Read obolo Ikan 1 Bible Online

Ikan 1 - obolo bible

Ikan 1

¹Echichi ìre ikọ Mosis otumube inyi otutuuk ebi ido Ijeren me usaba agan̄ okwaan̄ Jodan me agan̄ mbum-ura, me emen èwê me iteke ijọn̄ Araba,[1] me ere òkibene isi ikpọ Sufu, me etete Paran mè Tofen mè Leban mè Aserot mè Di-Jayabu.

²Inanan̄a me ogoon̄ Orebu ije me oniin̄ ogoon̄ Seya inire Kades Bania ìkibọkọ akọp mè usen ge.

³Me adasi usen me òso akọp mè onyan̄ ge, me òso akọp acha ini eyi ema enan̄abe me Ijipiti isibi, Mosis oneniben otutuuk inu Okumugwem onyibe ọmọ ida ofolek ebi Ijeren ikpa inyi ebi Ijeren.

⁴Inu yi ìmọnọ irek me mgbọ Mosis otimbe ikpan̄ Siyon ogwu ubọọn̄ ebi Amọ ogwu òluk me Esibon ikikpulu, mè itim si ikpan̄ Ôgu ogwu ubọọn̄ Basan me Ederei, ogwu òkiluk me ama Asitarot ikikpulu.

⁵Mgbọ ebi Ijeren ekupbe me inyọn̄ ijọn̄ ido Mowabu me usaba agan̄ okwaan̄ Jodan, Mosis onenikikpa Ikan chi iwele inyi ema ibe,

⁶“Mgbọ eji ekupbe me Orebu, Okumugwem Awaji kiji otutumu inyi eji ibe, ‘Enyi mîra ikup ifiin̄ ikem me lek ogoon̄ keyi!

⁷Ìgwu ìkom ìje ìfo agan̄ inyọn̄ ogoon̄ ebi Amọ, mè ido ebi ìluk me iteke ijọn̄ Araba, mè inyọn̄ ogoon̄, mè inyọn̄ orioon̄ isi ogoon̄ agan̄ ichep-ura, mè èwê agan̄ osiki, mè agba okwaan̄, ibene me inyọn̄ ijọn̄ ebi Kenan ire Lebanọn, mè isi igwook me lek okwaan̄ ile ya, òrere okwaan̄ Yuferetis.

⁸Ìkpọ, nra ikana ijọn̄ yi itap enyi me ubọk. Ìje ìnin̄, mè ìbọkọ otutuuk ijọn̄ ya me ìrot, mije, eyiyi ìre ijọn̄ emi Okumugwem nnyan̄abe ibot inyi ebi nte nte kinyi Ebereyam mè Ajiki mè Jekọp ibe ke mâsa inyi enyi ebi owot iman kiban̄ mgbọ ukot kiban̄ môrakabe.’ ”

⁹Mosis onenitumu inyi ebi Ijeren ibe, “Me ike mgbọ ya, ntumu inyi enyi ibe ke emi gaalek m̀kpayaka ikọt ikikpulu enyi.

¹⁰Okumugwem Awaji kinyi îrọ inyi enyi emumana ewa enenen me otu ifuk. Me mgbọ keyi, enyi eyaka iniwa ikup kubọk ntoronyan̄ òkup me akpabin inyọn̄.

¹¹Kè Okumugwem Awaji ebi nte nte kinyi irọ inyi enyi emumana obop mgbọ egak ike enyi ekupbe mgbọ keyi, mè igbana si enyi kubọk îchieekbe enyi use irọrọ!

¹²Mgbọ keyi, ìre emi gaalek m̀bajeje ikikọt ibeme ufialek kinyi, mè ikikpọ chieen̄ me lek uyọrọlek kinyi mè gọlọgọlọ òkup me etete kinyi?

¹³Eya orọ, ìkpọ me etete ebi otoko kinyi ge ge, mè ìgobo ebi ìriọọn̄ inu, ebi ìkigobo inu itet, mè ire si ebi ebi ene ekinyi ulibi, inyi emi ǹto ema me ibot, ibe ekekpọ enyi chieen̄ me lek.

¹⁴“Enyi efọfọọk emi ibe, ‘Inu ya owu otọtbe irọrọ înwọn.’

¹⁵“Ikeya ke nnisa ebi ìsibi isi chi enyi egobobe isibi me otoko kinyi geelek, ìrere ebi ìriọọn̄ inu, ebi ebi ene ekinyi ulibi, ito me ibot, mè inyi ema unye ibe ekekpulu enyi. Usini kiban̄ ebekikpulu urum ene me obop me obop, usini ebekikpulu me efit me efit, usini ebekikpulu me akọp go go, usini ebekikpulu me akọp me akọp kubọk ebi ibot inyi otoko kiban̄.

¹⁶“Me ike mgbọ ya, ǹnyinyi ebi ibot oyerebet kinyi ida ibe, ‘Ìgban̄ gọlọgọlọ òkup me etete ebi ngwan̄ kinyi, mè ìsibi unen oyerebet ìnyi ngwan̄ iba ebi Ijeren, mè ìre ogwu Ijeren mè ogwu ichen.

¹⁷Ikasa oyerebet ìriọọn̄ ene geege isi. Ike enyi enọbe ikọ me otu ogwu sọntiik, ìnọ si ikeya me otu ogwu ilile. Ikalibi si ene geege chieen̄, mije, oyerebet geelek ìre eyi Awaji. Ire ikaan̄ ikọ òyọyọt igak enyi, ìsa ìjet emi, ke mâkpọ chieen̄ me lek keya.’

¹⁸Me mgbọ ya si, nnyi enyi ida òfo me lek otutuuk inu geelek enyi ebekirọ.”

¹⁹“Eji eneninan̄a me Orebu, ike Okumugwem Awaji kiji onyibe eji ida, mè inijijen̄e ikana me emen èwê ya eyi òkpọkpọ iwele mè ikaan̄ ukpook, eyi enyi emun̄be, eyi òkup me oniin̄ ekije isi ijọn̄ ogoon̄ ogoon̄ ebi ido Amọ. Ikeya ke eji eje mege inire Kades Bania.

²⁰Nnenitumu inyi enyi ibe ke enyi mîra ije inire inyọn̄ ogoon̄ ebi Amọ, ere Okumugwem Awaji kiji obosa ikana itap eji me ubọk.

²¹Ìkpọ! Okumugwem Awaji kinyi îra inyi enyi ijọn̄ ya! Ìjibi ìnin̄, mè ìbọkọ ìkaan̄ me ìrot, kubọk Okumugwem Awaji ebi nte nte kinyi otumube inyi enyi. Ikatet ukpook, ikafieek si owot!

²²“Enyi otutuuk ene eneninu me lek n̄a, mè inibe emi, ‘Eji eneria ebi ene ibe edasi eje esi etaak chieen̄ ekpọ-nu ike ijọn̄ ya okupbe, mè esa etip ejet eji òfo me lek oniin̄ eji ebeje mè ama ile echi eji mênin̄be.’

²³“Otitọt ya enyi etọtbe okpọkpọ initat emi me lek. Nnenigobo akọp mè ene iba me etete kinyi, ge me otoko ge, mè iniria ema isibi.

²⁴Ema enanan̄a ije, mè isi inin̄ inyọn̄ ijọn̄ ido ogoon̄ ogoon̄ ya, mè ije isi ire iteke ijọn̄ Esikon, mè ijijen̄e ikana otutuuk inyọn̄ ijọn̄ ya ikitaak chieen̄ ikpọ ubọk îkupbe.

²⁵Ema mîtiten̄e mfut ònan̄a me inyọn̄ ijọn̄ ido ya isa igbaalek ika ijet eji, mè isa etip ijet eji ibe ke îre atalek ata ijọn̄ ke Okumugwem Awaji kiji obosa inyi eji.”

²⁶“Ire, enyi kpechieek ijeje isi ibọkọ ijọn̄ ya. Kpan̄asi ikeya, enyi ekpakpaka ibot, mè ijit irọrọ ida Okumugwem Awaji kinyi.

²⁷Enyi ekukup me uwu ọfọ kinyi ikinunuun̄ ibe, ‘Okumugwem ìchacha eji, mè isa me ejit ochicha isan̄a eji isibi me Ijipiti, ibonikana eji itap me ubọk ebi Amọ ibe ekpan̄ eji esan̄a.

²⁸Mgbọ keyi, ìre agan̄ owa ke eji ebetap ibot? Ukpatu ebi ngwan̄ kiji îtap eji ukpook igak emen! Ema ebe ke ebi ife cha mînye lek enenen mè ijọn̄ọ enenen igak eji, ke ama ile kiban̄ geelek îmiin̄ mè iwele, ke ewawak si mgban ibene ichep me inyọn̄ ikat ikana ama cha otutuuk. Mîtumu si ibe ke ema mîsa chieen̄ kiban̄ imun̄ ebi Anak, òrere ebi ujọn̄ọ ile cha, me ere ya.’

²⁹“Emi nnenitumu inyi enyi ibe, ‘Ikafieek owot, ikatet si ukpook me lek ife cha.

³⁰Mije, Okumugwem Awaji kinyi, ogwu òkije me isi kinyi, ọmọ obotim akọn̄ me ibot kinyi, ike îtimbe inyi enyi me Ijipiti, kubọk enyi esabe chieen̄ kinyi gaalek si imun̄.

³¹Me emen èwê si, enyi mîmun̄ ike Okumugwem Awaji kinyi obenbe enyi ikaan̄ me ubọk kubọk ute okiben ogwu gwun̄, mè isa enyi ije me oniin̄ kinyi mege inire ere keyi.’

³²Ire, me emen otutuuk inu chi geelek, enyi kpetoon̄ si ejit me lek Okumugwem Awaji kinyi,

³³ogwu òkije enyi me isi ikisi iweek ere inyi enyi egwuun̄ uwu ọfọ kinyi, mè ikije me isi kinyi kubọk ukan̄, ikijeen̄ enyi oniin̄ me eririeen̄, mè ikije kubọk oduku inyọn̄, ikijeen̄ enyi oniin̄ me ikarek.

³⁴“Okumugwem onọnọ inu ya enyi etumube, mè inaan̄ ejit, mè inyan̄a ibot ibe,

³⁵‘Kpunu kubọk ene ge ikeyi, me etete ijo ebi ukot keyi, ogwu òborieen̄ chieen̄ me lek ata ijọn̄ ya nnyan̄abe ibot ibe ke mâsa inyi ebi nte nte kinyi,

³⁶ilọ me lek Kelep gwun̄ kè Jefune. Ọmọ gaalek oborieen̄ chieen̄ me lek ijọn̄ ya. Ọmọ si, melek bọn kan̄, ke mbasa ijọn̄ ya eyi ọmọ ojakbe ukot me inyọn̄ inyi, mije ọmọ osabe ejit ge igọọk Okumugwem.’

³⁷“Mije inu ya enyi erọbe, Okumugwem onanaan̄ si ejit me lek n̄a, mè itumu inyi emi ibe, ‘Owu si, owu òkponin̄ inyọn̄ ijọn̄ ya!

³⁸Ire, Josuwa gwun̄ kè Nun, ogwu òkitap ubọk inyi owu, mônin̄. Tap ọmọ efuuk me owot, mije, îre ọmọ obosa ebi Ijeren ije isi ibọkọ ijọn̄ ya me ìrot.

³⁹Asa nsabọn kinyi cha, ebi enyi ebe ke mêkana inu efumbe me akọn̄, ebi kperiọọn̄-nu ata inu mè ijo inu, îre ema ebenin̄ inyọn̄ ijọn̄ ya. Îre ema ke mbasa ijọn̄ ya inyi. Îre ema si ebekaan̄ ijọn̄ ya me ìrot.

⁴⁰Ire enyi, ìgwu ìkom, mè ìje ìfo agan̄ emen èwê me lek oniin̄ okwaan̄ Anyiaan̄.’

⁴¹“Enyi enenifọọk ibe, ‘Eji mîrọ Okumugwem ijo inu! Eji mêsi, mè itim akọn̄ ya kubọk Okumugwem Awaji kiji onyibe eji ida.’ Enyi otutuuk ene eteteen̄ nroon̄ akọn̄ kinyi ikwaan̄ me lek, mè ikikeek ibe ke îfet isisi itim akọn̄ me lek ebi ido ijọn̄ ogoon̄ ogoon̄ ya.

⁴²“Ire, Okumugwem otutumu inyi emi ibe, ‘Tumu nyi ema ibe ekasi ìtim akọn̄ ya, mije ke emi m̀kpakup melek kiban̄. Ire ema isi, ebi ochicha kiban̄ mêtim ikpan̄ ema.’

⁴³“Emi mbeben inu ya itumu inyi enyi, ire, enyi kpegban̄ utọn̄. Enyi ekpakpaka ibot me lek ida Okumugwem, mè isa me ugumu ijibi akọn̄ isi lek ebi ido ogoon̄ ogoon̄ ya.

⁴⁴Ebi Amọ ebi ìluk me inyọn̄ ogoon̄ cha enanan̄a isibi, mè ijibi akọn̄ ikweek enyi, mè ililaba enyi ikana ere kubọk ego akwọọk okililaba ene, mè itim akọn̄ ikpan̄ enyi, ibene me Seya mege isi igwook me Oruma.

⁴⁵Enyi egwugwu ikom ika, mè inikito ito igwen Okumugwem. Ire, Okumugwem ìkachieek inọnọ ida ito kinyi, ìkagbagban̄ si utọn̄ me lek kinyi.

⁴⁶Sa me ikeya, enyi ebabia me Kades, mè ikup ijọn̄ọ mgbọ me ere ya enenen.”