Read obolo Ikan 2 Bible Online

Ikan 2 - obolo bible

Ikan 2

¹“Eji enenigwu ikom, mè ikije ifo agan̄ emen èwê òkup me oniin̄ òkisi okwaan̄ Anyiaan̄, kubọk Okumugwem otumube inyi emi. Îbọkọ eji ujọn̄ọ mgbọ sabum eji enikọt ije ikat ikana otutuuk ido ogoon̄ ogoon̄ ebi Seya.

²“Okumugwem onenitumu inyi emi ibe,

³‘Enyi mîra ije ikat ikana ogoon̄ yi ikem. Mgbọ keyi, ìgwu ìkom ìje ìfo agan̄ inyọn̄.’

⁴Inenibe emi ǹnyi enyi ebi Ijeren ida ibe, ‘Enyi mênije itibi oke ijọn̄ ebi ngwan̄ kinyi, bọn owot iman kè Isọ, ebi ìluk me Seya. Ukpook kinyi môtet ema. Eya orọ, enyi ìgbagbala chieen̄!

⁵Ikarọ ema inu geege eyi môrọbe inyi ema etim enyi akọn̄ me lek. Mije, emi m̀kpanyi enyi ijọn̄ kiban̄ geege, ikerere akpat ukot ge gaalek. Nra iwuwuuk lek isa otutuuk ijọn̄ inyọn̄ ogoon̄ Seya inyi Isọ, inyi ire eyi kan̄.

⁶Inorie geelek enyi mêberie me ere ya, mè mudim geelek ònan̄a me ere ya eyi enyi mêbenwọ, enyi ebekpekpe ewe me ikpoko alata okuket.’

⁷“Me atikọ, Okumugwem Awaji kinyi îra igbana enyi me otutuuk ikwaan̄ ubọk kinyi geelek. Ìkasan̄a enyi chieen̄ me lek me otutuuk oniin̄ ije enyi ejebe itibi emen uga èwê keyi. Me otutuuk akọp acha ini kechi, Okumugwem Awaji kinyi ìkpọkpọ ikeke inye melek kinyi, ìkatele enyi. Eya orọ, inu geege si ìkanan enyi.

⁸“Ikeya ke eji eje iraka ebi ngwan̄ kiji, ebi owot iman kè Isọ, ebi ìluk me Seya, mè inigwaka itele oniin̄ iteke ijọn̄ Araba, eyi òbene me Elat mè Esiọn Geberi, mè ikana inin̄ oniin̄ èwê Mowabu.

⁹“Okumugwem onenitumu inyi emi ibe, ‘Ikasisaak ebi Mowabu, ikarọrọ si ema inu geege eyi môrọbe inyi ema etim enyi akọn̄ me lek. Mije, m̀kpanyi enyi okpọkọ geege me lek ijọn̄ kiban̄. Îre ebi owot iman kè Lọt ke nsa ijọn̄ Ari inyi, inyi ire eyi kiban̄.’ ”

¹⁰Îre ebi Eyim ewuuk lek ikiluk me ere ya. Ema ìre ebi ìnyenye lek, mè iwa enenen me otu ifuk, mè ijọn̄ọ si kubọk ebi Anak.

¹¹Ekigbaan̄ ebi Eyim mè ebi Anak igwen ebi Refa. Ire, ebi Mowabu ekigwen ema ebi Eyim.

¹²Îre ebi Ori edasi ikiluk me Seya. Ire, ebi owot iman kè Isọ enenilaak ema isan̄a me inyọn̄ ijọn̄ ya, mè ibọkọ ijọn̄ ya iluk. Ebi owot iman kè Isọ ejijijaka ebi Ori isan̄a kpai, mè ibọkọ inyọn̄ ijọn̄ kiban̄ iluk, ike ebi Ijeren erọbe me ijọn̄ geelek Okumugwem okanabe inyi ema ibe ebọkọ esak.

¹³“Okumugwem oneninyi eji ida ibe, ‘Ngwa, ìjibi ije, mè ìsaba iteke Jeredi.’ Eji esasaba iteke ya.

¹⁴Akọp acha ita mè jeeta ke eji esa ije inan̄a me Kades Bania inisaba iteke Jeredi. Me emen mgbọ ya, otutuuk ọgbọn̄ ebi ìkitim akọn̄ me ukot keya ekwakwaan̄ ita kpai me etete ebi Ijeren, ike Okumugwem onyan̄abe ibot inyi ema ibe ke môrọ.

¹⁵Okumugwem osasa ubọk kan̄ ikeme ema mege ire lek îkpan̄be ema otutuuk isan̄a kpai me etete ebi Ijeren, ene geege me lek kiban̄ ìkayaka ìsik.

¹⁶“Mgbọ otutuuk ebi ìkitim akọn̄ me ukot ya ekwaan̄be isan̄a kpai me etete ebi Ijeren,

¹⁷Okumugwem onenitumu inyi emi ibe,

¹⁸‘Cherekeyi, enyi mêbene ije ije iraka oke otubọk ijọn̄ ebi Mowabu me oniin̄ Ari.

¹⁹Mgbọ enyi isije inire lek ebi Amọn, ikasisaak ema, ikarọrọ si ema inu geege eyi môrọbe inyi ema etim enyi akọn̄ me lek. Mije, m̀kpanyi enyi okpọkọ geege me lek ijọn̄ kiban̄. Îre ebi owot iman kè Lọt ke nsa ijọn̄ ya inyi, inyi ire eyi kiban̄.’ ”

²⁰Ekigwen si ijọn̄ ya ijọn̄ ebi Refa, mije, îre ebi Refa edasi iluk me inyọn̄ ijọn̄ ya. Ire, ebi Amọn ekigwen ema ebi Jamijum.

²¹Ema ìre ebi ìnyenye lek, mè iwa si me otu ifuk, mè ijọn̄ọ si kubọk ebi Anak. Ire, Okumugwem ojijijaka ema isan̄a mgbọ ebi Amọn etimbe ema akọn̄ me lek. Ebi Amọn ererieen̄ ema isibi, mè ibọkọ inyọn̄ ijọn̄ ya iluk. Ikakana ijọn̄ ebi Amọn.

²²Ike yaage si ke Okumugwem orọ inyi ebi owot iman kè Isọ ebi ìluk me Seya, ebi ìjijijaka ebi Ori isan̄a, mè ibọkọ inyọn̄ ijọn̄ kiban̄ iluk mege inire cherekeyi.

²³Ubọk yaage si ke ebi Kafitọ, ìrere ebi ìnan̄a me achọ Keret, enan̄a inu inijijaka ebi Afim, ebi ìdadasi ikiluk me asabọn ama òkup me agba okwaan̄ ile Mediterenia, mege isi igwook me Gaja isan̄a kpai, mè ibọkọ inyọn̄ ijọn̄ kiban̄ iluk.

²⁴“Okumugwem onenitumu si ibe, ‘Mgbọ keyi, ìbene ìkije, mè ìsaba iteke ijọn̄ okwaan̄ Anọn ìtoon̄. Ìkpọ, nra ikana Siyon ogwu ubọọn̄ ido Amọ, ogwu òluk me Esibon, melek otutuuk ijọn̄ ido kan̄ itap enyi me ubọk. Ìkpọkpọ ìbene akọn̄ me lek kan̄, mè ìbọkọ otutuuk ijọn̄ ido kiban̄ cha.

²⁵Cherekeyi, mâbene ikitap ukpook kinyi mè urimi ònan̄a me lek kinyi ijot emen ebi ido geelek me linyọn̄, ebi mênọbe etip ofolek kinyi. Ema mêkiran, mè ijet ita mije ukpook lek kinyi.’

²⁶“Mgbọ eji ekupbe me èwê Kedemọt, nria osat isi lek kè Siyon ogwu ubọọn̄ ebi Amọ, ogwu òluk me Esibon, ibe esi ebeek ibe ke eji ekiweek esuuk, mè etumu enyi si ibe,

²⁷‘Soso tele mè eji eje oniin̄ oniin̄ etibi ido kwun̄, ke eji kpebegwaka inin̄ agan̄ ulom, mè ìre agan̄ ujit.

²⁸Inorie kinyi geelek eji mêriebe mè mudim kinyi geelek eji mênwọbe, eji mêkpe ewe me ikpoko alata okuket. Gaalek tele mè eji eneje ukot ukot eraka,

²⁹mè eje esaba okwaan̄ Jodan efo inyọn̄ ijọn̄ Okumugwem Awaji kiji onyibe eji. Ikeya ke ebi owot iman kè Isọ ebi ìluk me Seya, mè ebi Mowabu ebi ìluk me Ari etele ibe eji eje etibi ido kiban̄.’

³⁰Ire, Siyon ogwu ubọọn̄ Esibon ojijit. Ìkachieek ibe eji eneje etibi ido kan̄. Mije, Okumugwem Awaji kinyi îrọ ibe ejit kan̄ inye, mè irọ ibe ọmọ inye ibot, inyi isa me ikeya ikana ọmọ itap enyi me ubọk, kubọk îrọbe si.

³¹“Okumugwem onenitumu inyi emi ibe, ‘Kpọ, nra ibene ikikana Siyon melek ido kan̄ itap enyi me ubọk. Enyi ìbene akọn̄ me lek kan̄, mè ìbọkọ ijọn̄ kan̄ ìsak.’ ”

³²Siyon mè otutuuk ebi akọn̄ kan̄ enenijibi akọn̄ isibi inikweek eji me Jayas.

³³Okumugwem Awaji kiji onenikana ọmọ itap eji me ubọk, eji echochon ema igwook, ọmọ mè ebi bọn mè otutuuk urum ebi akọn̄ kan̄.

³⁴Me irak akọn̄ ya, eji ebọbọkọ otutuuk ama kiban̄, mè ijijaka otutuuk ama kiban̄ cha igwook. Ene geege ikeyi ìkasik, ibene me lek ebirieen̄ mè ebibaan̄ mege ire lek asa nsabọn.

³⁵Gaalek anam kiban̄ cha ke eji ekpulu inyi lek kiji, mè ikpulu si ofifi inu geelek efumbe me emen ama kiban̄ cha igbaalek.

³⁶Bene me Aroweri eyi òkup me otu iteke ijọn̄ okwaan̄ Anọn, mè ama òkup me iteke ijọn̄ okwaan̄ ya, mege isi igwook me Giliadi, kpunu ama geege ikeyi ònyenye igak eji ibọbọkọ. Okumugwem Awaji kiji îwuuk lek ikana otutuuk kiban̄ itap eji me ubọk.

³⁷Igọọk me ida Okumugwem Awaji kiji onyibe, enyi kpesaba ukot inene inyọn̄ ijọn̄ ebi Amọn geege, enyi kpesaba si ukot itoon̄ me otutuuk inyọn̄ ijọn̄ òkup me agba lek okwaan̄ Jabọk, enyi kpejajak si ukot me ijọn̄ ama òkup me inyọn̄ ogoon̄ cha.