon Jekọp.

¹⁶Jekọp onenibon Josefu òrere nlom kè Meri ogwu òmaman Jisọs ogwu òrere Karais (eyi òsisibi ogwu Awaji otọkọbe aran̄ me ibot).

¹⁷Bene me ukot kè Ebereyam na re ukot kè Debit ìsibi akọp mè owot iman ini. Bene me ukot kè Debit na re mgbọ ekpulube ebi Ijeren me akọn̄ isa ifo ido Babilọn ìre akọp mè owot iman ini. Bene me mgbọ ebi Ijeren enan̄abe me Babilọn ika na re mgbọ emanbe Karais ìre si akọp mè owot iman ini.

¹⁸Imaman kè Jisọs Karais ìkup ikeyi: Josefu înu initet Meri ogwu ònenire nga kè Jisọs itele ibodo me lek nwa. Ire, sabum ema enikana olom mè nwa, enenimun̄ ibe ke Meri înin̄ owot inan̄a me unye Ekwukwu Mbuban.

¹⁹Ire, mije Josefu ogwu olom orebe ogwu ata irọrọ, ìkaweek irọrọ Meri inu esip me isi ebi ene. Eya orọ, ibeben me ejit ibe ke ọmọ mônween̄ lek ijit Meri me nlelet, inyi utọn̄ ebi ene ikanọ.

²⁰Ire, ike Josefu okikeek inu yi, ogwu osat Okumugwem osisibi ichichini ọmọ me emen ilaak, mè ibe ọmọ, “Josefu gwun̄ kè Debit, mọnọ Meri nwa kwun̄. Katet ukpook, mije, Meri ìnin̄ owot yi inan̄a me unye Ekwukwu Mbuban.

²¹Meri nwa kwun̄ môman gwun̄ enerieen̄. Owu mônyi gwun̄ ya erieen̄, Jisọs,[1] mije, îre gwun̄ ya obonyan̄a ebi kiban̄ isibi me emen ijo inu kiban̄.”

²²Otutuuk inu òmọmọnọ irek îrọ inyi ikọ Okumugwem otumube inan̄a me otu ogwu nriran kan̄ irọ iso.

²³Okumugwem ìbe ke obaak enenwaan̄ ge ikariọọn̄ge enerieen̄ mônin̄ owot, mè iman gwun̄ enerieen̄; ke mêgwen gwun̄ ya Imanuwen,[2] eyi òsisibi “Awaji òwa melek kiji.”

²⁴Mgbọ Josefu onan̄abe ikeke me ilaak, imọmọnọ Meri ogwu nwa isa ifo uwu kan̄ ike ogwu osat Okumugwem obe ọmọ irọ.

²⁵Ire, ìkagọọk Meri ìlaak mege ire mgbọ Meri omanbe gwun̄ enerieen̄ ya. Josefu onyinyi gwun̄ ya erieen̄, Jisọs.