Read obolo Ikan 22 Bible Online

Ikan 22 - obolo bible

Ikan 22

¹“Ire owu omun̄ orie eriembuuk ogwu Ijeren ogbo kwun̄ enerieen̄ mè ìre arọọn̄ kan̄ okije ichep, kada chieen̄ ìsan̄a me lek. Mun̄ ibe ke owu otet isa igwu ikom ijet ogwukaan̄.

²Ire ogwukaan̄ ya iluk me ujọn̄ọ ere, mè ìyaka ire ibe ke owu òkariọọn̄ ogwukaan̄ anam ya, tet sa fo uwu kwun̄, inyi ikup melek kwun̄ mege ire mgbọ ogwukaan̄ mônube iniweek, owu mônenisa inyi ogwukaan̄.

³Ikeya si ke oborọ ire omun̄ inyinya akpan ogwu melek kwun̄, mè ìre ofọnti kan̄, mè ìre ofifi inu ogwu melek kwun̄ geelek òchechep, owu onenimun̄. Kadaan̄ chieen̄ ìsan̄a me lek inu cha.

⁴“Ire omun̄ inyinya akpan ogwu Ijeren ogbo kwun̄ mè ìre orie eriembuuk kan̄ orọn̄be inyana me ejit oniin̄, tap ubọk gọọk ọmọ bene anam ya gwuun̄.

⁵“Ogwu enenwaan̄ ikasa ofọnti ebirieen̄ ìbala lek kan̄, ogwu enerieen̄ si ikasa ofọnti ebibaan̄ ìbala lek kan̄. Mije, ebi ìkirọ inu kechi ìre mbuban inu me isi Okumugwem Awaji kinyi.

⁶“Ire owu oje itoon̄ me lek uwu ofut me agba oniin̄, mè ìre me lek uti mè ìre me ijọn̄, mè imun̄ nga ofut okikwuun̄ ebi bọn, mè ìre ìkikwuun̄ nkwa, kagbaan̄ nga ofut mè ebi bọn ìtet ìsa ìfo.

⁷Owu môkọt itet bọn ofut ya isa ìfo, ire, mun̄ ibe ke ojuuk nga ofut ya itele, inyi ifo. Ire orọ ikeyi, inu môkije ijaan̄ owu me lek, owu môfuk si ugwem.

⁸“Ire owu onama aya uwu òkaan̄ akpakpa otoon̄-uwu ere ebi ene mêkọtbe ikweek irek, nama okwukwek kana otu utọn̄ otoon̄-uwu ya, inyi ene ikanan̄a me ere ya ìrọn̄ ìkwu. Sa me ikeya, eje ene ìkpotoon̄ me lek uwu kwun̄.

⁹“Kagbaan̄ chieen̄ ukwuuk gerep iba ìwop me emen uko gerep kwun̄. Ire ogbaan̄ chieen̄ ukwuuk gerep iba iwop me emen uko gerep ge, ukwuuk gerep cha owopbe melek otutuuk mfut ònan̄a me uko gerep ya môkana òchichaka inu.

¹⁰“Kagbaan̄ orie eriembuuk melek inyinya akpan, òrere chieen̄ anam iba, ìgban ìsa ìsi ikwaan̄ me uko.

¹¹“Ekwut geelek esabe ìnwọọn̄ anam mè eri lilin̄, òrere chieen̄ eri iba, igbaan̄ ilọk, kasa ìchim ofọnti ìtap.

¹²Chim afilafa ini tap me otu utọn̄ agan̄ ini ofọnti inyọn̄ kwun̄ obokitap.

¹³“Ire ogwu enerieen̄ imọnọ ogwu enenwaan̄ ge ido me lek nwa, mè inigọọk ogwu enenwaan̄ ya ilaak, mè ire ìkayaka ìma ogwu enenwaan̄ ya,

¹⁴mè inikitumu ogwu enenwaan̄ ya ifiat ikibe, ‘Ndo ogwu enenwaan̄ yi, mè igọọk ilaak, mè imun̄ ibe ke ìkare obaak enenwaan̄, ke îwuuk lek iriọọn̄ ebirieen̄,’

¹⁵nte mè nga gwun̄ enenwaan̄ ya mêsa inu òkijeen̄ ibe ke gwun̄ kiban̄ ìkariọọn̄-nu enerieen̄ inu inijeen̄ ebi ugane ama me otunchit ama ya.

¹⁶Nte ogwu enenwaan̄ ya mônenitumu inyi ebi ugane cha ibe, ‘Emi nsa gwun̄ n̄a enenwaan̄ iche olom inyi ogwu enerieen̄ yi, ire, ogwu enerieen̄ ìyaka inichacha gwun̄ yi,

¹⁷mè ikisa gwun̄ n̄a ikpa ikana ere ibe ke îwuuk lek iriọọn̄ ebirieen̄. Ire, mgbọ keyi, ìkpọ, eyi ìre inu òkijeen̄ ibe ke gwun̄ n̄a ìkariọọn̄-nu enerieen̄!’ Mgbọ ya, nte gwun̄ enenwaan̄ ya mônisan̄a oka ekwut ibaan̄ ya isibi ijeen̄ ebi ugane ama, inyi emun̄.

¹⁸Ebi ugane ama mênenisulu ogwu olom ya osusut.

¹⁹Mêfieek efit alata okuket inyi ọmọ ikpe, mè ibọkọ mkpukpe ikan ya isa ikana inyi nte ogwu enenwaan̄ ya, mije înyibe ogwu enenwaan̄ Ijeren ogwu ikariọọn̄ge enerieen̄ ijo erieen̄. Isikpe ikan ya isan̄a, ogwu enenwaan̄ ya ìbotutuuk si isi ire nwa kan̄ ifo isi. Ọmọ ìkpokọt ijit ogwu enenwaan̄ ya me otutuuk usen ugwem kan̄.

²⁰“Ire, ire ebi ugane ama iweek imun̄ ibe ke inu ya ìre atikọ, ke kpunu inu geege òjejeen̄ ibe ke ogwu enenwaan̄ ya ìkawuuk lek ìriọọn̄ ebirieen̄,

²¹ema mêtet ogwu enenwaan̄ ya isa inu me otu isotu uwu ogwu ute, ebirieen̄ ama kan̄ mêneniteen̄ ewuuk isa itọbọ ọmọ ikpan̄. Mije, ọmọ îrọ mbuban inu me ido Ijeren, bak me lek îrọbe òje oyet mgbọ îkupbe me uwu ogwu ute. Itọtọbọ ọmọ me ewuuk ikpan̄ mônenisan̄a ukot ijo inu òkup ikeya isan̄a me etete kinyi.

²²“Ire etet ogwu enerieen̄ mgbọ îkigọọk enenwaan̄ òkaan̄ olom ilaak, ebekpakpan̄ ema ene iba cha, ogwu enerieen̄ òkigọọk ogwu enenwaan̄ ya ilaak melek ogwu enenwaan̄ ya. Sa me ikeyi, enyi mênenisan̄a ukot ijo inu òkup ikeya isan̄a me Ijeren.

²³“Ikaan̄ ogwu enerieen̄ òjeje ichichini obaak enenwaan̄ ge me emen ama, ogwu etetbe itele ibedo, mè inigọọk ogwu enenwaan̄ ya ilaak,

²⁴etetet ema ene iba esa esi otunchit ama ya, mè eteen̄ ewuuk esa etọbọ ema ekpan̄, inyi ema ekwaan̄. Ogwu obaak enenwaan̄ ya ìbokwu mkpa ibot kan̄, mije, îre emen ama ke îkup, ìkataan̄ ukpo geege ìweek ntap-ubọk. Ogwu enerieen̄ ìbokwu mkpa ibot kan̄, mije, îrọ nwa ogwu Ijeren ogbo kan̄ inu esip. Sa me ikeya, enyi mênenisan̄a ukot ijo inu òkup ikeyi isan̄a me etete kinyi.

²⁵“Ire, ire ogwu enerieen̄ ichichini gwun̄ enenwaan̄ etetbe itele ibedo, me emen oron, ere ikarege emen ama, mè initet ogwu enenwaan̄ ya me unye ubọk igọọk ilaak, ogwu enerieen̄ ya ògọgọọk ogwu enenwaan̄ ya ilaak gaalek ke ebekpan̄.

²⁶Kpeberọ ogwu enenwaan̄ ya inu geege me lek, mije, ìkalọ ikan geege eyi ògbe mkpa. Inu ya òrọrọ ìkup kubọk ene osi ilet me ere ònọnọọn̄ ikikpọ ogwu melek kan̄, mè itet ikpan̄ me unye.

²⁷Mije, ogwu enerieen̄ yi ìmun̄ ogwu enenwaan̄ ya me emen oron. Ogwu enenwaan̄ ya etetbe itele ibedo otataan̄ ukpo, ire, kpunu ogwu òtatap ubọk inyi.

²⁸“Ire ogwu enerieen̄ ichichini obaak enenwaan̄ ogwu kpetet itele ibedo, mè initet me unye ubọk igọọk ilaak, ebi ene etetet ema,

²⁹ogwu enerieen̄ ya, ogwu ògọgọọk gwun̄ enenwaan̄ ya ilaak, ìbokpe akọp ikpoko alata okuket go inyi nte gwun̄ enenwaan̄ ya. Isikpe isan̄a, ìkaan̄ idodo gwun̄ enenwaan̄ ya me lek nwa, mije, îwuuk lek irọ ogwu enenwaan̄ ya inu esip. Ìkpokọt ijit ogwu enenwaan̄ ya, otutuuk usen ugwem kan̄.

³⁰“Ogwu enerieen̄ ìkpomọnọ nwa ogwu ute ikaan̄ me lek nwa. Enerieen̄ geelek òrọrọ inu òkup ikeya, îchili njak ogwu ute.