Read obolo Ikan 20 Bible Online

Ikan 20 - obolo bible

Ikan 20

¹“Enyi isibesibi isi itim akọn̄ me lek ebi ochicha kinyi, mè imun̄ ogbogbo inyinya mè uji akọn̄ mè urum ebi akọn̄ ìwawa igak echi enyi ekaan̄be, ukpook kiban̄ ikatet enyi, mije, Okumugwem Awaji kinyi, ogwu òsasan̄a enyi isibi me Ijipiti, òwa melek kinyi okupbe.

²Sabum enyi ebesi ibene akọn̄ ya itim, ogwu ngwugwa mônu inikeke me isi, mè itumu ikọ melek otutuuk ebi akọn̄.

³Ìbotumu ibe, ‘Enyi ebi Ijeren, ìgban̄ utọn̄! Cherekeyi, enyi mênisi itim akọn̄ me lek ebi ochicha kinyi. Ejit kinyi ikasisik me isi kiban̄! Ukpook ikatet enyi! Urimi ikanin̄ enyi me emen! Welewele ikakup me etete kinyi!

⁴Mije, Okumugwem Awaji kinyi ore ogwu òkije melek kinyi, mè ikitim akọn̄ ibot kinyi ikeme ebi ochicha kinyi, mè ikinyi enyi ntim-mkpan̄.’

⁵“Ebi ibot akọn̄ mênenitumu inyi otutuuk ebi akọn̄ ibe, ‘Ìre îkaan̄ ogwu ònanama aya uwu eyi ìkagbana-nu? Ene ya igwu ikom ifo uwu kan̄, inyi ikakwu me akọn̄, mè ofifi ene inigbana uwu ya me useen̄ kan̄.

⁶Ìre îkaan̄ ogwu òwop uko gerep, ire, ìkabene-nu ìkirie mfut kan̄, ene ya igwu ikom ifo uwu kan̄, inyi ikakwu me akọn̄, mè ofifi ene inirie mfut uko gerep ya.

⁷Ìre îkaan̄ ogwu òtet obaak enenwaan̄ itele ibodo, ire, ìkadodo-nu, ene ya igwu ikom ifo uwu kan̄, inyi ikakwu me akọn̄, mè ofifi ene inimọnọ ogwu enenwaan̄ ya ido.’

⁸“Ebi ibot akọn̄ cha mênitumu si inyi ebi akọn̄ cha ibe, ‘Ìre îkaan̄ ogwu ukpook okitet, mè ìre ogwu owot okifieek, ene ya igwu ikom ifo uwu kan̄, inyi ufieek-owot kan̄ ikatobo ebi ngwan̄ kan̄.’

⁹Ebi ibot akọn̄ isitumu ikọ inyi ebi akọn̄ cha isan̄a, mênenisan̄a ebi ibot ebi ìbekikpọ chieen̄ me lek otutuuk ebi akọn̄, me urum me urum, ito inyi ema.

¹⁰“Enyi isije igbet ama ile enyi ebesi itim akọn̄ me lek, ìdasi ìtọt ìnyi ema ibe ke enyi eweek esuuk.

¹¹Ire ema ichieek esuuk, mè igwuku otunchit kiban̄ ibook inyi enyi, otutuuk ebi ama ya mênenikana ebi usun̄ ìkisi ikwaan̄ òbọp inyi enyi. Ema mêkirọ ikwaan̄ geelek enyi mêtọbe inyi ema.

¹²Ire, ire ebi ama ya ijit esuuk, mè ibene akọn̄ me lek kinyi, ìkpa mbin akọn̄ ìkana ama ya.

¹³Okumugwem Awaji kinyi isinikana ama ya itap enyi me ubọk, ìsa oge akọn̄ ìkpan̄ otutuuk ebirieen̄ kiban̄ ìsan̄a.

¹⁴Ire, ebibaan̄ kiban̄, mè nsabọn, mè anam kiban̄, mè otutuuk inu òkup me emen ama ya, ìkpulu ìnyi lek kinyi. Ìsa otutuuk inu isi akọn̄ chi, enyi ebọkọbe me ubọk ebi ochicha kinyi, ìbele lek kinyi ejit. Îre Okumugwem Awaji kinyi onyi enyi.

¹⁵Ubọk yaage si ke enyi eberọ me lek otutuuk ama ile ido geelek òkukup ijọn̄ọ enyi ere me lek enenen, ebi kpere ido ebi ìluk igbet enyi ere me lek.

¹⁶“Ire, ikatele ibe inu geege òkifuuk efuuk ikup me ugwem me emen ama ile ebi ido chi, echi Okumugwem Awaji kinyi obosa inyi enyi me ìrot.

¹⁷Ire me lek ebi Et, mè ebi Amọ, mè ebi Kenan, mè ebi Pereji, mè ebi Ifi, mè ebi Jebus cha, enyi ebejijijaka ema melek ama kiban̄ cha geelek isan̄a kpai kubọk inu oniin̄ akọn̄, ike Okumugwem Awaji kinyi onyibe enyi ida ibe erọ.

¹⁸Sa me ikeya, ema kpebejeen̄ enyi otutuuk filafila inu cha geelek ema ekirọ isa ikitọbọ ebum inyi awaji kiban̄, inyi enyi ekasa me ikeya ìrọ Okumugwem Awaji kinyi ijo inu.

¹⁹“Enyi isikpa mbin akọn̄ ikana ama ile geelek, mè ikup me ere ya ijọn̄ọ mgbọ ikiweek ititim akọn̄ ibọkọ ama ya, ikaben otuban ìsa ìcho uti geege òkup me ama ya, mije, enyi mêkirie mfut ònan̄a me lek uti cha. Ikacho uti cha geege ìto, mije, ema kpere ebilene ebi enyi ekikpa mbin akọn̄ ikana.

²⁰Ire, uti echi enyi eriọọn̄be ibe ke kpere uti òkito mfut, echicha, enyi mêkọt icho isa igbaalek iwak mgban akọn̄ ikana ama ya enyi ekitim akọn̄ me lek, mege ire mgbọ enyi mêtimbe ikpan̄ ama ya.