Read obolo Ikan 14 Bible Online

Ikan 14 - obolo bible

Ikan 14

¹“Enyi ìre bọn inyi Okumugwem Awaji kinyi. Eya orọ, ene kinyi isinan̄a ikwu, ikaseke lek kinyi. Ikakwọkọ si ijeek ibot kinyi me agan̄ isi, ìnyi ogwu òkwukwu.

²Mije, enyi ìre ife ìkup mbuban inyi Okumugwem Awaji kinyi. Îre enyi ke Okumugwem ogobo me etete otutuuk ebi ìkup me linyọn̄ keyi, isa irọ ebi kan̄ ebi ìsisibi esese.

³“Ikarie inu geege òrere mbuban inu.

⁴Anam enyi mêkọtbe itaka ìre: orie eriembuuk, mè gwun̄ arọọn̄, mè gwun̄ ebot,

⁵mè ogaan̄ sanasana iko, mè òsô, mè ogaan̄ ngwugwat lek, mè ebot oron, mè ogaan̄ ujọn̄ọ iko, mè nririe inwọọn̄ lek, mè arọọn̄ inyọn̄ ogoon̄.

⁶Anam geelek otukot kan̄ obumbe iba, eyi òkigọkọ inu itaka, enyi mêkọt itaka.

⁷Ire, me lek otutuuk anam otukot kiban̄ obumbe iba, mè echi òkigọkọ inu itaka, ikataka aligọ, mè ejook, mè ikpi emen ewuuk. Mije, ubọk geelek ema ekigọkọ inu itaka, otukot kiban̄ ìkabum iba. Eya orọ, ema mêchaka enyi mbuban me lek.

⁸Okodi si ìkatana, ubọk geelek otukot kan̄ obumbe iba, ìkakigọkọ inu ìtaka. Eya orọ, môchaka enyi mbuban me lek. Ikakitaka anam kan̄, ikakichak si ubọk me lek nkwukwu kan̄.

⁹“Me etete otutuuk inu òluk me emen mun̄, echichi ke enyi ebekọt itaka. Irin̄ geelek òkaan̄ uwop mè ikaan̄ si ikpọk me lek, enyi mêkọt itaka.

¹⁰Ire, inu geelek eyi ìkakaan̄ uwop mè ikpọk me lek, ikataka. Echichi môchaka enyi mbuban me lek.

¹¹“Me etete unọn òwulu me inyọn̄, unọn geelek eyi ìkakaan̄ mbuban me lek, enyi mêkọt itaka.

¹²Ire, enyi kpebetaka geege me etete unọn kechi: igo, mè edene ofifit, mè edene isọọn̄ ibot,

¹³mè mkpukpo araran̄, mè mkpukpo ofifit, mè chieen̄ ebi kè igo emen awaji geelek,

¹⁴mè chieen̄ amaan̄ geelek òkup esese esese,

¹⁵mè wukuwuku, mè ikwurikwu, mè akaba, mè chieen̄ akwanakwa geelek,

¹⁶mè ikwurikwu ǹkeme ǹkeme, mè ikwurikwu iko ibot, mè ikwurikwu okuket,

¹⁷mè ikwurikwu emen èwê, mè edene yalayala akukọ, mè igo mgbidim otu,

¹⁸mè aba mbese, mè chieen̄ aba okuket geelek, mè uchabat akukọ ibot, mè afian̄.

¹⁹“Otutuuk asabọn inu òkup kubọk akaka, mè ikigbaan̄ iwulu ogbogbo, mêchaka enyi mbuban me lek. Ikataka.

²⁰Asabọn inu chi geelek òtatana, enyi mêkọt itaka.

²¹“Inu geelek enyi emun̄be ibe ke ìkwukwu ilaak, ikataka. Kpan̄asi ikeya, ìsa ìnyi ebi ichen ìgọgọọk enyi iluk me emen ama ile kinyi. Ilọ me ikeya, enyi mêkọt iben inyam inyi ofifi ebi ichen. Mije, enyi ìre ife ìkup mbuban isa inyi Okumugwem Awaji kinyi. “Ikatem gwun̄ ebot me emen mun̄ ebe ogwu uga.

²²“Me acha me acha, enyi ebekisasan̄a irek ge me akọp irek, me lek otutuuk inu geelek òsibi me uko kinyi me otutuuk acha ya, isun̄ esese.

²³Me isi Okumugwem Awaji kinyi, me ere îgobobe isun̄ ibe ekemin Erieen̄ kan̄, ere keya ke ebekikup ikirie inorie irek ge me akọp irek echi akpa kinyi, mè echi aya miin̄, mè echi aran̄, mè echi bọn ichili owot eriembuuk kinyi, mè arọọn̄ mè ebot kinyi. Sa me ikeyi ke enyi ebesa ikween̄ ubọk ekimin Okumugwem Awaji kinyi, mè ikitet ukpook me lek kan̄ usen geelek me ugwem kinyi.

²⁴“Ire Okumugwem Awaji kinyi inigbana enyi, mè ire enyi kpekọt ikpulu inyinyi irek ge me akọp irek kinyi isa ije isi ere Okumugwem ogobobe isibi ibe ebekimin Erieen̄ kan̄ ya, mije îjọn̄ọbe ere me lek ama kinyi,

²⁵enyi mêkọt inyam inu irek ge me akọp irek cha, mè ibọkọ ikpoko alata okuket, mè inisa ikpoko ya ikaan̄ me ubọk ije isi ere ya Okumugwem Awaji kinyi ogobobe inyi Erieen̄ kan̄.

²⁶Enyi isire ere ya, enyi mêsa ikpoko alata okuket cha ilep inu geelek òneme enyi, mè ìre eriembuuk, mè ìre arọọn̄, mè ìre miin̄, mè ìre unye miin̄, mè otutuuk inu geelek ejit kinyi oweekbe. Enyi melek ebi ototun̄ ukan̄ kinyi mênenikup me ere ya me isi Okumugwem Awaji kinyi irie inu cha, mè ibele ejit.

²⁷Ire, ikakpọ chieen̄ ìlọ me lek ebi otoko kè Libai ebi melek kinyi ekiluk me ama ile kinyi, mije, ema kpekaan̄ uche ijọn̄ geege, kpekaan̄ si ìrot geege eyi lek kiban̄ kubọk enyi ekaan̄be.

²⁸“Me òta acha ita geelek, ìtitiin̄ otutuuk irek ge me akọp irek inu ònan̄a me uko kinyi me òso acha ita ya ìsun̄ me ere ge me emen ama ile kinyi.

²⁹Eyi mônenire inorie inyi ebi otoko kè Libai, ebi kpekaan̄ uche ijọn̄ geege, kpekaan̄ si ìrot geege eyi lek kiban̄ kubọk enyi ekaan̄be. Môre si inorie inyi ebi ichen, mè ebi kpà-nte, mè ebi nwakpa, ebi melek kinyi ekiluk me ama ile kinyi. Ema mênenikaan̄ inorie irie, mè irie ijot owot. Sa me ikeya, Okumugwem Awaji kinyi mônenigbana otutuuk ikwaan̄ ubọk kinyi.