Read obolo Ikan 16 Bible Online

Ikan 16 - obolo bible

Ikan 16

¹“Ìkisun̄ onyan̄ Abibu[3] kubọk ibot mgbọ ijọk Iraraka, mè ìkirie ijọk Iraraka yi ìnyi Okumugwem Awaji kinyi. Mije, îre me onyan̄ Abibu ke Okumugwem Awaji kinyi osan̄a enyi, me ejit eririeen̄, isibi me Ijipiti.

²Ìkisa arọọn̄ kinyi mè eriembuuk kinyi ìgwa ngwugwa ìnyi Okumugwem Awaji kinyi, me ere Okumugwem môgobobe isun̄ kubọk ere ebekimin Erieen̄ kan̄.

³Ikasa fituru etapbe olat me lek ìgbaalek ìtaka anam ya. Enyi mêtaka fituru kpunube olat me lek, òrere fituru mgbọ ufialek, otutuuk usen jaaba. Mije, enyi esa me uran-lek inan̄a me Ijipiti isibi. Me otutuuk ugwem kinyi, eyiyi mônenikana inu enyi mêkisa ikeek mgbọ enyi enan̄abe me Ijipiti isibi.

⁴Me ibot mgbọ ya, ekamumun̄ si inu geege etapbe olat me lek me ubọk kinyi, me otutuuk inyọn̄ ijọn̄ ido kinyi otutuuk usen jaaba cha. Ikatele ibe anam esabe igwa ngwugwa me ikakwun̄ adasi usen ya isik iwele egwe.

⁵Enyi kpebegwa ngwugwa eyi ijọk Iraraka yi me emen ama ile geelek Okumugwem Awaji kinyi onyibe enyi.

⁶Ìbore ama Okumugwem Awaji kinyi môgobobe isun̄, òrere ere ebekimin Erieen̄ kan̄, ere keya gaalek ke enyi ebekisi igwa ngwugwa eyi ijọk Iraraka yi. Enyi ebekigwa ngwugwa yi me agan̄ ikakwun̄, mgbọ ura okisiki, òrere ike mgbọ enyi enan̄abe me Ijipiti isibi.

⁷Ìkup me ere ya Okumugwem Awaji kinyi môgobobe isun̄ inyi Erieen̄ kan̄ ìtem anam ngwugwa ya ìtaka. Enyi isitaka anam ya isan̄a me ikakwun̄ ya, enyi mêgwugwu ikom ifon uwu ọfọ kinyi me ewelegwe.

⁸Usen gweregwen ke enyi ebekitaka fituru kpunube olat me lek. Me òso usen jaaba, enyi mêneninin̄ ntitiin̄ mbuban me isi Okumugwem Awaji kinyi. Me usen ya, enyi kpeberọ ikwaan̄ geege.

⁹“Enyi mêfuk nde jaaba, ibene me usen enyi mêbenebe ikisọp akpa me uko kinyi.

¹⁰Nde jaaba isiso, enyi mênenirie ijọk Nde[4] inyi Okumugwem Awaji kinyi, mè ikinyi inyinyi ata ejit ikpọ me ike Okumugwem Awaji kinyi ogbanabe enyi.

¹¹Enyi mêkup me isi Okumugwem Awaji kinyi, me ere ọmọ môgobobe isun̄ ibe ekemin Erieen̄ kan̄. Ere ya ke enyi ebekup ikibele ejit, enyi mè bọn kinyi ebirieen̄ mè ebibaan̄, mè ebi usun̄ kinyi ebirieen̄ mè ebibaan̄, melek ebi otoko kè Libai ìkiluk melek kinyi me ama ile kinyi, mè ebi ichen, mè ebi kpà-nte, mè ebi nwakpa ìluk me etete kinyi.

¹²Ikawuuk ibe ke îkaan̄ mgbọ enyi me lek kinyi erebe usun̄ me Ijipiti. Eya orọ, ìtet ikan chi ìnye, mè ìkirọ ema.

¹³“Enyi isigen̄ akpa kinyi, mè ititiin̄ isan̄a, mè ichimi miin̄ kinyi isan̄a, enyi mêrie ijọk Uwu Nlak usen jaaba.

¹⁴Enyi mênwọọn̄ unwọọn̄ me emen ijọk yi, enyi mè bọn kinyi ebirieen̄ mè ebibaan̄, mè ebi usun̄ kinyi ebirieen̄ mè ebibaan̄, mè ebi otoko kè Libai, mè ebi ichen, mè ebi kpà-nte, mè ebi nwakpa ebi ìluk me emen ama ile kinyi.

¹⁵Usen jaaba ke enyi ebekirie ijọk yi inyi Okumugwem Awaji kinyi, me ere Okumugwem môgobobe isun̄ ibe ekemin Erieen̄ kan̄. Mije, Okumugwem Awaji kinyi môgbana enyi me inu enyi mêrọkọbe me uko, mè otutuuk ikwaan̄ enyi mêsabe ubọk kinyi irọ. Mgbọ keya, unwọọn̄ kinyi mônenijot.

¹⁶“Otutuuk ebirieen̄ kinyi mêkisa lek kiban̄ inijeen̄ Okumugwem Awaji kinyi mgbọ ita me acha geelek, me ere Okumugwem môgobobe isun̄ ibe ekemin Erieen̄ kan̄. Ema ebekisa lek kiban̄ inijeen̄ Okumugwem me mgbọ ijọk Fituru Kpunu Olat, mè mgbọ ijọk Nde, mè mgbọ ijọk Uwu Nlak. Enerieen̄ geelek òbonu me isi Okumugwem, ìkpoje ukpọk ubọk inu.

¹⁷Enerieen̄ geelek môkaan̄ uche eyi ubọk kan̄ isa inu, igọọk me ike Okumugwem Awaji kinyi osabe igbana enyi.

¹⁸“Enyi mêgobo ebi ibot oyerebet mè ebi ibot mkpulu me otoko kinyi geelek, me ama ile geelek Okumugwem Awaji kinyi obosa inyi enyi, inyi ekesibi unen oyerebet me ibot ebi kinyi.

¹⁹Me emen oyerebet geelek, kawuwọlọ unen oyerebet, kagobo ene isi. Kabọkọ si ikpoko ngan, mije, ikpoko ngan ìkitap ebi ìriọọn̄ inu ǹnàan̄, mè ikiwuwọlọ ikọ ogwu ata irọrọ.

²⁰Ìweek unen oyerebet, mè ìkisibi unen oyerebet mgbọ geelek, inyi enyi efuk ugwem, mè eluk ebia me inyọn̄ ijọn̄ ya, eyi Okumugwem Awaji kinyi obonyi enyi.

²¹“Ikalululuk ìgwuun̄ uti yọk Asera me agba lek ntook ngwugwa Okumugwem Awaji kinyi eyi enyi mênamabe.

²²Ikagwuun̄ si ewuuk mfaka geege, mije, Okumugwem Awaji kinyi ìchacha inu geelek òkup ikecha.