Read obolo Ikan 11 Bible Online

Ikan 11 - obolo bible

Ikan 11

¹“Ìma Okumugwem Awaji kinyi, mè ìkirọ otutuuk inu geelek îweekbe ibe enyi erọ, mè ìkisun̄ otutuuk orọmijọn̄ kan̄ mè ikan kan̄, mè ìkirọ otutuuk inu geelek îtọbe ibe enyi ekerọ. Ìkitet lek ìnye ìkirọ inu chi otutuuk mgbọ geelek.

²Ìriọọn̄ me chereyi ibe ke ìkare nsabọn kinyi ekup imun̄ osusut cha ònan̄a me ubọk Okumugwem Awaji kinyi. Ìkare nsabọn kinyi emun̄ umin ubọọn̄ kan̄, mè ikpele unye kan̄, mè unye oguga kan̄.

³Ìkare nsabọn kinyi emun̄ uyeke uyeke inu kan̄, mè nke nke inu echi îrọbe me etete ebi Ijipiti, mè echi îrọbe me lek ogwu Fero mè lek otutuuk ido kan̄.

⁴Ìkare nsabọn kinyi esa chieen̄ imun̄ inu îrọbe urum akọn̄ ebi Ijipiti mè inyinya kiban̄ melek otutuuk uji akọn̄ kiban̄, eyi îsabe mun̄ okwaan̄ Anyiaan̄ imeen̄ ema isan̄a, me mgbọ ema ekigọọk enyi efuuk efuuk ikiweek ikpakpan̄ enyi isan̄a. Okumugwem ìjijijaka ema isan̄a mege inire chereyi.

⁵Ìkare nsabọn kinyi emun̄ inu Okumugwem orọbe inyi enyi me emen èwê, mege enyi ejebe inire ere keyi.

⁶Ìkare si nsabọn kinyi emun̄ inu îrọbe Datan mè Abiram, bọn ebirieen̄ kè Eliabu ogwu otoko kè Ruben mgbọ ijọn̄ okabe otu, mè iben ema imeen̄, ema melek otutuuk ebi uwu kiban̄, mè uwu ọfọ kiban̄, mè otutuuk ebi usun̄ kiban̄ mè anam kiban̄ mè inu geelek ema ekaan̄be, ema otutuuk echechieen̄ ita me ejit ijọn̄, me etete otutuuk ebi Ijeren.

⁷Îre enyi me lek kinyi esa chieen̄ kinyi imun̄ otutuuk ikpele inu chi geelek Okumugwem orọbe.

⁸“Eya orọ, ìkirọ otutuuk ikọ chi geelek îtọbe, echi emi nkinyi enyi ida chereyi ibe erọ, inyi enyi ekaan̄ efuuk eje enin̄ inyọn̄ ijọn̄ ya, eyi enyi ebesaba isi ibọkọ isak,

⁹mè enyi ekefuk ugwem me inyọn̄ ijọn̄ ya eyi Okumugwem Awaji kinyi onyan̄abe ibot inyi ebi nte nte kinyi ibe ke ọmọ môsa inyi ema melek bọn owot iman kiban̄. Ijọn̄ ya ìre ata ijọn̄ òkisibi anam mè mfut uti.

¹⁰Mije, ijọn̄ enyi ebesi ibọkọ isak ìkakup kubọk ijọn̄ Ijipiti, ere enyi enan̄abe isibi. Me Ijipiti, enyi isiwop uko, enyi mîra ikisa ukot ibum okolo me ijọn̄, inyi mun̄ ikilibi inin̄ inirọ inyi inu itibi ijaan̄, kubọk uko inwan̄ usun̄.

¹¹Ire, ijọn̄ ere enyi ebesaba isi ibọkọ isak ìre ijọn̄ ogoon̄ mè iteke, eyi òkimeen̄ mun̄ ibot òkirep inan̄a me isinyọn̄ igwook me ijọn̄.

¹²Îre ijọn̄ eyi Okumugwem Awaji kinyi gaalek okikpọ chieen̄ me lek. Bene me ibebene acha si re òta acha, chieen̄ Okumugwem Awaji kinyi ìkakinan̄a me lek ijọn̄ ya.

¹³“Eya orọ, ire enyi igbala chieen̄ ikirọ otutuuk ikọ Okumugwem otọbe, kubọk nkitumu inyi enyi cherekeyi ibe enyi ekemun̄ Okumugwem Awaji kinyi me chieen̄, mè eketọbọ ibot enyi ọmọ me otutuuk ejit kinyi, mè otutuuk ibot ejit kinyi,

¹⁴Okumugwem môkirọ inyi ibot ikirep igwook me ijọn̄ kinyi me ibot mgbọ kan̄, me òta ura mè aya otu ura, inyi mfut uko kinyi ikitibi ijaan̄, inyi enyi mêkirọkọ akpa kinyi ogbogbo, mè ikikaan̄ ayaya miin̄ mè aran̄ owuwa owuwa.

¹⁵Mbubet mè inwan̄ oron môtibi si ijaan̄ inyi ebi kè anam kinyi. Enyi melek anam kinyi mêkekirie inorie ijot otu.

¹⁶Ire, ìgbala chieen̄, inyi ejit kinyi ikafiaan̄ enyi, mè enyi ekana egọọk ofifi awaji cha, mè esi eketọbọ ebum enyi, mè eketọbọ si ibot enyi.

¹⁷Sa me ikeya, unaan̄-ejit Okumugwem môyok me lek kinyi. Ọmọ mônenigon akpa isinyọn̄ ichit, inyi ibot ikayaka ìrep ìgwook me ijọn̄. Ijọn̄ mônenichat, ìkpoyaka isibi inu geege. Enyi mênenikwaan̄ ita mije uraafiọọn̄ me inyọn̄ ata ijọn̄ ya eyi Okumugwem obosa inyi enyi.

¹⁸“Ìtet ikọ chi nkitumu inyi enyi chereyi me emen ejit kinyi, mè ibot ejit kinyi. Ìtobo ema kubọk inu ijejeen̄ me lek ubọk kinyi, mè ìtobo ema si ìkam me inyọn̄ okwut isi kinyi me agbagba chieen̄ iba kinyi.

¹⁹Ìjeen̄ nsabọn kinyi inu chi, mè ìkitumu ikọ ofolek inu chi mgbọ enyi esikibe ikweek irek me uwu, mè mgbọ enyi ekije me ejit oniin̄, mè mgbọ enyi esikibe ilaak, mè mgbọ enyi enan̄abe ikeke.

²⁰Ìge inu chi me ubọk afọn̄ uwu kinyi mè lek otunchit kinyi.

²¹Sa me ikeya, enyi melek nsabọn kinyi mêfuk ugwem me inyọn̄ ijọn̄ ya Okumugwem onyan̄abe ibot inyi ebi nte nte kinyi ibe ọmọ môsa inyi ema, inyi ire eyi kiban̄ mege ire mgbọ geelek inyọn̄ mè ijọn̄ môkupbe ire.

²²“Eya orọ, ire enyi ikirọ otutuuk ikọ chi geelek echi Okumugwem otọbe, kubọk emi nkinyi enyi cherekeyi ibe enyi ekemun̄ Okumugwem Awaji kinyi me chieen̄, mè ekeje me otutuuk oniin̄ kan̄, mè etet ọmọ ekaan̄ enye,

²³Okumugwem môrieen̄ otutuuk ebi ido cha isan̄a enyi me isi, inyi enyi ekọt ebọkọ ijọn̄ ido ebi ìmimiin̄ enenen igak enyi, mè inye lek si igak enyi, esak.

²⁴Ere geelek akajit ukot kinyi môjakbe môkana eyi kinyi, ibene me lek èwê isi ire Lebanọn, mè ibene me okwaan̄ Yuferetis isi ire lek okwaan̄ agan̄ osiki, òrere okwaan̄ Mediterenia.

²⁵Kpunu ene geege òbokọt ikeke ida enyi. Ere geelek enyi mêsibe, Okumugwem Awaji kinyi môtap ukpook kinyi mè urimi lek kinyi igak me emen ebi ìluk me otutuuk inyọn̄ ijọn̄ ya, kubọk îchieekbe enyi use.

²⁶“Ìkpọ! Emi ǹkito inu iba, ugbana mè ogbo, me isi kinyi cherekeyi, ibe enyi egobo.

²⁷Ugbana môkup inyi enyi, ire enyi ikirọ ikọ Okumugwem Awaji kinyi otọbe, echi nkinyi enyi cherekeyi.

²⁸Ogbo môkup inyi enyi, ire enyi kpekirọ ikọ Okumugwem Awaji kinyi otọbe, mè itele oniin̄ kan̄, kubọk emi nkinyi enyi ida cherekeyi, mè ikana igọọk ofifi awaji cha, echi enyi kpewuuk lek iriọọn̄ inu ofolek.

²⁹Mgbọ Okumugwem Awaji kinyi isisa enyi ije initap me inyọn̄ ijọn̄ ya eyi enyi ebenibọkọ isak, ìje ìnene inyọn̄ ogoon̄ Gerijim, mè ìkup me ere ya ìtan̄a ugbana ìgwook, mè ìje ìnene si inyọn̄ ogoon̄ Eban, mè ìkup me ere ya ìtan̄a ogbo ìgwook.

³⁰Kubọk enyi eriọọn̄be, ogoon̄ chi ìkup me usaba okwaan̄ Jodan, me oniin̄ agan̄ osiki, me agba lek ikpele ilip mbuban me More, me inyọn̄ ijọn̄ ebi Kenan, ebi ìluk iriaak iteke Araba me agba lek Giligan.

³¹Me mgbọ keyi, enyi mênisaba okwaan̄ Jodan isi ibọkọ ijọn̄ ya, eyi Okumugwem Awaji kinyi obosa inyi enyi, isak. Enyi isibọkọ ijọn̄ ya, mè ikiluk me ere ya,

³²ìgbala chieen̄ ìkisun̄ otutuuk ikan chi, mè ìkirọ otutuuk inu Okumugwem onyibe ida ibe enyi ekerọ, kubọk nkitumu isibi me isi kinyi cherekeyi.