Read obolo Mat 11 Bible Online

Mat 11 - obolo bible

Mat 11

¹Mgbọ Jisọs otemebe akọp mè ebi udun̄ iba kan̄ nteme isan̄a, ineninan̄a me ere ya ikijijen̄e ikana owuwa ama me Galili, mè ikijeen̄ inu, mè ikilook ata etip ikana me ama cha.

²Jọn ògwook mun̄ okukup me uwu mkpọn inọ inu Jisọs okirọ, mè iria ebi udun̄ kan̄ ibe esi edo Jisọs ibe,

³mè ìre ogwugwu ore ogwu òbonunu ya? Sà ìre ema ekup ekpọ ofifi ene?

⁴Mgbọ ife cha esibe isi ido Jisọs ikọ ya, Jisọs ofọfọọk ema ibe, “Ìgwu ìkom ìfon, mè ìsi ìkpa inu enyi emun̄be, mè inu enyi enọbe ìnyi Jọn.

⁵Ebi ǹnàan̄ mêkimọọn̄ inu, ebi akọọk mêkije ije, mêkigwa ebi orukan̄ inyakpa, ebi ìnan mêkinọ ikọ, mêkijomo ebi ìkwakwaan̄, mêkilook si ebi ugbọọn̄ ata etip.

⁶Uga ubelejit okup inyi ene geelek ogwu ikanan̄age ìrọn̄ mije n̄a.”

⁷Mgbọ ebi udun̄ kè Jọn cha enan̄abe me ere ya ikije ifo, Jisọs obebene ikitumu ikọ ofolek kè Jọn inyi ogbogbo ene cha, mè ikido ema ibe, “Mgbọ enyi esibibe isi emen èwê ya, ìre keke ke enyi esi ikpọ? Ìre mbubet eyi efet okiwumu imaan̄ ke enyi esi ikpọ mọnọ?

⁸Ire ìkare eya, ìre keke ke enyi esibi isi ikpọ? Ìre enerieen̄ òsa ujuja ekwut mè ofọnti ibala lek ke enyi esi ikpọ? In̄-in̄, ìkpokọt ire ikeya, mije, ebi ìkibala lek ikeya ekiluk me uwu ebi ubọọn̄.

⁹Ìre keke ni ke enyi esibi isi ikpọ? Ìre ogwu nriran ke enyi esibi isi ikpọ? Iin̄, me atikọ, ogwu enyi esi ikpọ ya îmin igak ogwu nriran.

¹⁰Ọmọ ore gwun̄ ikwaan̄ ya ogwu egebe inu ofolek me emen Ikpa Mbuban ibe ke Awaji ibe, “ ‘Emi mâria gwun̄ ikwaan̄ n̄a ibe idasi ije me isi kwun̄, mè isi inen̄e oniin̄ isun̄ iban owu.’[22]

¹¹Me atikọ, ǹkitumu inyi enyi ibe, me etete bọn ebirieen̄ ebi ebibaan̄ emaan̄be bene me karake ukot ukot, kpunu ene geege òmimin igak Jọn ògwook mun̄. Ire, ogwu òsisip ichit me mkpulu emen inyọn̄ îmin igak Jọn.

¹²Bene me mgbọ Jọn ògwook mun̄ obenebe ikilook ata etip na re mgbọ keyi, mkpulu eyi Awaji ìkitibi imin me unye. Ebi ìnyenye ejit gaalek ekikọt itibi inin̄.

¹³Mege Jọn oninu, Ikan kè Mosis îtumu inu ofolek mkpulu yi. Ebi nriran si mîben nriran ofolek.

¹⁴Jọn yi ore Ilaija ya ogwu ebi nriran etumube ibe ke mônu. Ire ineme enyi, ìbọkọ ìchieek.

¹⁵Ogwu ikaan̄ utọn̄, inọ.

¹⁶“Ìre keke ke mbasa ebi ukot mgbọ keyi itọ me lek? Ife chi ekup kubọk nsabọn ìkup me oyet ama ikifit ifit. Ebi agan̄ ge ekekitaan̄ ukpo itumu inyi ebi agan̄ keyilọ ibe,

¹⁷“ ‘Eji mîwut òja isa ikọt okwa unwọọn̄ inyi enyi, enyi kpechieek ijojop. Eji mîkọt okwa ito inyi enyi, enyi kpechieek itoto ito ufieejit.’

¹⁸Mgbọ Jọn onube, îkijin otu owuwa mgbọ, ìkakinwọ miin̄ geege. Ire, ebi ene ekekitumu ibe ke îkaan̄ ijo erumun̄ me emen.

¹⁹Emi Gwun̄ Ebilene nneninu, mè ikirie, mè ikinwọ. Ebi ene ekekibe ke emi ìre ogwu ebek inorie mè ogwu usa-miin̄, ogwu òkigọọk ebi otitip ido mè ebi kpekisun̄ Ikan kè Mosis igbaan̄ ije. Ire, îre ikwaan̄ Awaji okisa iriọọn̄-inu kan̄ isi me emen ene, ke ekisa iriọọn̄ ibe ke iriọọn̄-inu ya ìre eyi atata.”

²⁰Jisọs obebene ikifieek otu inyi ama cha ere îrọbe owuwa inu ukechieen̄, mije, ebi ama cha kpegwu ikom. Ikekitumu inyi ema ibe,

²¹“Môfieek inyi enyi ebi ama Korajin. Môfieek si inyi enyi ebi ama Betisaida. Ire ibe ìre Taya mè Sidọn ke merọ otutuuk inu ukechieen̄ echi erọbe me emen ama kinyi, kè ebi ama cha etap ofọnti ufieejit, mè èkekpukpọt me ntọn̄, mè ègwu ekom karake ukot ukot.

²²Ire, ǹkitumu inyi enyi ibe ke môfieek enenen inyi enyi me Usen Oyerebet Awaji igak ebi Taya mè Sidọn.

²³Enyi ebi ama Kapanọm, ìre enyi ekikeek ibe ke mêbene enyi ifo emen inyọn̄? In̄-in̄, îre ama yọk ke ebesiki enyi isi itap. Ire ibe ìre Sodọm ke merọ inu ukechieen̄ echi erọbe me emen ama kinyi, kè Sodọm òkup mege òre cherekeyi.

²⁴Eya orọ, emi ǹkitumu inyi enyi ibe ke môfieek inyi Kapanọm igak Sodọm me Usen Oyerebet.”

²⁵Mgbọ Jisọs otumube ikọ chi isan̄a, ineniriaak uriaak ibe, “Ute, Ogwukaan̄ Inyọn̄ mè Ijọn̄, ntọn̄ owu, mije, owu òlelet inu chi geelek me lek ebi ìriọọn̄ inu mè ebi ìkaan̄ ifuk-ibot, mè iniben ikpọk mbum ijeen̄ asa nsabọn ebi ekariọọn̄ge inu geege.

²⁶Iin̄, Ute, îre ikeyi ke îneme owu irọrọ.”

²⁷Inenitumu si ibe, “Nte n̄a îkana otutuuk inu itap emi me ubọk. Kpunu ogwu òrọriọọn̄ ogwu Gwun̄ orebe, ilọ me lek ogwu Ute. Kpunu si ogwu òrọriọọn̄ ogwu Ute orebe, ilọ me lek Gwun̄ ya, mè ebi geelek înemebe Gwun̄ ya isasa Nte kan̄ ijeen̄.

²⁸“Enyi ebi efuuk otabe me owot, ebi akpan olobobe igak, ìna me lek n̄a, ke mânyi enyi isiki-efuuk.

²⁹Ìben ibot ogbugboon̄ n̄a agan̄ ge ìtoon̄ me oguga kinyi, mè ìkween̄ inu me ubọk n̄a, mije, emi ìre ogwu esuuk, mè ire si ogwu òsisiki lek me ugwem. Ire enyi inu, enyi mêkaan̄ utelelek me ibot ejit kinyi.

³⁰Mije, ogbugboon̄ n̄a ìkayọt ibebeme, akpan n̄a si îfet.”