Read obolo Ikan 19 Bible Online

Ikan 19 - obolo bible

Ikan 19

¹“Okumugwem Awaji kinyi isinijijaka otutuuk ido cha, echi ọmọ obobọkọ ijọn̄ kiban̄ isa ikana inyi enyi, mè enyi isinirieen̄ ema isibi, mè iniraka inin̄ ikiluk me emen uwu kiban̄ cha me ama ile kiban̄,

²enyi mêgobo ama ita isun̄ esese me etete ama cha Okumugwem Awaji kinyi obosa inyi enyi.

³Ìche inyọn̄ ijọn̄ ya eyi Okumugwem Awaji kinyi obosa inyi enyi agan̄ ita, ìgọọk me otu ifuk ama itap-ibot cha, inyi agan̄ geelek ikaan̄ ama itap-ibot ge. Ìrọ oniin̄ ìsi ama cha geelek, inyi ene geelek òkpakpan̄ ene me mfat me agan̄ geelek ikọt igwat lek ilibi ifo ama itap-ibot òkup me agan̄ ya.

⁴Eyi ìre ikan òbokikpulu ebi ìkpan̄ ene me mfat: Ene geelek òkpakpan̄ ogwu melek kan̄ me mfat, me ìkagegen ibak, ìkawuwuuk lek ìre si ogwu ochicha ìnyi ogwu îkpan̄be ya, ene ya môkọt ilibi isi itap ibot me ama ge me lek ama ita cha, mè inwọnọ mkpa.

⁵Kubọk, ire ene ge ininan̄a inin̄ oron ibosi ikep iye, ọmọ mè ogwu melek kan̄. Mgbọ ene ya okikep iye, otuban kan̄ oneniwọọk inan̄a me lek ibot, mè isi itọbọ ogwu melek kan̄ ya, ene ya okwukwu. Ogwu òkup ikeyi môkọt ilibi isi itap ibot me emen ama ge me lek ama itap-ibot chi, mè inwọnọ mkpa.

⁶Ire ìkare ikeya, mè ire ama itap-ibot ijọn̄ọ ere, ngwan̄ ogwu òkwukwu ya, ogwu îkupbe me ubọk ikpakpan̄ ogwu òkpan̄ ogwu uwu kan̄ me useen̄, môkọt ilibi isoon̄ ogwu ene ya, mè isa me unaan̄-ejit itet ikpan̄. Sa me ikeya, ogwu òkpan̄ ene me mfat ya mônenikwu mkpa ikatatge, mije, ìkagegen ibak ìkpan̄ ogwu melek kan̄, ìkawuwuuk lek ìre si ogwu ochicha ìnyi ogwu îkpan̄be ya.

⁷Îre mije keyi ke emi nnyi ida, ibe enyi egobo ama ile ita esun̄ esese enyi lek kinyi.

⁸“Ire Okumugwem Awaji kinyi inirọ inyi oke ijọn̄ kinyi iyat iwele igak ike îkupbe, kubọk înyan̄abe ibot inyi ebi nte nte kinyi ibe ke ọmọ môrọ, mè inisa otutuuk ijọn̄ ya eyi îchieekbe ema use ikana inyi enyi,

⁹mije enyi egbalabe chieen̄ ikisun̄ otutuuk ikan chi nkinyi enyi cherekeyi, ibe enyi emun̄ Okumugwem Awaji kinyi me chieen̄, mè ekeluk ugwem ekpọ me otutuuk oniin̄ kan̄, enyi mêgobo ofifi ama itap-ibot ita isọkọ me lek ita kechilọ.

¹⁰Ìrọ ikeyi, inyi ekakifiin̄ eje ebi kpelọ ikan me inyọn̄ ijọn̄ kinyi eyi Okumugwem Awaji kinyi obosa inyi enyi me ìrot, inyi ikan eje ene ikakup enyi me ibot.

¹¹“Ire, ikaan̄ ogwu icha ogwu melek kan̄, mè isi ituun̄ ikpọ ogwu ene ya me ere ònọnọọn̄, mè iniwulu isibi, mè isulu ene ya ikpan̄, mè inan̄a ilibi isi inin̄ emen ama ge me etete ama itap-ibot chi,

¹²ebi ugane ama ogwu òkpan̄-ene ya mêria ebi ene ibe enin̄ emen ama ya esi etet ọmọ esa enu, mè ikana ọmọ itap me ubọk ngwan̄ ogwu òkwukwu ya, ogwu îkupbe me ubọk ikpakpan̄ ogwu òkpan̄ ogwu uwu kan̄, inyi ikpan̄ ọmọ me useen̄ ogwu îkpan̄be.

¹³Ikato ogwu òkup ikeya nsan kubọk ge. Sa me ikeyi, enyi mêsan̄a awọ òje me lek ifafiat eje ogwu ìkarọ ìlọ me otutuuk Ijeren. Inu mônenikije ijaan̄ me lek kinyi.

¹⁴“Kajujuk okike ijọn̄ ogwu melek kwun̄, eyi ebi ugane etapbe inyi ọmọ me inyọn̄ ijọn̄ ya enyi ebebọkọ me ìrot, òrere ijọn̄ Okumugwem Awaji kinyi obosa inyi enyi ebọkọ esak.

¹⁵“Kpebesa ikọ ogwu ata-ikọ ge gaalek itip ene geege oyerebet mije nrọ-nlọ geelek, mè ìyaka ire ijo inu geelek ene ya orọbe. Ìbore me otu ebi ata-ikọ iba mè ìre ita, ke ebesa itip ene oyerebet.

¹⁶Ire ogwu njijọ ejit inan̄a isibi inikeke ata-ikọ ikeme ene ibe ke îlọ ikan,

¹⁷mêsa ema ene iba cha ebi ìkigugọlọ inu me isi Okumugwem, inyi ema enekeke me isi ebi ngwugwa mè isi ebi ibot oyerebet ebi ìkup me ikwaan̄ me ike mgbọ ya.

¹⁸Ebi ibot oyerebet cha mênenigwuun̄ chieen̄ iwọlọ emen ikọ ya ijaan̄. Ire iweek imun̄ ibe ke ogwu ata-ikọ ya ìkikeke ata-ikọ ataak ikeme ogwu ngwan̄,

¹⁹enyi mêrọ ogwu ata-ikọ ya inu îbenbe me ejit irọrọ ogwu ngwan̄, inyi enyi esa me ikeya esan̄a ijo inu òkup ikeya me etete kinyi.

²⁰Ebi ene isinọ, ukpook môtetet ema. Kpunu ene geege òboyaka ikpọk irọ ijo inu òkup ikeyi me etete kinyi.

²¹Ikato ene geege nsan kubọk ge. Ogwu ikpan̄ ene, ekpan̄ ene ya me useen̄. Ogwu irọkọ ene chieen̄, erọkọ chieen̄ kan̄ me useen̄. Ogwu ifan̄a ene ejeek, efan̄a si ejeek kan̄ me useen̄. Ogwu ifan̄a ene ubọk, efan̄a si ubọk kan̄ me useen̄. Ogwu ifan̄a ene ukot, efan̄a si ukot kan̄ me useen̄.