Read obolo Ikan 21 Bible Online

Ikan 21 - obolo bible

Ikan 21

¹“Ire enyi imun̄ nkwukwu ogwu ekpan̄be me unye olaakbe me ijọn̄ me emen uko me inyọn̄ ijọn̄ Okumugwem Awaji kinyi obosa inyi enyi ebọkọ esak, ire, enyi kperiọọn̄ ogwu òkpakpan̄,

²ebi ugane kinyi mè ebi ibot oyerebet kinyi mêsibi isi ere nkwukwu ene ya olaakbe, mè itọ ibene me lek nkwukwu ene ya isi ire lek ama ile geelek òkup ikana ere ya.

³Ebi ugane me ama ile ògbegbet ere me lek nkwukwu ene ya ichit, mêtet gwun̄ uman eriembuuk ge eyi kpesa isi ikwaan̄-nu me uko, kperarak si ìkwaan̄ ọmọ nroon̄ ikwaan̄ uko me lek,

⁴mè isa ije isi iteke ere kperarak ibak ijọn̄, kperarak ìwop si inu geege me ijọn̄ kan̄, ere mun̄ okilibi me emen okolo kan̄. Me ere ya, ema mêyaka ebek gwun̄ uman eriembuuk ya ifan̄a.

⁵Ebi ngwugwa, bọn kè Libai, mêneninu. Mije, îre ema ke Okumugwem ogobo ibe ekesi ikwaan̄ enyi ọmọ, mè ekegbana ebi ene me erieen̄ Okumugwem. Oyerebet geelek ofolek gọlọgọlọ, mè ìre ijo unan esakbe ene me lek me ìbak, îre ema ebekifieek.

⁶Otutuuk ebi ugane ama ile òkukup igbet lek nkwukwu ene ya ichit mênenigwọk ubọk kiban̄ igwook me lek eriembuuk ya eyakabe ebek ifan̄a,

⁷mè inikitap awọ ibe, ‘Ubọk kiji geege ìkafiin̄ eje keyi, chieen̄ kiji si ìkamumun̄ mgbọ erọbe inu yi.

⁸Jei Okumugwem, bọkọ esuuk keyi erọbe me ibot ebi kwun̄, ebi Ijeren, ebi owu onyan̄abe isibi. Soso, kafuk ijo inu eyi eje ene ogwu ikalọge ikan ìtoon̄ me ibot ebi kwun̄.’ Sa me ikeya, mîra irọ esuuk mije eje ene ya efiatbe.

⁹Sa me ikeya, enyi mêben awọ òje me lek ififiin̄ eje ogwu ikalọge ikan isan̄a me etete kinyi, mije enyi erọbe inu òtatat me chieen̄ Okumugwem.

¹⁰“Ire enyi isibi isi itim akọn̄ me lek ebi ochicha kinyi, Okumugwem Awaji kinyi onenikana ema itap enyi me ubọk, enyi etitim ikpan̄ ema, mè itet ebi ene me akọn̄ isa ika,

¹¹owu onenimun̄ ogwu enenwaan̄ òjajaan̄ uja me etete kiban̄, mè inikaan̄ ulọk me lek ogwu enenwaan̄ ya, owu môkọt imọnọ ọmọ ikaan̄ me lek nwa.

¹²Owu môsa ọmọ inu initap me uwu kwun̄, mè ikwọkọ ọmọ ijeek me ibot, mè ikpaan̄ abọm kan̄,

¹³mè iwọọk ofọnti îtapbe mgbọ etetbe ọmọ me akọn̄ isan̄a me lek kan̄. Ọmọ mônenikup me uwu kwun̄ otuuk kè onyan̄ ge ikifieek ejit mije ogwu ute mè ogwu uga. Onyan̄ ge ya isiraka, owu môkọt igọọk ọmọ ilaak, mè ikana ogwu olom, ọmọ si mônenikana nwa kwun̄.

¹⁴Ire inu kan̄ ìkayaka ìneme owu, juuk tele, inyi ije isi ere òneme ọmọ. Kanyanyam ọmọ, kasa si ọmọ ìrọ usun̄, mije, owu ora itap ọmọ esip me isi.

¹⁵“Ire ogwu enerieen̄ ikaan̄ nwa iba, mè inima ge, mè icha ge. Ebibaan̄ iba cha enenimaan̄ bọn ebirieen̄ inyi ogwu enerieen̄ yi. Adasi gwun̄ onenire gwun̄ ogwu enenwaan̄ ogwu îchabe.

¹⁶Ogwu enerieen̄ ya isibonidọmọ inu kan̄ inyi nsabọn ebirieen̄ iba kan̄ cha me ìrot, ọmọ ìkposa gwun̄ ogwu enenwaan̄ îmabe irọ adasi gwun̄, mè itele gwun̄ ogwu enenwaan̄ îchabe, ogwu òrere achubọk adasi gwun̄ kan̄.

¹⁷Kpan̄asi ikeya, îre gwun̄ enerieen̄ eyi ogwu enenwaan̄ îchabe ya ke ìbomọnọ kubọk adasi gwun̄ kan̄. Ogwugwa si ke ìbonyi irek iba me lek otutuuk inu geelek îkaan̄be. Mije, îre ogwugwa ore gwun̄ adasi unye kan̄. Ọmọ si ke unen eyi irek adasi gwun̄ okup inyi.

¹⁸“Ikaan̄ ogwu òkaan̄ gwun̄ enerieen̄ unye-ibot, ogwu òkikpaka si ibot, ìkakigban̄ utọn̄ ìnyi ogwu ute mè ogwu uga, isikisulu ọmọ osusut, ìkakisa ìgwen inu geege,

¹⁹ogwu ute mè ogwu uga esa ubọk kiban̄ gaalek etet ọmọ esa enu me isi ebi ugane me otunchit ama,

²⁰mè enetumu enyi ebi ugane ama kiban̄ ibe, ‘Ìkpọ, gwun̄ kiji yi ìre ogwu unye-ibot, mè ire si ogwu òkpaka. Ìkakigban̄ utọn̄ ìnyi eji. Ọmọ ìre ogwu uga ejit mè ogwu usa-miin̄.’

²¹Otutuuk ebirieen̄ ama ya mêneniteen̄ ewuuk isa itọbọ ọmọ ikpan̄, inyi ikwu. Otutuuk ebi Ijeren mêneninọ, mè itet ukpook. Sa me ikeyi, enyi mênenisan̄a ukot ijo inu òkup ikeyi isan̄a me etete kinyi.

²²“Ikaan̄ ogwu irọn̄ ikan ògbe mkpa, enenikpan̄ ọmọ, mè iben ijeen̄ me otu ọfọkọ,

²³ikatele ibe nkwukwu kan̄ ijeen̄ me otu ọfọkọ iwele egwe. Ìmun̄ ibe ke enyi mîfuun̄ nkwukwu kan̄ usen yaage, mije, ene geelek òjeen̄ me otu ọfọkọ ikeya ìre mbuban inu me isi Awaji, eyi òkisa ufieek-otu Awaji itap me ido. Ikachaka mbuban me inyọn̄ ijọn̄ Okumugwem Awaji kinyi obosa inyi enyi me ìrot.