Read obolo Mat 9 Bible Online

Mat 9 - obolo bible

Mat 9

¹Jisọs onenisaba inin̄ emen uji. Ọmọ melek ebi udun̄ kan̄ esasaba okwaan̄ ya ifo ama ere îkiluk.

²Mgbọ ema erebe ama ya, ebi ene ebeben enerieen̄ ge òkifiak orukan̄ ngọm me inyọn̄ ufo isa ijet ọmọ ibe igwa. Mgbọ Jisọs omun̄be ichechieek ife cha ekaan̄be, itutumu inyi ogwu ngọm ya ibe, “Gwun̄ enerieen̄, kat ejit, ke mîtele ijo kwun̄ inyi owu.”

³Mgbọ usini ebi ìjeen̄ Ikan ìkup me ere ya enọbe ikọ ya Jisọs otumube, ema ebebene ikinunuun̄ me etete kiban̄ ibe, “Ene yi ìkitumu ikọ unyechieen̄ ikeme Awaji.”

⁴Jisọs orọriọọn̄ inu ema ekikeek, mè inido ema ibe, “Ìre keke orọ enyi ekikeek ijo ekiket òkup ikeya me ejit kinyi?

⁵Ìre eyi owa ofet itutumu? Ìre ibebe: Mîtele ijo kwun̄ inyi owu? Sà ìre ibebe: Nan̄a keke, mè kat ufo kwun̄, mè je fo?

⁶Mgbọ keyi, emi mârọ inyi enyi eriọọn̄ ibe ke emi Gwun̄ Ebilene nkaan̄ unye me linyọn̄ yi itetele ijo inyi ene.” Itutumu inyi ogwu ngọm ya ibe, “Nan̄a keke, mè kat ufo kwun̄, mè je fo.”

⁷Me isi otutuuk kiban̄, ogwu ngọm ya onanan̄a ikeke mgbọ yaage, mè ije ifo.

⁸Mgbọ ebi ìkup me ere ya emun̄be inu ya òrọrọ, ukpook otetet ema enenen. Ema ebebene ikitọn̄ Awaji ogwu ònyinyi ebilene ojelek unye òkup ikeyi.

⁹Mgbọ Jisọs onan̄abe me ere ya ije inyi isi, inenimun̄ ogwu enerieen̄ ge ekigwen Matiyu, ogwu òkitip otitip ido okupbe me uwu ikwaan̄ kan̄, mè igwen ọmọ ibe, “Na, na gọọk emi.” Matiyu onanan̄a ikeke, mè igọọk Jisọs.

¹⁰Jisọs mè ebi udun̄ kan̄ enenisi uwu kè Matiyu. Matiyu otetet ema ichen. Owuwa ebi ìkibọkọ otitip ido, mè owuwa ebi kpekisun̄ Ikan kè Mosis enunu inigọọk Jisọs mè ebi udun̄ kan̄ ikirie inorie me uwu ya.

¹¹Ebi Farisi imumun̄ ikeya, ema edodo ebi udun̄ kè Jisọs ibe, “Ìre keke orọ mè ogwu ijejeen̄ kinyi ikigọọk ebi otitip ido mè ebi ijo igbaan̄ irie inorie?”

¹²Jisọs onọnọ ikọ ya ema edobe, mè itumu inyi ema ibe, “Ogwu lek onyebe ìkakiweek ogwu ofia. Îre ogwu lek ikanyege okiweek ogwu ofia.

¹³Enyi mîfuk me emen Ikpa Mbuban ibe ke Awaji ìbe, ‘Ǹkiweek ejit nsan, ǹkaweek ngwugwa.’[20] Ìfon, mè ìsi ìweek inu ikọ ya osibibe. Emi ǹkanu inenigwen ebi ata irọrọ. Ǹnu inenigwen ebi ijo irọrọ ibe egwu ekom.”

¹⁴Usen ge, ebi udun̄ kè Jọn ògwook mun̄ enunu me lek kè Jisọs, mè inido ọmọ ibe, “Ìre keke orọ eji mè ebi Farisi ekijin otu, ire, ebi udun̄ kwun̄ kpekijin otu?”

¹⁵Jisọs oyayaka ido ema ibe, “Ìre ebi egwenbe me ijọk ido-nwa ebejeje ikup me ufieejit, me ere ogwu òdo nwa okupbe me etete kiban̄? Ire, usen ge òkinu, mgbọ mêmọnọbe ogwu òdo nwa ya isan̄a me etete kiban̄. Mgbọ keya ke ema ebejin otu.

¹⁶“Kpekisa okpọkọ aya ekwut ichim ichit ere ògwagwak me lek oka ekwut, mije, okpọkọ aya ekwut ya môlibi iriaak, mè itaba chieen̄ ere ògwagwak ya ibook igak adasi mgbọ.

¹⁷Ikeya si, kpunu ogwu òkitap aya miin̄ me emen oka ogbokot ikpa anam, mije, oka ogbokot ikpa anam ya môrama ibum, mè ijijaka, mè ifin si miin̄ ya ichep. Ekitap aya miin̄ me emen aya ogbokot ikpa anam, miin̄ melek ogbokot îra ikikup me utelelek.”

¹⁸Ikọ ya ìkatata Jisọs me otu, enerieen̄ ge me lek ebi ibot uwu ntitiin̄ ebi Ju onunu, mè initọbọ ekpe me isi kan̄, mè itumu inyi ọmọ ibe, “Gwun̄ n̄a enenwaan̄ îkwu mgbọ keyi mgbọ keyi. Ire, soso, na si chak ubọk me lek, ke môgat ugwem.”

¹⁹Jisọs onanan̄a ikeke, mè igọọk ogwu enerieen̄ ya ije. Ebi udun̄ kan̄ si egọgọọk ọmọ ije.

²⁰Îkaan̄ ogwu enenwaan̄ ge eje okisibi me lek akọp mè acha iba. Mgbọ Jisọs mè ebi udun̄ kan̄ ekije ibesi uwu ogwu ibot uwu ntitiin̄ ya, ogwu enenwaan̄ yi onanan̄a me agan̄ udun̄ ije itibi etete ebi ene, mè inichak ubọk me otu utọn̄ ofọnti kè Jisọs.

²¹Ogwu enenwaan̄ ya îwuuk lek itumu ifieek me ejit kan̄ ibe, ìrere otu utọn̄ ofọnti kè Jisọs gaalek ke ọmọ okọt ichak ubọk me lek, ke lek kan̄ mônye.

²²Mgbọ îchakbe ubọk me otu utọn̄ ofọnti ya, Jisọs okakana chieen̄, mè imun̄ ọmọ, mè ibe ọmọ, “Gwun̄ enenwaan̄, kat ejit, ke ichechieek kwun̄ îgwa owu.” Mgbọ yaage, lek ogwu enenwaan̄ ya onyenye.

²³Mgbọ Jisọs mè ebi udun̄ kan̄ cha ejebe ire uwu ogwu ibot uwu ntitiin̄ ya, ema emumun̄ ebi ìkiwut otita ifit mkpa-ene, mè imun̄ si ubọk ebi ito enin̄be inwaan̄ uwu ya, mè ikikput okput.

²⁴Jisọs onyinyi ida ibe, “Enyi otutuuk ene ìsibi. Gwun̄ enenwaan̄ ya ìkakwukwu, ìkilalaak.” Ire, ebi ife cha ekekichak ọmọ.

²⁵Mgbọ îlapbe ema otutuuk ene igwook me oyet isan̄a, ininin̄ emen agwut ere emaan̄be gwun̄ enenwaan̄ ya, mè itet ọmọ me ubọk ibene. Gwun̄ enenwaan̄ ya onanan̄a ikeke.

²⁶Etip inu yi otataan̄ ikana otutuuk agan̄ ya.

²⁷Jisọs inanan̄a me ere ya ikije, ebi ǹnàan̄ iba ekekije igọọk ọmọ, mè ikitaan̄ ukpo ibe, “Gwun̄ kè Debit, kaan̄ ejit nsan me lek kiji.”

²⁸Mgbọ Jisọs ojebe isi inin̄ uwu ere îkikup, ebi ǹnàan̄ iba cha enenije inu me lek kan̄. Ọmọ onenido ema ibe, “Ìre enyi mîchieek ibe ke emi mâkọt igwa enyi?” Ebi ǹnàan̄ cha efọfọọk ibe, “Iin̄, Okaan̄-ene, eji mîchieek.”

²⁹Jisọs onenitoon̄ ubọk me chieen̄ kiban̄, mè itumu inyi ema ibe, “Ikup inyi enyi ike ichechieek kinyi okupbe.”

³⁰Ema ebebene ikimọọn̄ inu. Ire, Jisọs otataba ema ubọk me utọn̄ ibe mè ema ekakpa inu ya òrọrọ ìnyi ene geege.

³¹Ire, ema enanan̄a me uwu ya isibi, mè isi ikikpa etip ofolek kè Jisọs ikana otutuuk agan̄ ya.

³²Mgbọ ebi ǹnàan̄ cha ekinan̄a me uwu ya isibi, ebi ene esasa ogwu enerieen̄ ge ijo erumun̄ okupbe me emen inin̄ uwu ya ijet Jisọs ibe igwa. Ijo erumun̄ ya îrọ inyi ene ya ikayaka ìkọt ìtumu ikọ.

³³Jisọs onenilap ijo erumun̄ ya isibi me emen ene ya. Mgbọ yaage ogwu mbuuk ya obebene ikitumu ikọ. Inu ya okwukwu otutuuk ebi ìkup me ere ya lek enenen. Ema ebebene ikitumu ibe ke ema kperarak imun̄ ojelek inu òkup ikeyi me ido Ijeren.

³⁴Ire, ebi Farisi ìkup me ere ya ekekitumu ibe ke Jisọs ìkisa unye ogwu ibot ebi ijo erumun̄ ilap ijo erumun̄ isibi me emen ebi ene.

³⁵Jisọs okekije ikana otutuuk ama ile mè asabọn ama geelek, mè ikijeen̄ inu me emen uwu ntitiin̄ kiban̄, mè ikilook ata etip eyi mkpulu eyi Awaji, mè ikigwa orukan̄ mè ufiak geelek òkup esese esese.

³⁶Mgbọ îmun̄be ogbogbo ebi ene cha ekigbuku igọọk ọmọ, itoto ema nsan, mije, ema mîkaan̄ owuwa ufialek. Melek si, kpunu ogwu òkitap ubọk inyi ema. Ema ekititeek kubọk arọọn̄ ikakaan̄ge ogwu okekikpukpo.

³⁷Inenitumu inyi ebi udun̄ kan̄ ibe, “Ìkpọ, inu eberọkọ me uko îwa me atikọ, ire, ebi ikwaan̄ ìre ene inen mè inen gaalek.

³⁸Eya orọ, ìbeek Okumugwem, ogwukaan̄ ikwaan̄ irọrọkọ inu me uko, ibe iria owuwa ebi ikwaan̄ itap me uko kan̄, mè enerọkọ inu me uko.”