Read obolo Mak 2 Bible Online

Mak 2 - obolo bible

Mak 2

¹Mgbọ usen inen mè inen orakabe, Jisọs ogwugwu ikom ifo Kapanọm. Etip onenitaan̄ ikana ibe ke ọmọ me uwu ge me ama ya.

²Ebi ene efafan̄a inu, mè inin̄ ijot emen uwu ya, mè igwook me oyet, isi oyet uwu ya si ìkata ene. Jisọs okekitumu ikọ Awaji inyi ema.

³Mgbọ îkitumu ikọ ya, ebirieen̄ ini ebeben ogwu enerieen̄ ge òkifiak orukan̄ ngọm ibesa ijet ọmọ igwa.

⁴Ire, ubọk ebi ene enin̄be inwaan̄ uwu ya, ema kpekọt isa ene ya ije ire lek kè Jisọs. Eya orọ, ema esisi inene inyọn̄ otoon̄-uwu ya, mè ichili nruruk me otoon̄-uwu ya itat me ere Jisọs okweekbe, mè iben ogwu ngọm ya me inyọn̄ ufo itap itibi me chieen̄ nruruk ya, mè igele ọmọ isiki iniyik me ijọn̄ me isi kè Jisọs.

⁵Mgbọ Jisọs omun̄be ichechieek ife chi ekaan̄be, itutumu inyi ogwu ngọm ya ibe, “Gwun̄ enerieen̄, mîtele ijo kwun̄ inyi owu.”

⁶Usini ebi ìjeen̄ Ikan ìkup me ere ya ekekinunuun̄ me emen ejit kiban̄ ibe,

⁷“Ìre ene yi ìjeje ikitumu ikọ ikeyi? Ene yi ìkitumu mbuban ikọ ikeme Awaji. Ìre ekene obokọt itele ijo inyi ene, ilọ Awaji gaalek?”

⁸Mgbọ yaage, Jisọs orọriọọn̄ me emen ekwukwu kan̄ ibe ke ema mêkikeek inu yi me emen ejit kiban̄, mè inido ema ibe, “Ìre keke orọ enyi ekikeek ojelek inu òkup ikeyi?

⁹Ìre eyi owa ofet itutumu inyi ene yi òkifiak orukan̄ ngọm? Ìre ibebe: Mîtele ijo kwun̄ inyi owu? Sà ìre ibebe: Ben ufo kwun̄, mè je fo?

¹⁰Ire, mâjeen̄ enyi ibe ke emi Gwun̄ Ebilene nkaan̄ unye me linyọn̄ keyi itetele ijo inyi ene.” Inenitumu inyi ogwu orukan̄ ngọm ya ibe,

¹¹“M̀be owu, nan̄a keke, ben ufo kwun̄ je fo!”

¹²Me chieen̄ otutuuk kiban̄, ogwu orukan̄ ngọm ya onanan̄a ikeke mgbọ yaage, mè iben ufo kan̄ ije isibi ifo. Ukpook otetet ema otutuuk ene. Ema ebebene ikitọn̄ Awaji, mè ikibe ke ema kperarak imun̄ ojelek inu òkup ikeyi.

¹³Jisọs oneninan̄a me Kapanọm isibi, mè ikpọk isi agba okwaan̄ oyô Galili. Ogbogbo ene esisibi igọọk ọmọ, ibebene ikijeen̄ ema inu.

¹⁴Me mgbọ îkije ifo isi, inenimun̄ Libai gwun̄ kè Alifiọs ogwu òkibọkọ otitip ido okupbe me uwu ikwaan̄ kan̄, mè igwen ọmọ ibe, “Na, na gọọk emi!” Libai onanan̄a ikeke, mè igọọk Jisọs.

¹⁵Sọnja mgbọ iraraka, Jisọs onenisi uwu kè Libai, mè ikirie ichen. Owuwa ebi ìkitip otitip ido, mè ebi kpekisun̄ Ikan kè Mosis mîgọọk Jisọs mè ebi udun̄ kan̄ inire uwu ya, mè igọọk isiki ikweek me lek ikasi ikirie inorie. Owuwa ene mîgọọk inire uwu ya.

¹⁶Usini ebi ìjeen̄ Ikan ìrere ebi Farisi, enenimun̄ Jisọs melek ebi kpekisun̄ Ikan kè Mosis, mè ebi ìkibọkọ otitip ido egbaan̄be ikweek irek me ere ge ikirie inorie, mè ikido ebi udun̄ kan̄ ibe, “Ìre keke orọ mè ene yi ikigọọk ebi ìkitip otitip ido, mè ebi ijo ife chi igbaan̄ ikweek ikirie inorie?”

¹⁷Jisọs onọnọ ikọ ya ema ekido, mè ifọọk ema ibe, “Ebi lek onyebe kpekiweek ogwu ofia, îre ebi lek ikanyege ekiweek ogwu ofia. Emi ǹkanu me linyọn̄ inenigwen ebi ata irọrọ, îre ebi ijo irọrọ ke nnu inenigwen ibe egwu ekom.”

¹⁸Me mgbọ ge ebi udun̄ kè Jọn mè ebi Farisi ekijin otu, îkaan̄ ebi ìnunu me lek kè Jisọs, mè inido ọmọ ibe, “Ìre keke orọ ebi udun̄ kè Jọn ògwook mun̄ mè ebi udun̄ ebi Farisi ekijin otu, ire, ebi udun̄ kwun̄ kpekijin otu?”

¹⁹Jisọs ofọfọọk ema ibe, “Ìre ebi ìsi ijọk ido-nwa mêjin otu me mgbọ ogwu òdo nwa okupbe melek kiban̄? Eyi ogwu òdo nwa okupbe melek kiban̄, eya ìkpokọt irọ.

²⁰Ire, usen òkinu, mgbọ mêsan̄abe ogwu òdo nwa isan̄a me etete kiban̄. Îre mgbọ keya ke ema ebejin otu.

²¹Kpunu ogwu òkisa okpọkọ aya ekwut ichim ichit ere ògwagwak me lek oka ekwut, mije, okpọkọ aya ekwut ya môlibi iriaak mgbọ mêgwọkbe ekwut ya, mè itaba chieen̄ ere ya igwak ibook igak ubọk îkupbe me adasi mgbọ.

²²Ikeya si, kpekitap aya miin̄ me emen oka ogbokot ikpa anam, mije, unye aya miin̄ ya môrama ogbokot ya ibum. Mônenire, miin̄ me ichep, ogbokot me ichep. Eya orọ, ekitap aya miin̄ me emen ayaya ogbokot ikpa anam.”

²³Me Usen Mbuban ge, Jisọs mè ebi udun̄ kan̄ ekekije iraka me emen uko akpa. Mgbọ ema ekije, ebi udun̄ kan̄ ekekifan̄a akpa me uko ya itaka.

²⁴Ebi Farisi ìkukup imun̄ ema ekifaan̄ akpa cha enenido Jisọs ibe, “Ìre keke orọ ebi udun̄ kwun̄ ekirọ inu Ikan obe ekarọ me Usen Mbuban?”

²⁵Jisọs ododo ema ibe, “Ìre enyi kpefuk inu Debit orọbe mgbọ uraafiọọn̄ otakabe ọmọ mè ebi melek kan̄, ema kpekaan̄ inu eberie?

²⁶Debit ìjeje inin̄ emen Uwu Awaji, mè isi imọnọ fituru esabe igwa ngwugwa inyi Awaji itaka. Inu yi ìrọ me mgbọ Abiata orebe ogwu òban Awaji. Me ubọk ikan kiban̄ okupbe, fituru ya ìkup inyi ebi ngwugwa gaalek. Ire, Debit îtaka, mè iche si inyi ebi melek kan̄ etaka.”

²⁷Me ikakana ikọ kan̄ igwook, Jisọs otutumu inyi ema ibe, “Awaji ìbak me lek ebilene isan̄a Usen Mbuban isibi, ìkabak me lek Usen Mbuban ìrom ebilene.

²⁸Eya orọ, emi Gwun̄ Ebilene ìre si Ogwukaan̄ Usen Mbuban.”