Read obolo Ikan 18 Bible Online

Ikan 18 - obolo bible

Ikan 18

¹“Ebi ngwugwa otoko kè Libai mè otutuuk ebi otoko kè Libai, kpebekaan̄ uche ijọn̄ geege mè ìrot geege me etete ebi Ijeren. Inu ema ebesa iluk ugwem ìbore inu ngwugwa ukan̄ egwabe inyi Okumugwem mè inyinyi geelek enyibe Okumugwem.

²Ema kpebekaan̄ ìrot geege me etete ebi ngwan̄ kiban̄. Okumugwem, ọmọ ore ìrot kiban̄, kubọk îchieekbe ema use.

³“Me lek ngwugwa echi orie eriembuuk mè arọọn̄, echi ebi ene ebenikigwa, uche inu òrere echi ebi ngwugwa ìre ubọk anam, mè uga ijọn̄ agan̄ iba, mè okpu anam ya.

⁴Enyi mêsa adasi mfut akpa kinyi, mè adasi mfut aya miin̄ kinyi, mè adasi mfut aran̄ kinyi, mè adasi inwọọn̄ esọpbe me lek arọọn̄ kinyi, inyi ebi ngwugwa.

⁵Mije, îre ema mè ebi owot iman kiban̄ ke Okumugwem Awaji kinyi ogobo isibi me otutuuk otoko kinyi geelek, ibe enekeke me isi Okumugwem mgbọ geelek ekesi ikwaan̄ me erieen̄ kan̄.

⁶“Ogwu otoko kè Libai geelek môkọt inan̄a me ama ile kinyi geelek ere îlukbe me Ijeren, mè isa me otutuuk ejit kan̄ inu me ere Okumugwem ogobobe isun̄ ibe ekemin Erieen̄ kan̄.

⁷Môkọt isi ikwaan̄ me ere ya, me erieen̄ Okumugwem Awaji kan̄, kubọk ofifi ebi otoko kè Libai ògbo kan̄, ebi ìkisi ikwaan̄ me ere ya me isi Okumugwem.

⁸Ọmọ môgọọk ebi ikwaan̄ ogbo kan̄ cha iche mkpukpe ikwaan̄ me ere ya ìkike, igbaalek ìrot îkaan̄be inan̄a me uwu ogwu ute.

⁹“Enyi isinin̄ inyọn̄ ijọn̄ Okumugwem Awaji kinyi obonyi enyi, enyi kpebekween̄ ijo mbuban orọmijọn̄ cha, echi ebi ido cha ekirọ.

¹⁰Ene geege me etete kinyi ikasa ogwu gwun̄ enerieen̄ mè ìre enenwaan̄ ìgwa ngwugwa ewọwọp. Ene geege ikakido ido-inu, ikakitet ǹcha, ikakilo nlilo. Ene geege si ikare ogwu ifit ibọk.

¹¹Ene geege ikarom ene ìtap èweke, ikare ogwu nriran ijo erumun̄, ikare ogwu ikwaan̄ ekwukwu jom-jòm, ikare si ogwu òkitimi ogwu òkwukwu itumu ikọ melek lek.

¹²Mije, ene geelek òkirọ ojelek inu òkup ikechi ìre mbuban inu me isi Okumugwem. Îre mije mbuban inu òkup ikechi ke Okumugwem Awaji kinyi oborieen̄ ebi ido chi isibi me isi kinyi.

¹³Eya orọ, ìluk ugwem ikakaan̄ge nrọ-nlọ geege me emen me isi Okumugwem Awaji kinyi.

¹⁴“Ebi ido cha enyi ebesi ibọkọ ijọn̄ kiban̄ ekigban̄ utọn̄ inyi ebi ìkitet ǹcha, mè ebi ìkido ido-inu. Ire, enyi, Okumugwem Awaji kinyi ìkanyi enyi irek ibe enyi erọ ojelek inu òkup ikecha.

¹⁵Okumugwem Awaji kinyi môsan̄a ogwu nriran ge òbet lek n̄a isibi me etete ebi ngwan̄ kinyi. Îre ọmọ ke enyi ebekigban̄ utọn̄ inyi.

¹⁶“Mije, îre inu yi ke enyi edo Okumugwem Awaji kinyi, me usen ya enyi etitiin̄be me ebon ogoon̄ Orebu, mgbọ enyi etumube ibe, ‘Eji kpeyaka iweek inọnọ ida Okumugwem Awaji kiji igak ikeya, eji kpeyaka iweek imumun̄ si uga ukan̄ keyi, inyi eji ekakwaan̄ ìta.’

¹⁷“Okumugwem onenitumu inyi emi ibe, ‘Inu ya ema ekitumu ìkpọkpọ itat.

¹⁸Mâsan̄a ogwu nriran ge òkup kubọk kwun̄ isibi inyi ema me etete ebi ngwan̄ kiban̄. Mâtap ikọ n̄a me otu kan̄, ọmọ môbeben otutuuk inu geelek ntọbe ibe ema erọ inikpa inyi ema.

¹⁹Ogwu geelek òjijit igbagban̄ utọn̄ me lek otutuuk ikọ ogwu nriran ya môtumube me erieen̄ n̄a, emi me lek n̄a mânenido ene ya otu.

²⁰Ogwu nriran geelek òfafiaan̄ ikitumu ikọ me erieen̄ n̄a, me mgbọ emi nkariage ọmọ ibe itumu, mè ìyaka ire ogwu nriran geelek òkitumu ikọ me erieen̄ ofifi awaji cha, ebekpakpan̄ ogwu nriran òkup ikeya.’

²¹“Ire enyi ikikeek me ejit kinyi ibe, ‘Sà eji ebejeje ikọt iriọọn̄ etip ikarege eyi Okumugwem olookbe?’

²²Ikeyi ke enyi ebekisa iriọọn̄: Ire inu ogwu nriran ya otumube me erieen̄ Okumugwem ìkamọnọ irek ike îtumube, mè ìkarọ si ìso, inu ya ìkare ikọ Okumugwem otumube. Ogwu nriran ya ìfafiaan̄ itumu ikọ ya. Ikatet ukpook me lek ogwu nriran òkup ikeya.