Read obolo Ikan 12 Bible Online

Ikan 12 - obolo bible

Ikan 12

¹“Echichi ore orọmijọn̄ mè ikan echi enyi ebekiluk ugwem ikpọ me lek me inyọn̄ ijọn̄ ya, eyi Okumugwem Awaji ebi nte nte kinyi onyibe enyi ibe enyi ebọkọ esak. Enyi mêkisun̄ otutuuk ikan chi otutuuk usen ugwem kinyi me inyọn̄ ijọn̄ ya.

²Ìjijaka otutuuk isi-ijọn̄ geelek ere ebi ido cha enyi eberieen̄ isibi ekitọbọ ebum inyi awaji kiban̄ ìsan̄a kpai, echi òkup me inyọn̄ ubene ubene ogoon̄, mè inyọn̄ orioon̄, mè ìyaka ire me ebon otutuuk uti geelek òsasan agọọk.

³Ìgbugbọ otutuuk ntook ngwugwa kiban̄. Ìbak otutuuk ewuuk mfaka kiban̄ cha eyikbe ìkeke ìkeke, mè ìtap ukan̄ ìwọp otutuuk uti yọk Asera kiban̄ cha. Ìchon otutuuk mkpọmfaka awaji kiban̄ cha ìgwook, mè ìtutuku erieen̄ awaji kiban̄ cha ìsan̄a me ere cha.

⁴Ikakirọ ojelek inu òkup ikecha ìsa ìkitọbọ ebum ìnyi Okumugwem Awaji kinyi.

⁵Ire, ìweek ìriọọn̄ me etete otutuuk otoko kinyi, ere Okumugwem Awaji kinyi môgobobe inyi lek kan̄, ere ọmọ obokup, ere ebekimin erieen̄ kan̄. Îre ere keya gaalek ke enyi ebekisi itọbọ ebum.

⁶Ere keya si ke enyi ebekisa ngwugwa ewọwọp iriọk, mè esese ngwugwa geelek ikinu, mè inyinyi irek ge me akọp irek kinyi, mè inyinyi òsibi esese kinyi, echi enyi ebekisa isan̄a use enyi echieekbe, mè inyinyi ata ejit kinyi, mè inyinyi echi bọn ichili owot eriembuuk kinyi mè ebot kinyi mè arọọn̄ kinyi.

⁷Me ere keya ke enyi ebekup me isi Okumugwem Awaji kinyi, enyi melek ebi ototun̄ ukan̄ kinyi, ikirie mè ikinwọọn̄ oruru ubọk ikwaan̄ kinyi, mije, Okumugwem Awaji kinyi îgbana enyi.

⁸“Enyi kpebekiluk ugwem wọlọwọlọwọlọ kubọk eji ekirọ me ere keyi mgbọ keyi, eyi ene geelek okirọ inu òneme ọmọ igọọk ubọk ònwọnwọn ọmọ me lek.

⁹Mije, mege inire mgbọ keyi, enyi kpejeje-nu ire ere isiki-efuuk ya, mè ijọn̄ ìrot ya, eyi Okumugwem Awaji kinyi obosa inyi enyi.

¹⁰Enyi mêsaba okwaan̄ Jodan itoon̄, mè isi iluk me inyọn̄ ijọn̄ ya Okumugwem Awaji kinyi obosa inyi enyi me ìrot. Ọmọ môneninyi enyi isiki-efuuk, mè irọ inyi ebi ochicha kinyi ìgbagban ikana enyi ekayaka ìsisaak enyi. Enyi mêniluk me utelelek.

¹¹Me mgbọ ya, ere geelek Okumugwem Awaji kinyi môgobobe inyi lek kan̄, ibe ìre ere ebekimin Erieen̄ kan̄, îre ere keya ke enyi ebekisa otutuuk inu cha nnyibe enyi ida ofolek inu. Ere ya ke enyi ebekisa ngwugwa ewọwọp iriọk kinyi inu, mè esese ngwugwa kinyi, mè inyinyi eyi irek ge me akọp irek kinyi, mè otutuuk inyinyi òsibi esese echi enyi echieekbe use ibe ke enyi mêsa inikinyi Okumugwem.

¹²Me ere ya ke enyi mêkikup irie ijọk me isi Okumugwem Awaji kinyi, enyi melek nsabọn kinyi ebirieen̄ mè ebibaan̄, mè ebi usun̄ kinyi ebirieen̄ mè ebibaan̄. Ìkeek si ebi otoko kè Libai ebi melek kinyi elukbe me ama ile kinyi cha, mije, ema kpekaan̄ uche ijọn̄ geege, kpekaan̄ si ìrot geege eyi lek kiban̄ kubọk enyi ekaan̄be.

¹³Ìgbala chieen̄, inyi enyi ekakpọkpọ ìkiben ngwugwa ewọwọp iriọk kinyi ìsi ìkigwa me ere geelek enyi emun̄be.

¹⁴Îre gaalek ere Okumugwem môgobobe isibi me inyọn̄ ijọn̄ otoko ge me etete otoko kinyi, ke enyi ebekigwa ngwugwa ewọwọp iriọk kinyi. Ere ya si ke enyi ebekirọ otutuuk inu, ike nnyibe enyi ida.

¹⁵“Ire, enyi mêkọt ikigwu anam kinyi me emen ama ile kinyi geelek, mè ikitaka ike enyi eweekbe, ikpọ me ike Okumugwem Awaji kinyi osabe igbana enyi. Ene geelek môkọt igọọk itaka, ogwu òtatana mè ogwu òchachaka mbuban me lek, kubọk ekitaka òsô mè ogaan̄ sanasana iko.

¹⁶Ire, enyi kpebetaka eje anam geege! Enyi ebekififiin̄ eje anam geelek me ijọn̄, kubọk ekifiin̄ mun̄ ikike.

¹⁷Enyi isiberie inyinyi kinyi cha, echi irek ge me akọp irek echi akpa kinyi, mè echi aya miin̄ kinyi, mè echi aran̄ kinyi, mè ìyaka ire echi bọn ichili owot eriembuuk kinyi mè arọọn̄ mè ebot kinyi, mè ìre inu geelek enyi esabe isan̄a use, mè inyinyi ata ejit kinyi, mè inyinyi cha òsibi esese, ikakikup me emen ama kinyi ìrie inorie kechi.

¹⁸Kpan̄asi ikeya, ìkisa inorie kecha ìkinu ìnirie me isi Okumugwem Awaji kinyi, me ere ge ya, ere Okumugwem môgobobe inyi lek kan̄, enyi mè bọn ebirieen̄ kinyi mè bọn ebibaan̄ kinyi, mè ebi usun̄ kinyi ebirieen̄ mè ebibaan̄, mè ebi otoko kè Libai ebi melek kinyi elukbe me ama ile kinyi cha. Ìkititiin̄ me isi Okumugwem Awaji kinyi ìkibele ejit mije oruru ònan̄a me lek otutuuk ubọk ikwaan̄ kinyi.

¹⁹Ìgbala chieen̄, inyi enyi ekakpọ chieen̄ ìlọ me lek ebi otoko kè Libai otutuuk usen geelek enyi mêlukbe me inyọn̄ ijọn̄ kinyi.

²⁰“Mgbọ Okumugwem Awaji kinyi isinichak oke ijọn̄ kinyi iwele, kubọk îchieekbe enyi use, mè anam isinilọk enyi itataka, enyi mêkọt ikitaka anam ubọk geelek enyi eweekbe.

²¹Ire ere Okumugwem Awaji kinyi môgobobe isibi, òrere ere ebekimin Erieen̄ kan̄, ijọn̄ọ ere enenen me lek ama kinyi, enyi mêkọt igwu usini me lek otutuuk eriembuuk mè arọọn̄ mè ebot echi Okumugwem onyibe enyi, ike mwuukbe lek inyi enyi ida, mè ikup me emen ama kinyi itaka ubọk geelek enyi eweekbe.

²²Ubọk yaage ekitaka òsô mè ogaan̄ sanasana iko ikike ke enyi ebetaka anam chi. Ogwu òtatana mè ogwu òchachaka mbuban me lek môkọt igọọk itaka.

²³Ire, ikalululuk ìtaka eje anam geege, mije, eje, ọmọ ore ugwem. Eya orọ, enyi kpebegbaan̄ ugwem melek anam itaka.

²⁴Ìmun̄ ibe ke enyi kperie eje anam. Kpan̄asi ikeya, ìbeben eje anam cha ìfiin̄ me ijọn̄ kubọk ekifiin̄ mun̄ ikike.

²⁵Ikarie eje, inyi inu ije ijaan̄ me lek kinyi, mè ije si ijaan̄ me lek bọn kinyi ebi ìbenu me udun̄ kinyi. Mije, sa me ikeyi, enyi mêkirọ inu òtatat me isi Okumugwem.

²⁶Ire, ìkpulu otutuuk inyinyi kinyi cha òkup mbuban, mè echi òsibi esese enyi echieekbe me use, ìsa ìsi ere ya Okumugwem môgobobe,

²⁷mè ìsa otutuuk anam cha, mè eje kiban̄ ìgwa ngwugwa ewọwọp iriọk me inyọn̄ ntook Okumugwem Awaji kinyi. Ìgwook eje anam ngwugwa kinyi cha me inyọn̄ ntook Okumugwem Awaji kinyi, mè ìtaka anam cha gaalek.

²⁸Ìgbala chieen̄ ìmun̄ ibe ke enyi mîsun̄ otutuuk ikan chi nkinyi enyi, inyi inu ije ijaan̄ me lek kinyi, mè ije ijaan̄ si melek nsabọn kinyi ebi ìbenu me udun̄ kinyi. Mije, sa me ikeya, enyi mêkirọ inu òtatat me chieen̄ Okumugwem Awaji kinyi.

²⁹“Okumugwem Awaji kinyi môkpan̄ otutuuk ebi ido cha, ebi enyi ebesi ibọkọ ijọn̄ kiban̄ isak, isan̄a kpai me isi kinyi. Enyi isirieen̄ ema isibi, mè ibọkọ ijọn̄ kiban̄ iluk,

³⁰mè ijijaka ema isan̄a, ìgbala chieen̄, inyi orọmijọn̄ kiban̄ melek awaji kiban̄ ikakana ufe ìnyi enyi. Ikaje ìkana ìkiweek awaji kiban̄ cha, mè ìkiweek irọriọọn̄ ubọk ebi ife cha ekifaka mfaka awaji kiban̄, inyi enyi mêsibe isi igọọk irọ ike ema ekirọ.

³¹Ikasa ubọk ema ekifaka mfaka awaji kiban̄ ìsa ìkitọbọ ebum ìnyi Okumugwem Awaji kinyi. Mije, otutuuk mbuban inu cha echi Okumugwem ochabe, îre inu kecha ke ema ekirọ isa ikifaka mfaka inyi awaji kiban̄. Ema mîkiwọp si bọn kiban̄ ebirieen̄ mè ebibaan̄ me ukan̄ isa ikigwa ngwugwa inyi awaji kiban̄.

³²“Ìmun̄ ibe ke enyi mîkisun̄ otutuuk ikan chi, kubọk nnyibe enyi ida. Ikatatap inu geege ìsọkọ, ikasasan̄a si inu geege me lek.