Read obolo Ikan 15 Bible Online

Ikan 15 - obolo bible

Ikan 15

¹“Me òta acha jaaba geelek, enyi mêkifuk urieek ichep.

²Ikeyi ke ebekirọ inu ya: Me ibot mgbọ ya, ene geelek òfọfọọk inu inyi ogwu Ijeren ogbo kan̄, ene ya môfuk urieek ya ichep. Ìkpoyaka isi ido ogwu Ijeren ogbo kan̄, òrere ngwan̄ kan̄, ibe inikpe ọmọ urieek ya îkaan̄be ọmọ. Mije, mgbọ ya ìre mgbọ Okumugwem ofieekbe ibe efuk urieek echep.

³Owu môkọt ido urieek kwun̄ me ubọk ogwu ichen. Ire, me lek ngwan̄ kwun̄, owu òbofufuk urieek ichep inyi.

⁴Ire, ogwu una geege ìkpokup me etete kinyi, mije, Okumugwem Awaji kinyi môgbana enyi enenen me inyọn̄ ijọn̄ ya eyi ìbosa inyi enyi me ìrot, inyi enyi ebọkọ esak,

⁵ire gaalek ke enyi mêgban̄ utọn̄ me ida Okumugwem Awaji kinyi, mè igbala chieen̄ ikirọ otutuuk inu cha îtọbe ibe enyi ekerọ, kubọk nkinyi enyi ida cherekeyi.

⁶Mije, Okumugwem Awaji kinyi ìbogbagbana enyi ire lek enyi ebekifọfọọk inu inyi owuwa ofifi ido, kubọk îchieekbe enyi use. Ire, enyi kpebekifọọk inu geege me ubọk ene geege. Enyi mêkikpulu owuwa ofifi ido. Ire, kpunu ido geege òbokikpulu enyi.

⁷“Ire ikaan̄ ogwu una òkup me etete ebi ngwan̄ kinyi, me emen ama kinyi geelek me inyọn̄ ijọn̄ kinyi ya eyi Okumugwem Awaji kinyi obosa inyi enyi, ikatet ejit kinyi ìnye me lek ogwu una ya, ikachichit si ubọk me lek kan̄.

⁸Kpan̄asi ikeya, ìkikaan̄ ata ejit me lek kan̄, mè ìkichili ubọk ìfọọk ọmọ inu geelek ònanan ọmọ ìso.

⁹Ìgbala chieen̄, inyi enyi ekatumu me ejit kinyi ibe ke òso acha jaaba, mgbọ ekifuk urieek ichep îra igbet, mè ìbak me lek keya ìjit ifọfọọk inu inyi ebi ngwan̄ kinyi ebi ìkup me una. Ire owu orọ ikeya, owu ofieek ijo me lek ogwu ngwan̄ kwun̄ ogwu ugbọọn̄, mè ikaan̄ ejit ikpak me lek kan̄. Ire ogwu ngwan̄ kwun̄ ya igwen Okumugwem ikeme owu, Okumugwem môfuk ijo inu keya ikeme owu.

¹⁰Ìkichili ubọk ìnyi ebi una inu, mè ikakaan̄ uduk me ejit. Mije, îre bak me lek inu òkup ikeyi ke Okumugwem Awaji kinyi obokigbana enyi me otutuuk ikwaan̄ kinyi, mè otutuuk inu geelek enyi ekisa ubọk kinyi irọ.

¹¹Ebi una kpebenan mgbọ geege me etete kinyi me inyọn̄ ijọn̄ ya. Îre mije keya ke nkinyi enyi ida ibe enyi ekechili ubọk eche inu enyi ebi ngwan̄ kinyi, mè ebi ugbọọn̄, mè ebi una ebi ìluk me etete kinyi me inyọn̄ ijọn̄ ya.

¹²“Ire ogwu Iburu ogbo kwun̄, enerieen̄ mè ìre enenwaan̄, inyam lek kan̄ inyi owu kubọk usun̄, mè ikisi ikwaan̄ inyi owu acha gweregwen. Me òso acha jaaba kan̄, tele inyi ifo isi ikaan̄ lek kan̄.

¹³Ositele ibe ene ya ifo, karia ọmọ ìfo ukpọk ubọk.

¹⁴Chichili ubọk che usini me lek arọọn̄ kwun̄ mè ebot kwun̄, mè akpa kwun̄, mè miin̄ kwun̄ nyi ọmọ. Nyi ọmọ inu kpọ me ike Okumugwem Awaji kwun̄ ogbanabe owu.

¹⁵Kawuuk ibe ke îkaan̄ mgbọ enyi erebe usun̄ me ido Ijipiti, Okumugwem Awaji kinyi onenisan̄a enyi isibi me irek ya. Îre mije keya ke emi nkinyi enyi ikan keyi cherekeyi.

¹⁶“Ire, ire ogwu ene ya initumu inyi owu ibe ke ọmọ ìkaweek ijujuuk owu itele, ke ọmọ îma owu, mè ima si ototun̄ ukan̄ kwun̄, ke irek ya înwọn me lek kan̄,

¹⁷tet utọn̄ kan̄ sa riaak me lek ubọk afọn̄, mè mọnọ nkọm-ochichim sa chim tibi inwan̄ utọn̄ kan̄ toon̄ me lek ubọk afọn̄ ya. Osirọ ikeya, ọmọ mônenikana usun̄ inyi owu ire mgbọ geelek me otutuuk usen ugwem kan̄. Ubọk yaage si ke oborọ me lek usun̄ enenwaan̄.

¹⁸Kakaan̄ uduk me ejit kwun̄ itetele mè ogwu usun̄ ya ifo isi ikaan̄ lek. Mije, ikwaan̄ îsibe inyi owu acha gweregwen îgak eyi ebi ọkọ iba mesi inyi owu me okike mgbọ ya. Okumugwem Awaji kwun̄ môgbana owu si me otutuuk inu obokirọ.

¹⁹“Adasi orie gwun̄ eyi eriembuuk kwun̄ geelek omanbe, mè ìre adasi orie gwun̄ eyi arọọn̄ kwun̄ mè eyi ebot kwun̄, ìkup inyi Okumugwem Awaji kwun̄. Owu môsan̄a ọmọ isun̄ esese inyi Okumugwem. Òkposa adasi orie gwun̄ eyi eriembuuk kwun̄ isi ikwaan̄ me uko, òkposọp si inwọọn̄ me lek adasi orie gwun̄ eyi arọọn̄ kwun̄.

²⁰Acha geelek, owu mè ebi ototun̄ ukan̄ kwun̄ mêkikup me isi Okumugwem Awaji kwun̄, me ere îgobobe inyi Erieen̄ kan̄, ikitaka anam kecha.

²¹Ire adasi orie gwun̄ eyi anam ya ikaan̄ ìroon̄ me lek, mè ìre akọọk, mè ìre ǹnàan̄, mè ìyaka ire ke îkaan̄ ofifi inu òlọlọ me lek, owu òkposa anam òkup ikeya igwa ngwugwa inyi Okumugwem Awaji kwun̄.

²²Owu môkup me emen ama ile kinyi itaka anam òkup ikecha. Ebi ìtatana mè ebi ìchachaka mbuban me lek mêkọt igọọk igbaan̄ itaka anam ya, kubọk ekitaka òsô mè ogaan̄ sanasana iko ikike.

²³Ire, eje anam ya, enyi kpeberie! Ebebeben eje kan̄ igwook ifiin̄ me ijọn̄ kubọk mun̄ ikike.